Read Ariun Bible 2013 – Ариун Библи 2013 Эхлэл 15 Bible Online

Эхлэл 15 - Ariun Bible 2013 – Ариун Библи 2013 bible

Эхлэл 15

¹Үүний дараа ЭЗЭНий үг Абрамд үзэгдлээр ирж Абрам аа, бүү ай! Бамбай чинь Би тул шагнал чинь агуу их гэжээ.

²Абрам —Эзэн БУРХАН минь! Та надад юу хайрлахсан бол? Би үр хүүхэдгүй бөгөөд миний голомт сахих хүү бол энэ Дамаскийн[34] Елиезер юм гэв.

³Абрам цааш нь —Та надад үр удам заяагаагүй. Харагтун, гэрт минь өссөн хүү миний өв залгамжлагч болно гэж хэлжээ.

⁴Харагтун, ЭЗЭНий үг түүнд ирж —Тэр хүн чиний өв залгамжлагч болохгүй, харин өөрийн чинь биеэс төрөх хүн л өв залгамжлагч болно гээд,

⁵түүнийг гадагш гаргаж —Чи тэнгэр өөд хар, оддыг тоолж чадваас тоол гэв. Тэгээд тэрээр түүнд —Үр удам чинь ийм олон болно гэж айлдав.

⁶Тэгээд Абрам, ЭЗЭНд итгэсэнд Эзэн үүгээр нь түүнийг зөвд тооцов.

⁷Тэрээр Абрамд —Би бол чамд энэ газар нутгийг өгч өвлүүлэхээр чамайг Халдеин Ураас авчирсан ЭЗЭН байна гэхэд

⁸Абрам —БУРХАН Эзэн минь! Энэ газрыг өвлөн авахаа би хэрхэн мэдэх вэ? гэж хэлэв.

⁹ЭЗЭН түүнд —Надад зориулж гунжин үнээ, хязаалан эм ямаа, хязаалан эр хонь, хүүрзгэнэ, өсвөр тагтаа зэргийг ав гэв.

¹⁰Абрам тэр бүхнийг авч хоёр таллан хуваагаад, тал бүрийг өөд өөдөөс нь харуулан тавьжээ. Харин шувуудыг хуваасангүй.

¹¹Махчин шувууд цогцсууд дээр бууж ирэхэд Абрам үргээж хөөв.

¹²Нар шингэх үеэр Абрам гүн нойронд автсан бөгөөд харагтун, түнэр харанхуй хийгээд айдас хүйдэс түүнийг нөмрөв.

¹³ЭЗЭН, Абрамд —Чиний үр удам хүний нутагт ирмэл хүн болж тэнд боолчлогдох бөгөөд дөрвөн зуун жил дарлагдана гэдгийг мэдтүгэй.

¹⁴Мөн тэднийг боолчлох үндэстнийг Би Өөрөө шүүнэ. Түүний дараа тэд их эд юмтай гарч ирнэ.

¹⁵Чиний хувьд, чи урт наслаад, эцэг өвгөд уруугаа амар тайвнаар очиж, тавигдах болно.

¹⁶Харин тэд дөрөв дэх үедээ нутагтаа эргэж ирнэ. Учир нь аморичуудын хилэнц арай дүүрээгүйгээс тэр болой гэжээ.

¹⁷Нар шингэж харанхуй болох үед, харагтун, утаат зуух ба галт бамбар нөгөө хуваагдсан махнуудын дундуур гарчээ.

¹⁸Тэр өдөр ЭЗЭН, Абрамтай гэрээ байгуулж —Египет мөрнөөс их мөрөн Евфрат хүртэлх энэ газрыг Би үр удамд чинь өгсөн билээ.

¹⁹Тэнд кен, кениз, кадмон,

²⁰хит, периз, рефаим,

²¹амори, канаан, гиргаш болон иебусчууд байдаг юм гэв.