Read Ariun Bible 2013 – Ариун Библи 2013 Эхлэл 24 Bible Online

Эхлэл 24 - Ariun Bible 2013 – Ариун Библи 2013 bible

Эхлэл 24

¹Абрахам нас өндөр болсон бөгөөд ЭЗЭН бүхий л талаар түүнийг ерөөв.

²Абрахам гэрийнх нь бүх хэргийг хариуцдаг хамгийн ахмад зарцдаа —Миний өгзгөн доогуур гараа хий.[56]

³Тэнгэрийн Бурхан ба газрын Бурхан, ЭЗЭНээр тангарагла. Миний амьдран сууж байгаа канаанчуудын охидоос хүүд минь эхнэр эс сонгон,

⁴нутагт минь, төрөл төрөгсдөд минь очиж, миний хүү Исаакт эхнэр авч өгнө гэж тангарагла гэв.

⁵Зарц нь —Хэрэв тэр эмэгтэй намайг дагаж энэ нутагт ирэхийг хүсэхгүй бол яах вэ? Тэгвэл таны гарч явсан нутагт хүүг чинь буцааж аваачих уу? гэж асуужээ.

⁶Абрахам түүнд —Чи миний хүүг тэнд буцааж аваачив аа!

⁷Намайг эцгийн минь гэрээс, төрсөн нутгаас минь салгаж ирүүлэн, “Би энэ газар нутгийг чиний үр удамд өгнө” гэж надад тангараглан хэлсэн тэнгэрийн Бурхан ЭЗЭН тэнгэрэлчээ чиний өмнө илгээнэ. Тэгээд чи тэндээс миний хүүд эхнэр сонгох болно.

⁸Хэрэв тэр бүсгүй чамайг дагаж ирэхийг хүсэхгүй бол, чи миний энэ тангаргаас чөлөөлөгдөх болно. Зөвхөн хүүг минь битгий тийш нь аваачаарай гэв.

⁹Тэгээд зарц өөрийн эзэн Абрахамын өгзгөн дор гараа тавьж, дээрхийг түүнд тангараглав.

¹⁰Тэгээд эзнийхээ тэмээнээс арвыг, эзнийхээ янз бүрийн үнэт эдлэлээс бас аваад, Месопотами тийш хөдөлж, Нахорын хот уруу явжээ.

¹¹Тэрээр эмэгтэйчүүд ус авахаар гардаг үдшийн цагаар хотын гаднах худгийн дэргэд тэмээгээ хэвтүүлэв.

¹²Тэр залбирч —Миний эзэн Абрахамын Бурхан ЭЗЭН! Та өнөөдөр намайг тэр бүсгүйтэй уулзуулж, миний эзэн Абрахамд хайр энэрэл үзүүлнэ үү?

¹³Хотын хүмүүсийн охид ус авахаар гарч ирэх цаг болжээ. Би худгийн дэргэд зогсож байя.

¹⁴“Чи ваараа тонгойлгож, уснаасаа надад уулгана уу?” гэж намайг асуухад “Уу, уу! Би бас таны тэмээг ч усалж өгье” гэж хариулагч эмэгтэй нь Таны зарц Исаакт Танаас заяасан хүн байг! Та миний эзэнд хайр энэрэл үзүүлснийг тань үүгээр би мэднэ гэв.

¹⁵Зарцыг үгээ хэлж дуусаагүй байтал Ребека мөрөн дээрээ ваартай гарч ирэв. Тэрээр Абрахамын дүү Нахорын эхнэр Милкагийн хүү Бетуелийн охин байжээ.

¹⁶Тэр бол харваас маш гоо үзэсгэлэнтэй, өдий хүртэл эр хүнтэй ойртоогүй, онгон охин ажээ. Тэр бүсгүй худаг дээр очиж, ваараа усаар дүүргээд дээш гарч ирэв.

¹⁷Зарц түүнтэй уулзахаар гүйж очоод —Чи надад ваартай уснаасаа жаахан балгуулна уу? гэсэнд

¹⁸тэрээр —Эзэн минь, уу! гээд ваараа яаран гар дээрээ буулгаж уулгав.

¹⁹Тэр түүнд ус уулгаж дуусаад —Би бас ус утгаж, таны тэмээнүүдийг ч ханатал нь усалъя гэж хэлэв.

²⁰Тэрээр ваартай усаа онгоцонд яаран юүлээд, дахин ус авахаар худаг уруу гүйж, бүх тэмээнд нь ус утгажээ.

²¹Нөгөө хүн түүнийг дуугүй ширтэн, ЭЗЭН түүний аян замыг ивээсэн эсэхийг мэдэх гэж байлаа.

²²Тэмээнүүдээ ус ууж дууссаны дараа, тэр хүн хагас шекелийн жинтэй алтан гархи, арван шекелийн жинтэй хос алтан бугуйвчийг түүнд авч өгөөд —

²³Чи хэний охин бэ? Надад хэлээч! Эцгийн чинь гэрт бидэнд хоноглох өрөө бий юу? гэж хэлсэнд

²⁴тэрээр —Би бол Нахорт Милкагийн төрүүлж өгсөн хүү Бетуелийн охин гээд —

²⁵Манайд сүрэл, өвс тэжээл арвин бий мөн хоноглох өрөө ч бий гэв.

²⁶Тэгээд тэр хүн доор бөхийн, ЭЗЭНд мөргөж —

²⁷Абрахам эзнийхээ Бурхан ЭЗЭНийг магтъя. Миний эзний төлөө Та энэрэл хайр ба үнэнээ эс орхив. Замд ЭЗЭН намайг удирдаж, миний эзний дүүгийн гэрт ирүүлсэн байна гэв.

²⁸Тэр бүсгүй ээжийнхээ гэрт гүйж хүрээд, энэ тухай хэлжээ.

²⁹Ребекад Лабан гэдэг ах байжээ. Тэр ах нь худаг дээр байсан нөгөө хүн уруу яаран гүйж очив.

³⁰Тэрээр охин дүүгийнхээ гарт байгаа бугуйвч, чихэнд байгаа ээмгийг хараад, бас тэр хүн надад ингэж хэллээ гэсэн үгийг нь Ребекагаас сонсоод, нөгөө хүн уруу очиход тэрээр худгийн дэргэд тэмээнийхээ хажууд зогсож байжээ.

³¹Лабан —Бурханы ерөөлийг хүртсэн хүн та манайд ороорой. Бид танд өрөө, тэмээнд чинь байр бэлтгэчихсэн байхад та яагаад гадаа зогсоод байна вэ? гэсэнд

³²нөгөө хүн байшинд орж, Лабан тэмээнүүдийнх нь ачааг буулгаж, сүрэл, өвс тэжээл авчирч өгөөд, түүнд бас түүнтэй хамт ирсэн эрчүүдэд хөл угаах ус авчирч өгчээ.

³³Тэгээд түүний өмнө хоол унд авчирч тавихад тэр хүн —Би ажил хэргийнхээ тухай ярихаас нааш хоол идэхгүй гэсэнд Лабан —Ярь ярь! гэв.

³⁴Тэрээр —Би бол Абрахамын зарц.

³⁵ЭЗЭН миний эзнийг ихэд ерөөж, түүнийг агуу их болгожээ. Мөн түүнд үхэр, хонин сүрэг, алт мөнгө, зарц шивэгчингүүд, тэмээ, илжиг өгсөн юм.

³⁶Миний эзний эхнэр Сара настай болсон үедээ миний эзэнд хүү төрүүлж өгсөнд эзэн хүүдээ бүх өмчөө өгсөн юм.

³⁷Миний эзэн надаар тангараглуулж “Миний амьдран суудаг канаанчуудын охидоос хүүд минь эхнэр бүү сонго.

³⁸Харин чи миний эцгийн гэр, манай төрөл төрөгсдөд очиж, тэндээс миний хүүд эхнэр сонго!” гэсэн билээ.

³⁹Тэгэхэд нь би эзэндээ “Хэрэв тэр эмэгтэй намайг дагаж явахгүй бол яах вэ?” гэж хэлэхэд

⁴⁰тэрээр надад “Миний даган бишрэгч ЭЗЭН тэнгэрэлчээ чамтай хамт явуулж, аян замыг чинь амжилттай болгоно. Тэгээд чи миний эцгийн гэр, манай төрөл төрөгсдөөс хүүд минь эхнэр сонгож авах болно.

⁴¹Чи манай төрөл төрөгсдөд хүрч очсон үедээ энэ тангаргийн гэрээнээс чөлөөтэй болно. Тэд чамд охиноо өгөхгүй байсан ч чи энэ тангаргийн гэрээнээс чөлөөтэй болно” гэв.

⁴²Би өнөөдөр худаг дээр ирээд “Миний эзэн Абрахамын Бурхан ЭЗЭН! Хэрэв Та соёрхвол аян замыг минь амжилттай болгож өгнө үү!

⁴³Би худгийн дэргэд зогсож байна. Залуу бүсгүйг ус авахаар ирвэл би түүнд «Чи ваартай уснаасаа надад жаахан уулгана уу?» гэж хэлье.

⁴⁴Хэрэв тэрээр «Уу, уу! Би бас тэмээнүүдэд чинь ус авчиръя» гэж хэлбэл тэр бүсгүй нь ЭЗЭНээс миний эзний хүүд заяасан хүн болно” гэж

⁴⁵зүрхэндээ залбирч арай дуусаагүй байтал, харагтун, Ребека мөрөн дээрээ ваараа тавин, худаг уруу бууж ирээд, ус татав. “Надад ус уулгана уу?” гэж би түүнд хэлэхэд

⁴⁶тэрээр ваараа мөрнөөсөө яаран буулгаад, “Уу, уу! Би бас тэмээнүүдийг чинь усалъя” гэж хэлэв. Тэгээд би уусан бөгөөд тэр миний тэмээнүүдийг ч бас усаллаа.

⁴⁷Тэгээд би түүнээс “Чи хэний охин бэ?” гэж асуухад тэр “Би бол Милкагийн Нахорт төрүүлж өгсөн Бетуелийн охин” гэж хариулсан. Би түүний хамарт гархи, гарт бугуйвч хийж өгөв.

⁴⁸Тэгээд миний эзэн Абрахамын Бурхан ЭЗЭН намайг үнэн зөв замаар хөтөлсөөр, эзний минь дүүгийн охиныг хүүд нь сонгуулсанд би ЭЗЭНд доор бөхийн мөргөөд, Түүнийг магтан дуулав.

⁴⁹Хэрэв одоо та нар миний эзэнд энэрэл хайр ба үнэнээр хандъя гэвэл надад хэлээрэй. Тэгэхгүй ч гэсэн бас надад хэлээд, баруун тийшээ эргэх үү эсвэл зүүн тийшээ эргэх үү гэдгийг минь мэдүүл гэж хэлэв.

⁵⁰Лабан Бетуел хоёр —Энэ нь ЭЗЭНээс заяагддаг учраас бид чамд сайн муу аль нь болохыг хэлж чадахгүй.

⁵¹Харагтун, Ребека таны өмнө байна. Түүнийг аваад яваарай. ЭЗЭНий айлдсан ёсоор тэрээр таны эзний хүүгийн эхнэр болог гэв.

⁵²Абрахамын зарц тэдний үгийг сонсоод, ЭЗЭНд газарт доош мэхийж,

⁵³алт мөнгөн эрдэнэс, хувцас хунар гарган Ребекад өгөв. Тэр түүний ах болон ээжид нь бас үнэт зүйлс барьжээ.

⁵⁴Тэр болон түүнийг дагалдагсад идэж уугаад, хоноглов. Өглөө босоод тэрээр —Намайг эзэнд минь буцааж явуулна уу? гэхэд

⁵⁵Ребекагийн ах, ээж хоёр —Охин минь арваад хоног бидэнтэй хамт байг. Тэгээд дараа нь тэр явж болно гэв.

⁵⁶Тэр хүн тэдэнд хэлэхдээ —Намайг бүү саатуул. ЭЗЭН замыг минь амжилттай болгосон учир намайг явуулаач! Би эзэндээ очъё гэв.

⁵⁷Тэд —Бид охиноо дуудаж, түүний амнаас лавлая гээд

⁵⁸Ребекаг дуудаж —Чи энэ хүнтэй хамт явах уу? гэж асуусанд тэрээр —Би явна гэж хариулжээ.

⁵⁹Тэгээд тэд өөрсдийн охин дүү Ребекаг болон түүний асрагч эхийг мөн Абрахамын зарц хийгээд түүний эрсийн хамт явуулав.

⁶⁰Тэд Ребекаг ерөөн Охин дүү минь, Түм буман хүний эх болох болтугай! Өшөөтнийхөө үүд хаалгыг Үр удам чинь эзэгнэх болтугай! хэмээжээ.

⁶¹Ребека болон түүний шивэгчид босоцгоож, тэмээндээ мордон, тэр хүнийг даган хөдөлж, зарц нь Ребекаг аваад явлаа.

⁶²Энэ үед Исаак Беер-лахаи-роигоос[57] хүрч ирсэн байлаа. Тэрээр Негевд сууж байсан ажээ.

⁶³Үдэш болж байхад Исаак бясалгал хийхээр хээр гарчээ. Тэгээд хараагаа өргөн хартал тэмээн жин айсуй харагдав.

⁶⁴Ребека хараагаа өргөн Исаакийг хараад тэмээнээсээ бууж,

⁶⁵зарцад —Хээр талаар хэрэн алхаж, биднийг угтан ирж яваа тэр хүн хэн бэ? гэсэнд зарц —Тэр бол миний эзэн гэжээ. Үүнийг сонсоод Ребека гивлүүрээ авч нүүрээ халхлав.

⁶⁶Зарц нь Исаакт өөрийнхөө хийсэн бүх зүйлийг ярьжээ.

⁶⁷Исаак Ребекаг эх Сарагийнхаа майханд дагуулан ороод, түүнийг эхнэрээ болгон авч, хайрлан дурлажээ. Эхийгээ нас барснаас хойших Исаакийн уй гашуу ингэж тайлагдав.