Read Ariun Bible 2013 – Ариун Библи 2013 Эхлэл 27 Bible Online

Эхлэл 27 - Ariun Bible 2013 – Ариун Библи 2013 bible

Эхлэл 27

¹Исаак хөгширч, нүд нь муудаад харж чадахаа больсон үедээ ууган хүү Есаваа —Хүү минь! гэж дуудсанд хүү нь —Би энд байна гэв.

²Исаак —Харагтун, би хөгширч, үхэх өдрөө мэдэхгүй байна.

³Тиймээс чи зэвсэг, нум саадгаа авч, хээр талд гараад, надад ан агнаж,

⁴миний дуртай амтат хоолыг хийн авчирч надад идүүлэгтүн. Тэгвэл би үхэхээсээ өмнө чамайг зүрх сэтгэлээсээ ерөөе гэв.

⁵Исаакийг хүү Есавдаа үг хэлж байхад Ребека түүнийг нь сонсож байжээ. Есав ан агнахаар хээр тал уруу одов.

⁶Ребека хүү Иаковтаа —Харагтун, ах Есавд чинь аавын чинь хэлсэн үгийг би сонслоо.

⁷“Надад ангийн мах авчирч, амттай хоол хийгтүн. Тэгвэл би идээд, үхэхээсээ өмнө чамайг ЭЗЭНий өмнө ерөөж өгье” гэсэн.

⁸Тиймээс хүү минь, одоо миний чамд тушаасныг болон хэлэхийг минь сонс!

⁹Чи мал дээрээ очоод хоёр сайн ишиг надад авчир. Би түүгээр аавын чинь дуртай амтат хоолыг хийж өгье.

¹⁰Чи түүнийг аавдаа аваачиж идүүлэн, үхэхийнх нь өмнө түүгээр ерөөлгө гэв.

¹¹Иаков эх Ребекадаа —Харагтун, миний ах Есав үсэрхэг хүн, би гөлгөр арьстай хүн.

¹²Аав минь намайг тэмтэрч үзвэл би түүний нүдэнд мэхлэгч гэж харагдан, ерөөгдөх нь байтугай хараагдах болно гэв.

¹³Тэгэхэд эх нь түүнд —Хүү минь, чамд ирэх хараал чинь надад оноогдох болтугай. Чи зөвхөн миний хэлснийг дагаж, явж ишигнүүдийг надад авчирч өг гэсэнд

¹⁴тэр явж, ээждээ авчирч өгөв. Тэгээд ээж нь эцгийнх нь дуртай амтат хоолыг хийжээ.

¹⁵Ребека ууган хүү Есавынхаа хамгийн сайхан хувцсыг гэрээсээ авчирч, бага хүү Иаковтаа өмсгөж,

¹⁶ишигний арьсаар гар болон хүзүүнийх нь гөлгөр хэсгийг ороож,

¹⁷өөрийн хийсэн амтат хоол, талхыг хүү Иаковынхаа гар дээр тавив.

¹⁸Иаков эцэг дээрээ очиж —Аав минь ээ! гэж дуудсанд аав нь —Би энд байна. Хүү минь чи хэн бэ? гэв.

¹⁹Иаков, эцэгтээ —Би таны ууган хүү Есав байна. Таны надад хэлсэн ёсоор би хийлээ. Та өндийж суугаад ангийн махнаас минь зооглоно уу. Тэгээд сэтгэлээсээ намайг ерөөнө үү! гэсэнд

²⁰Исаак, хүүдээ —Хүү минь, чи ангаа яаж ийм хурдан олоо вэ? гэсэнд тэр —Учир нь таны Бурхан ЭЗЭН түүнийг өмнө минь тавьсан юм гэв.

²¹Исаак, Иаковт —Хүү минь, надад ойрт! Би чамайг тэмтэрч үзээд миний ууган хүү Есав мөн үү, биш үү гэдгийг чинь мэдье гэв.

²²Иаков эцэг Исаактаа ойртон очиход Исаак түүнийг тэмтэрч үзээд —Дуу чинь Иаковын дуу атал гар чинь Есавын гар байна гээд

²³түүний гар ах Есавынх шиг нь үсэрхэг байсан учир түүнийг ялгаж таньсангүй. Тэгээд түүнийг ерөөж,

²⁴Исаак —Чи үнэхээр миний хүү Есав мөн үү? гэсэнд Иаков —Би мөн гэв.

²⁵Исаак —Надад түүнийгээ авчир! Би хүүгийнхээ ангийн махнаас идээд зүрх сэтгэлээсээ чамайг ерөөн адислая! гэхэд нь Иаков түүнд авчирч өгсөнд эцэг нь идэв. Тэгээд тэр бас түүнд дарс авчирч өгсөнд тэрээр уужээ.

²⁶Тэгээд эцэг Исаак нь —Хүү минь, надад ойртож ирээд намайг үнс гэхэд

²⁷Иаков ойртон очиж, түүнийг үнссэнд эцэг нь хувцасных нь үнэрийг үнэртээд, түүнийг ерөөн адислаж —Харагтун, хүүгийн минь үнэр ЭЗЭНий ерөөсөн хээрийн үнэр байна.

²⁸Тэнгэрийн шүүдэр, Үржил шимт газар, Арвин их үр тариа, дарсыг Бурхан чамд хайрлах болтугай!

²⁹Ард олон чамд зарагдаж, Үндэстнүүд чамд сөгдөн мөргөх болтугай! Ах дүү нарынхаа эзэн нь чи болж, Эхийн чинь хөвгүүд чамд сөгдөн мөргөх болтугай. Хараагч чинь хараагдаж, Ерөөгч чинь ерөөгдөх болтугай! гэв.

³⁰Исаак Иаковыг ерөөн адислаж дуусмагц Иаков эцэг Исаакийнхаа өмнөөс босон гарч явлаа. Дөнгөж дараа нь түүний ах Есав ангаасаа буцаж ирээд,

³¹амтат хоол хийж түүнийгээ эцэгтээ аваачин —Эцэг минь ээ, өндийж суугаад хүүгийнхээ ангийн махнаас иднэ үү. Тэгээд сэтгэлээсээ намайг ерөөн адислагтун! гэж аавдаа хэлжээ.

³²Эцэг Исаак нь —Чи хэн бэ? гэхэд тэрээр —Би таны хүү, таны ууган хүү Есав байна гэжээ.

³³Исаак ихэд цочирдон —Тэгвэл ан агнаад надад авчирч өгсөн тэр хүн хэн байсан бэ? Би чамайг ирэхээс өмнө бүгдийг нь идээд, түүнийг ерөөсөн билээ. Тэр л гарцаагүй ерөөгдөнө гэв.

³⁴Есав эцгийнхээ үгийг сонсоод бархиран уйлж, эцэгтээ —Эцэг минь, намайг ч бас ерөөн адислаач! гэж аавдаа хэлсэнд

³⁵Исаак —Дүү чинь залилж ирээд чиний ерөөлийг авчихжээ гэж хэлэв.

³⁶Есав —Түүнийг Иаков[62] гэж нэрлэдэг нь оносон бус уу? Тэр намайг хоёр ч удаа мэхэллээ. Ууган хүү байх эрхийг минь авчихаад одоо бас надад ногдох ерөөлийг минь ч тэр авчихлаа гэж хэлээд —Надад хүртээх ерөөл танд үлдээгүй гэж үү? гэсэнд

³⁷Исаак, Есавд хариулан —Харагтун, би түүнийг чиний эзэн болгож, бүх ах дүүг чинь түүнд зарцаар өгч бас үр тариа, дарсаар түүнийг хангасан учир хүү минь, би чамайг одоо яах билээ гэв.

³⁸Есав, эцэгтээ —Эцэг минь ээ! Танд дахиад ганцхан ерөөл байхгүй гэж үү? Эцэг минь! Намайг ч бас ерөөн адислаач гэж хэлээд чанга дуугаар уйлав.

³⁹Эцэг Исаак нь түүнд хандаж —Харагтун, нутаг газар чинь үржил шимгүй, Тэнгэрийн шүүдрээс хол байх юм.

⁴⁰Чи илдээрээ амьдарч, дүүдээ зарагдах боловч Эсэргүүцэн босох[63] цагтаа чи Буулгыг нь эвдэж хүзүүнээсээ авч хаяна гэжээ.

⁴¹Эцэг нь Иаковыг ерөөсөн тэр ерөөлөөс болж Есав, Иаковыг үзэн ядав. “Эцгийнхээ төлөө эмгэнэх өдөр ойрхон ирж байгаа учир би дүү Иаковаа ална” гэж тэрээр зүрхэндээ хэлжээ.

⁴²Ууган хүү Есавынх нь энэ үг Ребекад хүрэхэд бага хүү Иаковтаа хэл явуулж дуудан ирүүлээд —Есав ах чинь чамайг ална гээд өөрийгөө тайтгаруулж байна.

⁴³Тийм учраас одоо хүү минь, чи миний хэлэхийг сонс. Бос, Харанд байгаа миний ах Лабан дээр зугтан оч.

⁴⁴Ахынхаа уурыг гартал хэдэн өдөр түүнтэй хамт бай.

⁴⁵Ахын чинь уур гарч, түүнд хийсэн юмыг марттал нь тэндээ бай. Би чамд хэл явуулж, чамайг тэндээс авчрах болно. Яаж би та хоёрыгоо нэг өдөр алдчих билээ гэв.

⁴⁶Ребека, Исаакт —Хитчүүдийн охидоос болж амьдрал минь гутмаар боллоо. Хэрэв Иаков түүн шиг энэ нутгийн эсвэл хитчүүдийн охидоос эхнэр авбал надад амьд явах хэрэг юун билээ? гэв.