Read Ariun Bible 2013 – Ариун Библи 2013 Эхлэл 28 Bible Online

Эхлэл 28 - Ariun Bible 2013 – Ариун Библи 2013 bible

Эхлэл 28

¹Исаак Иаковыг дуудаад түүнийг ерөөн, захиж —Чи Канааны охидоос эхнэр бүү ав.

²Бос, Паддан-Арам уруу эхийнхээ эцэг Бетуелийн гэр уруу явж, тэнд нагац ах Лабаныхаа охидоос эхнэр ав.

³Төгс Хүчит Бурхан чамайг ерөөж, чамайг үржүүлж бас олшруулж, чи ард түмнүүдийн чуулган болох болтугай.

⁴Абрахамд өгсөн газар буюу чиний цагаачилж суугаа газрыг чамд өвлүүлэхийн тулд Абрахамд өгсөн ерөөлөө чамд болон чамтай хамт чиний үр удамд өгөх болтугай гэв.

⁵Исаак Иаковыг илгээсэнд тэрээр Паддан-Арам уруу явж, арам хүн Бетуелийн хүүгийнд очжээ. Тэр нь Иаков, Есав хоёрын эх Ребекагийн ах Лабан байлаа.

⁶Есавын нүдэн дээр Исаак, Иаковыг ерөөн адислаж, түүнийг Паддан-Арамаас эхнэр авахуулахаар явуулсан ба “Канааны охидоос эхнэр бүү ав” гэж зааварчлан тушаахыг

⁷мөн эх эцэг хоёроо Иаков дуулгавартай дагаж Паддан-Арам уруу явахыг Есав үзлээ.

⁸Бас эцэг Исаакт нь Канааны охид таалагдахгүй байгааг Есав харжээ.

⁹Тиймд Есав, Ишмаел уруу явж, өөрийн эхнэрүүдээс гадна Абрахамын хүү Ишмаелын охин Махалатыг эхнэр болгон авав. Тэр нь Небаиотын охин дүү юм.

¹⁰Иаков, Беершебагаас гараад Харан уруу явав.

¹¹Тэрээр нэгэн газар[64] хүрэхэд нар шингэсэн тул тэндээ хонохоор тэндхийн нэг чулууг авч толгой дороо тавиад хажуулжээ.

¹²Тэрээр зүүдэлсэнд, харагтун, газар дээр нэгэн шат босож, түүний орой нь тэнгэрт тулан бас дахин харвал түүгээр Бурханы тэнгэрэлч нар өгсөж уруудан байлаа.

¹³Тэгтэл, үзэгтүн, ЭЗЭН түүний дээр[65] зогсоод —Би бол ЭЗЭН, чиний эцэг Абрахамын Бурхан, Исаакийн Бурхан байна. Чиний хэвтэж байгаа газрыг Би чамд болон чиний үр удамд өгнө.

¹⁴Чиний үр удам газрын тоос шиг олон болж, баруун, зүүн, хойд, урд зүгт тархана. Чамд болон чиний үр удамд дэлхийн бүх овгийн ерөөл байх болно.[66]

¹⁵Харагтун, Би чамтай хамт байж, хаана ч явсан чамайг хамгаалан, чамайг дагуулж, энэ нутагт буцааж авчирна. Би чамд амласнаа биелүүлэх хүртэл чамайг орхихгүй гэж айлджээ.

¹⁶Иаков нойрноосоо сэрээд —ЭЗЭН үнэхээр энэ газарт байна. Харин би мэдсэнгүй гэв.

¹⁷Тэрээр айн сүрдэж —Энэ яасан сүрдмээр газар вэ! Энэ бол гарцаагүй Бурханы өргөө төдийгүй тэнгэрийн хаалга юм гэв.

¹⁸Тэгээд Иаков өглөө эрт босож, дэрлэсэн чулуугаа авч багана болгон босгоод дээр нь тос асгав.

¹⁹Энэ газрыг Бетел[67] хэмээн тэрээр нэрлэжээ. Тэр хотыг өмнө нь Луз гэдэг байж.

²⁰Иаков андгайлан —Хэрэв Бурхан надтай хамт байж, миний явж буй энэ замд намайг хамгаалан бас надад идэх хоол, өмсөх хувцас өгөөд,

²¹намайг эцгийн минь гэрт амар тайван буцааж, ЭЗЭН миний Бурхан байвал

²²багана болгон босгосон энэ чулуу минь Бурханы өргөө болох болно. Таны надад өгөх бүхний аравны нэгийг би Танд өргөнө гэлээ.