Read Ariun Bible 2013 – Ариун Библи 2013 Эхлэл 19 Bible Online

Эхлэл 19 - Ariun Bible 2013 – Ариун Библи 2013 bible

Эхлэл 19

¹Хоёр тэнгэрэлч Содомд үдшээр иржээ. Лот, Содомын гулдан[44] хаалган дээр сууж байснаа тэднийг харж, босон угтаад, нүүрээрээ газарт доош мэхийв. Тэрээр —Харагтун,

²эзэд минь! Зарцынхаа гэрээр орж, хөлөө угааж, хоноод маргааш өглөө эрт босож аян замдаа гарна уу? гэсэнд тэд —Үгүй, бид гадаа талбайд хононо гэв.

³Тэгээд Лот тэднээс хүчлэн гуйсанд тэд Лотынд очиж гэрт нь оржээ. Лот тэдэнд хоол унд бэлтгэн, исгээгүй талх барьж өгсөнд тэд идэцгээв.

⁴Тэднийг хэвтэхийн өмнө тэр хотын эрчүүд болох Содомын эрчүүд хөгшин залуугүй бүгд тал бүрээс цуглан гэрийг нь бүсэлж,

⁵Лотыг дуудан түүнд —Энэ шөнө танайд ирсэн хүмүүс хаана байна вэ? Тэднийг бидэнд гаргаж ир, бид тэдэнтэй хурьцацгаая! гэв.

⁶Лот тэдэнтэй уулзахаар гарч ирээд, үүдээ араараа хааж —

⁷Ах дүү нар минь ээ гуйя, ийм муухай юм битгий хийгээрэй!

⁸Харагтун, надад эр хүнтэй хавьтаагүй хоёр охин бий. Би тэднийг та нарт авчиръя. Та нар тэдэнтэй дураараа л бол. Харин энэ хүмүүс миний гэрт ирж, дээвэр дор минь орсон учир тэдэнд бузар хэрэг бүү хий гэв.

⁹Гэтэл тэд —Зайл! гээд —Манай энд цагаачилж ирчихээд бас бидний шүүгч болох нь уу? Одоо бид тэднээс илүү чамайг хорлоно гээд дайран ирж, Лотыг хүчээр түлхэж, хаалгыг нь эвдэхээр дөхөв.

¹⁰Нөгөө хүмүүс нь гараа сунган Лотыг гэрт татан оруулаад хаалгыг хааж,

¹¹гэрийн үүдэнд байсан хүмүүсийг том багагүй бүгдийг нь юу ч харахгүй болгосонд тэд гэрийн үүдийг олох гээд яджээ.

¹²Нөгөө хүмүүс Лотод —Энд танайхнаас өөр хэн хэн байна вэ? Хүргэн, хөвгүүд, охид гээд энэ хотод байгаа өөрийн гэсэн хэнийг ч болов энэ газраас гадагш гарга.

¹³Тэдний хашхираан ЭЗЭНий өмнө үлэмж их болсон учир бид энэ газрыг устгана. Үүний учир биднийг ЭЗЭН илгээсэн юм.

¹⁴Тэгээд Лот гадагш гарч, охидыг нь авахаар болсон хүргэддээ —ЭЗЭН энэ хотыг устгах гэж байна. Босогтун, энэ газраас гарагтун! гэв. Харин хүргэд нь түүнийг тоглоом хийж байна гэж боджээ.

¹⁵Үүр цайх үеэр тэнгэрэлч нар Лотыг яаруулан —Босогтун, энд байгаа эхнэр, хоёр охиноо аваад яв. Эс тэгвээс та нар энэ хотын шийтгэлтэй хамтдаа устгагдах болно гэжээ.

¹⁶Харин Лотыг саатан тээнэгэлзэхэд тэр хүмүүс түүний гараас мөн эхнэрийнх нь болон хоёр охиных нь гараас зууран авч, ЭЗЭН тэдэнд өршөөнгүй хандсан тул тэднийг гадагш гарган, хотын гадна аваачиж тавив.

¹⁷Тэднийг гадагш нь аваачаад нөгөө хүмүүсийн нэг нь —Амийнхаа төлөө зугт! Бүү эргэж хар! Энэ талд бүү үлд! Харин уул уруу зугт! Эс тэгвэл та нар устгагдах болно гэсэнд

¹⁸Лот тэдэнд —Үгүй, эзэн минь!

¹⁹Таны нүдэнд зарц тань тааллыг олж, та энэрэл хайраа надад үзүүлэн амийг минь аварсан ач тань тун их авч би уул уруу зугтаж чадахгүй. Гай зовлон намайг нөмөрч, би үхэх болно.

²⁰Харагтун, тэр нэг хотод зугтаж очвол ойрхон бас жижиг ч хот юм. Гуйя, намайг тийшээ зугтаалгаач. Тэр жижиг хот биш үү? Тэгвэл би амьд гарна гэв.

²¹Тэрээр түүнд —За, би чиний хүсэлтийг хүлээн авч, чиний хэлж байгаа тэр хотыг устгахгүй.

²²Чамайг тэнд очтол Би юу ч хийж болохгүй тул тийшээ бушуухан зугт гэв. Тиймээс тэр хотыг Зоар[45] гэж дуудах болжээ.

²³Лотыг Зоарт орж ирэхэд нар мандсан байв.

²⁴ЭЗЭН Содом, Гоморра дээр хүхэр ба галыг тэнгэрээс буюу ЭЗЭНээс бороо мэт буулгажээ.

²⁵Тэгээд Тэрээр тэдгээр хот, тал хөндийг бүхлээр нь, бас хотод амьдарч байсан хамаг амьтан, газрын ургамал бүгдийг хөмрөн сүйрүүлжээ.

²⁶Харин Лотын ард явж байсан эхнэр нь эргэж хараад давсан багана болчихжээ.

²⁷Абрахам өглөө эрт босоод, ЭЗЭНий өмнө зогсож байсан тэр газартаа очив.

²⁸Тэрээр Содом, Гоморра болон бүх тал газрыг өнгийн харахад, зуухнаас гарч байгаа утаа шиг утаа бургилж байлаа.

²⁹Бурхан талын хотыг устгахдаа Абрахамыг дурсан санаж, Лотын сууж байсан хотыг устган сүйрүүлэхдээ Лотыг сүйрлийн дундаас мэнд гаргажээ.

³⁰Лот, Зоарт амьдрахаас айсан учир хоёр охиныхоо хамт Зоараас гарч, ууланд сууж, хоёр охинтойгоо агуйд амьдрах болов.

³¹Нэгэн өдөр том охин нь дүү охиндоо —Аав маань өвгөрлөө. Энэ газарт[46] ертөнцийн жам ёсоор бидэн дээр орох хүн алга байна.

³²Тиймээс аавдаа дарс уулгаад, түүнтэй унтаж, улмаар эцгийнхээ үр удмыг залгамжлуулан үлдээцгээе гэв.

³³Тэр шөнөдөө тэд эцэгтээ дарс уулгаж, том охин нь аав дээрээ оржээ. Харин аав нь охиныхоо хэзээ хэвтэж, хэзээ боссоныг нь мэдсэнгүй.

³⁴Түүний маргааш нь том охин нь охин дүүдээ —Өнгөрсөн шөнө би эцэг дээрээ орсон. Өнөө шөнө ч бас чи түүн дээр орж эцгийнхээ үр удмыг залгамжлуулан үлдээцгээе гэв.

³⁵Тэр шөнөдөө тэд эцэгтээ дахин дарс уулгаж, бага охин нь босож очоод, эцэг дээрээ оржээ. Эцэг нь охиноо хэзээ хэвтэж, хэзээ боссоныг нь мэдсэнгүй.

³⁶Ингэж Лотын хоёр охин нь эцгээсээ хүүхэдтэй болов.

³⁷Том охин нь хүү төрүүлж, хүүгээ Моаб[47] гэж нэрлэжээ. Тэр нь өнөөгийн моабчуудын өвөг билээ.

³⁸Бага охин нь бас хүү төрүүлж, хүүгээ Бен-амми[48] гэж нэрлэсэн нь өнөөгийн аммончуудын өвөг билээ.