Read Ariun Bible 2013 – Ариун Библи 2013 Эхлэл 12 Bible Online

Эхлэл 12 - Ariun Bible 2013 – Ариун Библи 2013 bible

Эхлэл 12

¹Тэгээд ЭЗЭН, Абрамд айлдахдаа: —Чи эх нутгаасаа, төрлүүдээсээ мөн эцгийнхээ гэрээс гарч чамд Миний харуулах нутаг уруу явагтун.

²Чамаас Би агуу үндэстнийг гаргаж, чамайг бас Би ерөөн, чиний алдрыг Би агуу болгоно. Чи тэгээд ерөөл болтугай!

³Чамайг ерөөгчдийг Би ерөөж, чамайг хараагчийг Би хараана. Газар дэлхийн бүх овог чамаар ерөөгдөх болно гэв.

⁴Тэгээд Абрам, ЭЗЭНий хэлсэн ёсоор гарч явжээ. Лот хамт явав. Абрам Харанаас хөдөлсөн тэр үед далан таван настай байлаа.

⁵Абрам эхнэр Сараи, дүүгийнхээ хүү Лот болон Харанд байхдаа цуглуулсан бүх эд юмс, олж авсан хүмүүсээ аваад тэд Канаан нутгийг зорин хөдөлжээ. Тэгээд тэд Канаан нутагт орж ирэв.

⁶Абрам тэр нутгийг туулан, Шехемд байгаа Морегийн царс модонд хүрэв. Тэр үед канаанчууд тэр газар нутагт байжээ.

⁷ЭЗЭН, Абрамд үзэгдэн —Би чиний үр удамд энэ нутгийг өгөх болно гэж айлдав. Тэгээд Абрам өөрт нь үзэгдсэн ЭЗЭНд зориулан тэнд тахилын ширээ босгожээ.

⁸Тэндээсээ Бетелийн зүүн талын уул уруу хөдөлж, майхнаа босгожээ. Бетел баруунтаад нь, Аи зүүнтээд нь байв. Тэрээр тэнд ЭЗЭНд зориулан тахилын ширээг босгож, ЭЗЭНий нэрийг дуудав.

⁹Тэгээд Абрам цааш хөдөлж улмаар Негев тийш оджээ.

¹⁰Тэр газарт нь ган гачиг болов. Абрам Египетэд цагаачлахаар уруудан явлаа. Учир нь тэр нутаг нь маш их ган гачигтай байв.

¹¹Тэрээр Египетэд ойртож ирэх үедээ эхнэр Сараидаа —Үзэгдэх төрх чинь үзэсгэлэнтэй эмэгтэй гэдгийг би сайн мэдэж байна.

¹²Чамайг харсан египетчүүд “Эхнэр нь юм байна” гэж хэлээд намайг алж, чамайг амьд үлдээнэ.

¹³Чи өөрийгөө миний дүү охин гэж хэлээч. Тэгвэл чи надад өлзий болж чиний ачаар би амь мэнд үлдэнэ гэв.

¹⁴Абрамыг Египетэд хүрч ирэхэд египетчүүд эмэгтэйг нь маш үзэсгэлэнтэй болохыг харжээ.

¹⁵Фараоны түшмэд ч түүнийг хараад Фараонд магтсанд тэр бүсгүйг Фараоны ордонд хүргэжээ.

¹⁶Фараон тэр бүсгүйн төлөө Абрамд бог мал, үхэр, эр эм илжиг, боол, шивэгчин, тэмээ өгч, түүнийг сайхан байлгав.

¹⁷Абрамын эхнэр Сараигаас болж Фараон хийгээд түүний гэр бүлийнхнийг ЭЗЭН хүндээр цохив.

¹⁸Тэгэхэд Абрамыг Фараон дуудаж —Чи яаж байгаа юм бэ? Чи юунд түүнийг эхнэрээ гэж надад хэлсэнгүй вэ?

¹⁹Чи түүнийг миний дүү охин гэж юунд хэлсэн юм бэ? Тиймээс түүнийг би эхнэрээ болгож авсан юм. Эхнэр чинь энэ байна, одоо түүнийгээ аваад яв гэв.

²⁰Фараон энэ тухай хүмүүстээ тушаасанд тэд Абрамыг эхнэртэй нь, хамаг эд юмстай нь явуулав.