Read Ariun Bible 2013 – Ариун Библи 2013 Эхлэл 21 Bible Online

Эхлэл 21 - Ariun Bible 2013 – Ариун Библи 2013 bible

Эхлэл 21

¹ЭЗЭН хэлсэн ёсоороо Сарагийнд айлчилж мөн ЭЗЭН айлдсан ёсоороо Сарагийн төлөө үйлджээ.

²Сара жирэмсэлж, Бурханаас түүнд хэлж тогтоосон цагт нь, нас өтөлсөн Абрахамд хүү төрүүлж өгөв.

³Абрахам өөрт нь төрсөн хүүдээ буюу Сарагийн төрүүлж өгсөн хүүд Исаак гэдэг нэр өгөв.

⁴Абрахам, хүү Исаакаа найм хоногтойд нь, Бурханы тушааснаар хозолжээ.

⁵Хүү Исаакаа төрөхөд Абрахам зуун настай байлаа.

⁶Сара —Бурхан надад инээмсэглэл[50] авчирлаа. Сонсогч хэн бүхэн надтай хамт инээх болно гэв.

⁷Сара —Сара хүүхдүүдээ хөхүүлнэ гэж Абрахамд хэлэх хэн байлаа даа? Гэлээ ч би Абрахамыг нас өтөлсөн үед нь хүү төрүүллээ гэв.

⁸Хөвгүүн өсөж, хөхнөөс гарчээ. Исаакийг хөхнөөс гарсан өдөр Абрахам том найр хийжээ.

⁹Египет бүсгүй Хагарын Абрахамд төрүүлсэн хүү нь Исаакийг дооглож байгааг[51] Сара хараад,

¹⁰Абрахамд —Энэ зарц бүсгүйг хүүтэй нь зайлуул. Зарц бүсгүйн хүү миний хүү Исаактай хамт өв залгамжлахгүй гэжээ.

¹¹Хүүгийнх нь талаарх энэ зүйл Абрахамыг ихэд зовоов.

¹²Бурхан, Абрахамд —Чи тэр хүү, зарц бүсгүй хоёроос болж сэтгэл бүү зов. Сарагийн чамд хэлсэн бүгдийг сонс. Учир нь Исаакаас гарсан нь л чиний үр удам гэж нэрлэгдэх болно.

¹³Харин зарц бүсгүйн хүү ч чиний үр удам учир Би түүнээс нэгэн үндэстэн бий болгоно гэв.

¹⁴Абрахам өглөө эртлэн босож, талх болон туламтай ус авч, Хагарын мөрөнд үүрүүлээд, хөвгүүнтэй нь хамт явуулжээ. Хагар тэндээс гарч, Беершебагийн зэлүүд талаар тэнүүчлэн явав.

¹⁵Туламтай ус нь дуусаж, Хагар хүүгээ нэгэн бутны доор тавьж орхиод

¹⁶“Би хүүгийнхээ үхэхийг харж байж чадахгүй” гээд харвасан сумны тусгалын газар очиж, хүүгийнхээ эсрэг харж суугаад дуугаа өндөрсгөн уйлав.[52]

¹⁷Хөвгүүний уйлахыг Бурхан сонсоод, Бурханы тэнгэрэлч тэнгэрээс Хагарыг дуудаж —Хагар аа! Юу болсон бэ? Бүү ай. Учир нь Бурхан тэнд байгаа хөвгүүний дууг сонсжээ.

¹⁸Бос, хөвгүүнийг босгож, гар дээрээ ав! Учир нь Би түүнийг агуу үндэстэн болгоно гэв.

¹⁹Бурхан, Хагарын нүдийг нээсэнд тэрээр усны ундарга олж хараад очиж тулмаа усаар дүүргэн хөвгүүндээ уулгалаа.

²⁰Бурхан тэр хөвгүүнтэй хамт байсан бөгөөд тэрээр өсөж том болжээ. Тэр зэлүүд талд амьдран сууж, харваач болов.

²¹Тэрээр Параны цөлд амьдран сууж, ээж нь түүнд Египет нутгаас эхнэр авч өгчээ.

²²Тэр үед Абимелех болон түүний цэргийн жанжин Фикол нар Абрахамд —Чамайг юу ч хийсэн Бурхан чамтай хамт байна.

²³Чи надад болон миний хүү, миний ачид хуурамч үйл хийхгүй гэдгээ энд надад одоо Бурханаар тангарагла. Миний чамд сайнаар үйлдсэн шиг чи бас надад болон өөрийнхөө түр суугаа энэ газар нутагтаа үйлдэгтүн гэсэнд —

²⁴Би тангараглая гэж Абрахам хэлэв.

²⁵Абимелехийн зарц нар Абрахамын худгийг булаан авсан хэргийн талаар Абрахам, Абимелехийг зэмлэсэнд

²⁶Абимелех —Үүнийг хэн хийснийг би мэдэхгүй, чи ч бас надад хэлээгүй. Би энэ тухай сонсоогүй, өнөөдөр л сонсож байна гэв.

²⁷Абрахам бог мал, үхэр авч Абимелехт өгөөд, тэр хоёр гэрээ байгуулжээ.

²⁸Абрахам долоон охин хургыг сүргээс нь таслан тавихад

²⁹Абимелех, Абрахамд —Сүргээсээ таслан тавьсан энэ долоон охин хурга ямар учиртай вэ? гэсэнд

³⁰Абрахам —Намайг энэ худгийг ухсаны минь гэрч болох энэ долоон охин хургыг та гараас минь авах учиртай гэв.

³¹Тэр хоёр тэнд бие биендээ тангараг тавьсан учраас тэр газрыг Беершеба[53] гэж нэрлэх болжээ.

³²Тэгээд тэд Беершебад гэрээ байгуулаад, Абимелех түүний цэргийн жанжин Фикол хоёр хөдөлж, филистчүүдийн нутагтаа буцжээ.

³³Абрахам Беершебад сухай мод тарьж, Мөнхөд оршигч Бурхан ЭЗЭНий нэрийг тэнд дуудав.

³⁴Тэгээд Абрахам филистчүүдийн нутагт олон хоног нутаглан суужээ.