Read Ariun Bible 2013 – Ариун Библи 2013 Эхлэл 25 Bible Online

Эхлэл 25 - Ariun Bible 2013 – Ариун Библи 2013 bible

Эхлэл 25

¹Абрахам дахин нэг эхнэр авсан бөгөөд нэр нь Кетура.

²Тэрээр түүнд Зимран, Иокшан, Медан, Мидиан, Ишбак, Шуа нарыг төрүүлж өгчээ.

³Иокшан нь Шеба, Дедан хоёрыг төрүүлжээ. Деданы хөвгүүд нь ашур, летуш, леумчууд болно.

⁴Мидианы хөвгүүд нь Ефа, Ефер, Ханох, Абида, Елдаа нар билээ. Эд бүгд Кетурагийн хөвгүүд юм.

⁵Абрахам өөрийн хамаг өмчийг Исаакт өгчээ.

⁶Абрахам татвар эмсийнхээ хүүхдүүдэд өглөг өгч, өөрийн амьд ахуйд тэднийг хүү Исаакаасаа холдуулан, дорно зүг уруу явууллаа.

⁷Абрахамын амьд явсан хоног нэг зуун далан таван жил болжээ.

⁸Абрахам сайхан өндөр насыг насалж гүйцээд эцсийн амьсгал хурааж нөгчив. Тэгээд тэр өөрийн хүмүүст нийлж,

⁹хүү Исаак Ишмаел хоёр нь түүнийг Мамрегийн өмнө тал дахь хит хүн Зохарын хүү Ефроны талбай дахь Махпела агуйд оршуулжээ.

¹⁰Тэр газрыг Абрахам хитчүүдээс худалдан авсан байв. Абрахам түүний эхнэр Сара хоёрыг тэнд оршуулжээ.

¹¹Абрахамыг нас барсны хойно түүний хүү Исаакийг Бурхан ерөөж, Исаак Беер-лахаи-роин хавьцаа нутаглан суух болов.

¹²Сарагийн шивэгчин египет бүсгүй Хагараас Абрахамд төрүүлж өгсөн хүү Ишмаелын уг угсаа энэ буюу.

¹³Хөвгүүдийнх нь нэрс, тэдний төрсөн дарааллаар дараах болой. Ууган хүү Небаиот, удаах нь Кедар, Адбеел, Мибсам,

¹⁴Мишма, Дума, Масса,

¹⁵Хадад, Тема, Иетур, Нафиш, Кедема нар юм.

¹⁶Эдгээр нь Ишмаелын хөвгүүд байсан бөгөөд тосгон ба суурингийнхаа дагуух нэрс нь энэ агаад тэд овог овгийнхоо дагуу арван хоёр ноён байжээ.

¹⁷Ишмаелын амьдралын жилүүд нь нэг зуун гучин долоон жил болсон бөгөөд тэрээр амьсгал хураан өөд болж, өөрийн өвөг дээдэстээ одов.

¹⁸Тэд Ассири хүрэх зам дагуу Египетийн зүүн зүгт орших Хавилагаас аваад Шур хүртэлх нутагт суурьшиж, ах дүүс хоорондоо дайсагналцан суужээ.

¹⁹Абрахамын хүү Исаакийн уг угсаа ийм билээ. Абрахам Исаакийг төрүүлж,

²⁰Исаак дөчин настайдаа Паддан-Арамын арам хүн Бетуелийн охин, арам хүн Лабаны охин дүү Ребекаг эхнэр болгон авчээ.

²¹Эхнэр нь хүүсэр учир Исаак түүний төлөө ЭЗЭНд залбирсанд ЭЗЭН хариулж, эхнэр Ребека нь жирэмсэлжээ.

²²Хүүхдүүд нь эхийнхээ хэвлий дотор тэмцэлдсэнд —Ингээд байвал би яах вэ? гэж хэлээд, Ребека ЭЗЭНээс асуун залбирахаар одов.

²³ЭЗЭН түүнд —Хэвлий дотор чинь хоёр үндэстэн байна. Биеэс чинь хоёр ард түмэн салж гарах бөгөөд Нэг ард түмэн нь нөгөөгөөс хүчтэй ба Том нь багадаа зарцлагдана гэлээ.

²⁴Түүнийг төрөх болоход хэвлийд нь ихэр хүүхэд байжээ.

²⁵Эхнийх нь улаан, бүх бие нь үстэй арьс шиг байсан учир түүнд Есав[58] гэдэг нэр өгчээ.

²⁶Удаах дүү нь Есавын өсгийнөөс гараараа зуурч гарсан учир түүнд Иаков[59] гэдэг нэр өгчээ. Ребека тэднийг төрүүлэхэд Исаак жаран настай байлаа.

²⁷Хөвгүүд өсөж, Есав гарамгай анчин, хээр талын эр, Иаков нь майхандаа суудаг номхон дөлгөөн хүн болжээ.

²⁸Исаак, Есавын агнасан ангийн маханд дуртай учир Есавдаа хайртай харин Ребека нь Иаковтаа хайртай байв.

²⁹Иаковыг шөл буцалгаж байтал Есав хээрээс өлсөж ядран эргэж иржээ.

³⁰Есав Иаковт —Би өлсөж ядарсан учир чи улаан шөлнөөсөө надад идүүлнэ үү? гэжээ. Иймээс Есавыг Едом[60] гэж дуудах болсон юм.

³¹Иаков —Ууган хүү байх эрхээ өнөөдөр надад худалдаач гэсэнд

³²Есав —Би үхэх гэж байна. Ууган хүү байх эрх надад ямар ашигтай юм бэ? гэжээ.

³³Иаков —Өнөөдөр надад тангарагла! гэсэнд Есав түүнд тангараглаж, ууган хүү байх эрхээ Иаковт худалджээ.

³⁴Иаков түүнд зармагны шөл талхтай өгсөнд тэрээр идэж уугаад, босож явлаа. Есав ууган хүү байх эрхээ ингэж үл тоомсорлов.