Read Ariun Bible 2013 – Ариун Библи 2013 Эхлэл 29 Bible Online

Эхлэл 29 - Ariun Bible 2013 – Ариун Библи 2013 bible

Эхлэл 29

¹Иаков босож яваад, дорнынхны нутагт хүрчээ.

²Түүний хартал, үзэгтүн, талд нэгэн худаг бас дэргэд нь гурван хэсэг хонин сүрэг хэвтэж байв. Учир нь хоньчид тэр худгаас хонио усалдаг аж. Худгийнхаа амыг чулуугаар дараад,

³бүх сүргийг цуглах үед худгийн амнаас чулууг өнхрүүлэн зайлуулж хонио услаад дараа нь уг чулуугаа худгийн амсар дээр буцаан тавьдаг байжээ.

⁴Иаков тэдэнд —Ах дүү нар минь, нутаг хаана вэ? гэж асуусанд тэд —Бид Хараных гэжээ.

⁵Иаков тэднээс —Та нар Нахорын ач хүү Лабаныг таних уу? гэхэд тэд —Бид танина гэв.

⁶Иаков тэдэнд —Тэр сайн уу? гэсэнд тэд —Сайн. Түүний охин Рахел одоо хонио туугаад ирнэ гэж хариулав.

⁷Иаков —Харагтун, өдөр яагаа ч үгүй байна. Мал сүрэг цуглах цаг болоогүй байна. Хонио услаад, бэлчээрт гарга гэлээ.

⁸Тэд —Бүх сүргийг цуглахаар хоньчид худгийн амнаас чулууг өнхрүүлэн зайлуулсны дараа бид хонио усалдаг тул одоо чадахгүй гэв.

⁹Иаковыг тэдэнтэй ярьж байхад Рахел эцгийнхээ хонийг тууж ирлээ. Тэрээр хоньчин байжээ.

¹⁰Иаков, нагац ах Лабаны охин Рахел болон нагац ах Лабаны хонийг хараад ойртон очиж, худгийн амнаас чулууг өнхрүүлэн зайлуулаад нагац ах Лабаныхаа хонин сүргийг услав.

¹¹Тэгээд Иаков Рахелыг үнсээд чанга дуугаар уйлан,

¹²Рахелд өөрийгөө эцгийнх нь дүү Ребекагийн хүү болохоо мэдүүлтэл тэрээр гүйн очиж эцэгтээ мэдүүлэв.

¹³Тэгтэл Лабан охин дүүгийнхээ хүү Иаковын тухай мэдээг сонсоод, түүнтэй уулзахаар гүйн очиж, тэврэн үнсээд гэртээ дагуулан оров. Иаков бүх зүйлээ Лабанд ярьжээ.

¹⁴Лабан түүнд —Чи бол яах аргагүй миний яс махны тасархай мөн гэв. Тэгээд Иаков түүнтэй нэг сар хамт суужээ.

¹⁵Лабан, Иаковт —Чи миний дүү гээд надад зүгээр л зарагдах гэж үү? Юугаар чамд хөлс төлөх вэ? Надад хэлээч гэв.

¹⁶Лабан хоёр охинтой бөгөөд томынх нь нэр Леа, багынх нь нэр Рахел.

¹⁷Леа хараа муутай,[68] харин Рахел нь нуруу гоолиг, царай үзэсгэлэнтэй ажээ.

¹⁸Иаков Рахелд дурласан тул —Би таны бага охин Рахелын төлөө долоон жил танд зарцлагдъя гэсэнд

¹⁹Лабан —Түүнийг өөр хүнд өгснөөс чамд өгсөн нь дээр. Надтай хамт бай гэжээ.

²⁰Иаков Рахелын төлөө долоон жил Лабанд зарцлагджээ. Иаков түүнд хайртай байсан тул долоон жил нь түүнд хэдхэн хоног мэт байв.

²¹Иаков Лабанд —Миний зарцлагдах хугацаа дууссан учир Би түүн дээр оръё. Эхнэрийг минь өгөгтүн! гэв.

²²Лабан тэр нутгийн бүх эрчүүдийг цуглуулан найр хийлээ.

²³Үдэш нь Лабан тэнд охин Леагаа авчирсанд Иаков түүн дээр оржээ.

²⁴Лабан зарц бүсгүй Зилпагаа охин Леадаа шивэгчин болгон өгчээ.

²⁵Иаков өглөө нь хартал тэнд нь Леа байв. Тэгээд тэрээр Лабанд —Та надад юу хийчихэв ээ? Би Рахелын төлөө танд зарцлагдсан биш үү? Та юунд намайг мэхэлнэ вэ? гэхэд

²⁶Лабан —Манай нутагт эгчээс нь түрүүлж дүүг нь өгөх ёс байхгүй.

²⁷Ёсолсонтойгоо долоо хоногийг гүйцээ. Тэгээд бид чамд нөгөөг нь бас өгнө. Чи түүний төлөө надад дахин долоон жил зарцлагдах болно гэв.

²⁸Тэгээд Иаков хэлсэн ёсоор нь хийжээ. Иаков тэр долоо хоногийг гүйцээсэнд Лабан түүнд охин Рахелаа ч эхнэр болгон өгчээ.

²⁹Лабан зарц бүсгүй Билхагаа охин Рахелдаа шивэгчнээр өглөө.

³⁰Иаков бас Рахел дээр орж, түүнийг Леагаас илүү хайрлан, дахин долоон жил Лабанд зарцлагджээ.

³¹Леа хайр хүртээгүйг ЭЗЭН үзээд Леагийн умайг нээв. Харин Рахел нь хүүсэр байжээ.

³²Леа жирэмсэлж хүү төрүүлээд, түүнийгээ Реубен[69] гэж нэрлэв. Тэгээд тэрээр —ЭЗЭН, миний зовлон зүдүүрийг харсан учир одоо миний нөхөр намайг хайрлах болно гэж хэлжээ.

³³Тэр бас дахин жирэмсэлж хүү төрүүлээд —Хайр хүртээгүйг минь ЭЗЭН сонсоод надад энэ хүүг бас өглөө гээд түүнийгээ Симеон[70] гэж нэрлэжээ.

³⁴Тэр бас жирэмсэлж дахин хүү төрүүлээд —Би түүнд гурван хүү төрүүлж өгсөн учир миний нөхөр одоо надтай холбогдох болно гээд түүнийгээ Леви[71] гэжээ.

³⁵Тэр бас жирэмсэлж, дахин хүү төрүүлээд —Энэ удаа би ЭЗЭНийг магтана гээд түүнийгээ Иуда[72] гэв. Тэгээд түүний хүүхэд төрүүлэх нь зогсжээ.