Read Ariun Bible 2013 – Ариун Библи 2013 Эхлэл 2 Bible Online

Эхлэл 2 - Ariun Bible 2013 – Ариун Библи 2013 bible

Эхлэл 2

¹Тэнгэр газар болон түүний түг түмнийг ийнхүү гүйцээв.

²Долоо дахь өдөр гэхэд Бурхан хийж байсан ажилаа гүйцээгээд, хийж байсан бүх ажлаасаа Тэрээр долоо дахь өдөртөө амарчээ.

³Бүтээж байсан бүх ажлаасаа энэ өдөр амарсан тул[6] Бурхан долоо дахь өдрийг ерөөж ариун болгов.

⁴ЭЗЭН[7] Бурхан тэнгэр газрыг буй болгосон уг сурвалж ийм билээ. Тэнгэр газар бүтээгдсэн тэр өдөр,

⁵ЭЗЭН Бурхан газар дэлхий дээр хур бороо оруулаагүй, газар тариалах хүн ч үгүй байсан тул хээрийн бут сөөг газарт хараахан үгүй, тариалангийн ургамал ногоо арай ургаагүй, харин

⁶газраас уур манан хөөрч, бүх газрын гадаргууг усалдаг байлаа.

⁷Тэгэхэд ЭЗЭН Бурхан газрын[8] шорооноос хүнийг[9] урлаад, амин амьсгалыг хамраар нь үлээж оруулахад хүн амьд биет болжээ.

⁸ЭЗЭН Бурхан дорно зүгт Еденд цэцэрлэг тариад, урласан хүнээ тэнд авчирч тавьжээ.

⁹Бас хөрснөөс ЭЗЭН Бурханы ургуулсан янз бүрийн модод нь хараа булаам, хүнсэнд сайн байв. Тэр цэцэрлэгийн гол дунд бас амийн мод хийгээд сайн мууг мэдүүлэгч[10] мод байжээ.

¹⁰Еденээс гарсан нэгэн мөрөн тэр цэцэрлэгийг усалдаг бөгөөд тэндээс дөрвөн салаа эх авчээ.

¹¹Эхнийх нь Пишон гэдэг нэртэй бөгөөд алт байдаг. Хавилагийн бүх нутгийг дайран өнгөрнө.

¹²Тэр нутгийн алт нь шижир, тэнд бидолаах[11] хийгээд судалт гартаам ч байжээ.

¹³Хоёр дахь мөрний нэр нь Гихон бөгөөд Кушийн[12] бүх нутгийг дайран өнгөрдөг.

¹⁴Гурав дахь мөрний нэр нь Тигр бөгөөд Ассирийн зүүн талаар урсдаг. Дөрөв дэх мөрөн нь Евфрат аж.

¹⁵ЭЗЭН Бурхан хүнийг авчирч, Еден цэцэрлэгийг арчлуулан сахиулахаар тэнд суулгав.

¹⁶Тэгээд ЭЗЭН Бурхан тэр хүнд тушаан —Чи энэ цэцэрлэгийн аль ч модны жимсийг идэж болно.

¹⁷Харин сайн мууг мэдүүлэгч модны жимснээс[13] идэж болохгүй. Түүнээс идсэн тэр өдөртөө л чи зайлшгүй үхнэ! гэв.

¹⁸ЭЗЭН Бурхан —Хүн ганцаараа байх нь сайн биш. Би түүнд тохирох туслагчийг буй болгоё гэжээ.

¹⁹Ингээд ЭЗЭН Бурхан шороогоор хээрийн бүхий л амьтан, огторгуйн бүхий л шувууг урлаад, тэднийг хэрхэн дуудахыг нь үзэхээр Адамд авчирч өгчээ. Тэгээд амьд биет бүхнийг Адам хэрхэн дуудсан нь тэдний нэр болов.

²⁰Ийнхүү Адам бүх мал адгуус, огторгуйн шувууд, хээрийн бүх амьтанд нэр өгчээ. Харин Адамд тохирох туслагч олдсонгүй.

²¹Иймд ЭЗЭН Бурхан Адамыг гүн нойронд автуулж түүнийг унтуулаад хавиргаас нь нэгийг сугалан авч ормыг нь махаар бөглөжээ.

²²ЭЗЭН Бурхан Адамаас авсан тэр хавиргаараа нэгэн эмэгтэйг бүтээгээд, түүнийгээ Адамд авчирч өгөв.

²³Адам Энэ чинь л яснаас минь авсан яс Махнаас минь авсан мах юм. Эр хүнээс авагдсан тул Эм хүн гэж нэрлэгдэг гэжээ.[14]

²⁴Ийм учраас эр хүн эцэг эхээ орхиод, эхнэртэйгээ нийлж, хоёул нэг махбод болдог.

²⁵Хүн эхнэр хоёр нүцгэн байсан бөгөөд тэд ичсэнгүй.