Read Ariun Bible 2013 – Ариун Библи 2013 Эхлэл 16 Bible Online

Эхлэл 16 - Ariun Bible 2013 – Ариун Библи 2013 bible

Эхлэл 16

¹Абрамын эхнэр Сараи түүнд нэг ч хүүхэд төрүүлээгүй байв. Тэрээр Хагар нэртэй нэгэн египет зарц бүсгүйтэй байв.

²Сараи, Абрамд —ЭЗЭН намайг төрөхийг зөвшөөрсөнгүй. Тийм учраас та миний зарц бүсгүй дээр орно уу? Би түүгээр дамжуулан хүүхэдтэй болж магад гэж гуйсанд Абрам, Сараиг сонсон дагажээ.

³Ийнхүү Абрамыг Канаанд арван жил суусны дараа Абрамын эхнэр Сараи египет зарц Хагараа авчирч, нөхөр Абрамдаа татвар эм болгон өгчээ.

⁴Тэгээд Абрам, Хагар дээр орсонд тэр жирэмслэв. Хагар жирэмсэн болсноо мэдээд эзэгтэйгээ дорд үзэх болов.

⁵Сараи, Абрамд —Миний хийсэн алдаа тан дээр буух болтугай![35] Би зарц бүсгүйгээ таны өвөрт хийсэн. Одоо тэрээр жирэмсэн болсноо мэдээд намайг дорд үзэж байна. Та бид хоёрын хоорондохыг ЭЗЭН шүүг гэв.

⁶Абрам Сараид —Харагтун, зарц бүсгүй чинь чиний л гарт. Дураараа л бол гэв. Тэгээд Сараи Хагартай ширүүн харьцсанд Хагар түүнээс оргон зугтаажээ.

⁷ЭЗЭНий тэнгэрэлч цөлийн нэгэн булгийн дэргэдээс, Шур хүрэх зам дахь булгийн дэргэдээс Хагарыг олж —

⁸Сараигийн зарц бүсгүй Хагар аа! Чи хаанаас ирээд, хаашаа явж байна вэ? гэсэнд тэрээр —Би эзэгтэй Сараигаасаа оргон зугтаж явна гэжээ.

⁹ЭЗЭНий тэнгэрэлч түүнд —Чи эзэгтэйдээ буцаж очоод, гар дор нь орж захирагд гэв.

¹⁰ЭЗЭНий тэнгэрэлч түүнд —Би үр удмыг чинь ихэд олшруулж, тоолж баршгүй болгоно гэв.

¹¹ЭЗЭНий тэнгэрэлч түүнд —Харагтун, чи жирэмсэн байна. Чи хүү төрүүлэх болно. Түүнийг Ишмаел[36] гэж дуудна. Учир нь ЭЗЭН чиний зовлон зүдүүрийг сонссон билээ.

¹²Тэрээр хүмүүсийн дунд зэрлэг илжиг мэт байх болно. Түүний гар хүн бүхний эсрэг Хүн бүхний гар түүний эсрэг байх бөгөөд Хамаг ах дүүсийнхээ эсрэг талд тэр амьдрах болно гэв.

¹³Хагар “Түүнийг харсны дараа би энд амьд үлдлээ гэж үү?” гээд өөртэй нь ярьсан ЭЗЭНийг “Та бол хардаг Бурхан” гэж нэрлэжээ.

¹⁴Тиймээс тэр булгийг Беер-лахаи-рои гэж нэрлэсэн бөгөөд тэр нь Кадеш, Беред хоёрын хооронд байжээ.

¹⁵Тэгээд Хагар, Абрамд хүү төрүүлсэн ба Хагарын төрүүлсэн тэр хүүд Ишмаел гэдэг нэрийг Абрам өгөв.

¹⁶Хагар, Ишмаелыг Абрамд төрүүлж өгөхөд Абрам наян зургаан настай байжээ.