Read Ariun Bible 2013 – Ариун Библи 2013 Эхлэл 30 Bible Online

Эхлэл 30 - Ariun Bible 2013 – Ариун Библи 2013 bible

Эхлэл 30

¹Рахел өөрөө Иаковт хүү төрүүлж чадаагүйгээ хараад эгчдээ атаархаж, Иаковт —Хүү өг. Хэрэв тэгэхгүй бол би үхнэ гэжээ.

²Иаков, Рахелд уурлан —Чамд умайн үрийг эс зөвшөөрсөн Бурханыг би орлох хэрэг үү? гэсэнд

³Рахел —Энд миний шивэгчин Билха байна. Түүн дээр ор! Тэр миний өвдөг дээр төрж, түүгээр би хүүхэдтэй болно гээд

⁴өөрийн шивэгчин Билхаг түүнд татвар эм болгон өгчээ. Иаков түүн дээр оржээ.

⁵Билха жирэмсэлж Иаковт хүү төрүүлж өгөв.

⁶Рахел —Бурхан намайг зөвтгөж миний дууг сонсоод надад хүү хайрлалаа гээд түүнийг Дан[73] гэж нэрлэжээ.

⁷Рахелын шивэгчин Билха дахин жирэмсэлж, Иаковт хоёр дахь хүүгээ төрүүлж өгөв.

⁸Рахел —Би эгчтэйгээ ширүүн өрсөлдөж дийллээ гээд түүнд Нафтали[74] гэдэг нэр өгчээ.

⁹Леа хүүхэд төрүүлэхийг больсноо хараад, шивэгчин Зилпагаа авч Иаковт татвар эм болгон өгчээ.

¹⁰Леагийн шивэгчин Зилпа, Иаковт хүү төрүүлж өгөв.

¹¹Леа —Ямар азтай вэ? гээд түүнийг Гад[75] гэж нэрлэжээ.

¹²Леагийн шивэгчин Зилпа Иаковт хоёр дахь хүүгээ төрүүлж өгчээ.

¹³Леа —Би баяр хөөртэй байна. Эмэгтэйчүүд намайг аз жаргалтай гэж дуудах болно гээд түүнийг Ашер[76] гэж нэрлэжээ.

¹⁴Буудай хураах үеэр Реубен гадагш гарч, талбайгаас хүндэс[77] олоод, ээж Леадаа авчирч өгчээ. Рахел Леад —Хүүгийнхээ олсон хүндэснээс надад өгөөч? гэв.

¹⁵Леа түүнд —Миний нөхрийг авсан чинь багадаа юу? Чи бас миний хөвгүүний хүндсийг авах нь уу? гэв. Рахел —Тэгвэл таны хүүгийн хүндэсний оронд өнөө шөнө миний нөхөр тантай унтаж болно гэв.

¹⁶Иаковыг талбайгаасаа үдэш эргэж ирэхэд Леа түүнтэй уулзахаар гараад түүнд —Хүүгийнхээ хүндсээр би таныг зольж авсан учир өнөө шөнө над дээр орох ёстой гэв. Тэгээд тэр шөнө Иаков түүнтэй унтжээ.

¹⁷Бурхан, Леаг сонссон учир Леа жирэмсэлж тав дахь хүүгээ Иаковт төрүүлж өгөв.

¹⁸Леа —Би шивэгчнээ нөхөртөө өгсөн тул Бурхан хөлсийг нь надад өглөө гээд түүний нэрийг Иссахар[78] гэжээ.

¹⁹Леа дахин жирэмсэлж зургаа дахь хүүгээ Иаковт төрүүлж өгөв.

²⁰Леа —Бурхан надад сайхан бэлэг өглөө. Би нөхөртөө зургаан хүү төрүүлж өгсөн учир тэрээр надтай хамт амьдрах болно гээд түүнийг Зебулун[79] гэж нэрлэжээ.

²¹Дараа нь тэрээр охин төрүүлээд түүнийг Дина гэж нэрлэв.

²²Бурхан Рахелыг дурсан санаж, түүнийг сонсоод умайг нь нээж өгчээ.

²³Тэгээд тэрээр жирэмсэлж хүү төрүүлээд —Бурхан миний ичгүүрийг арилгаж өглөө хэмээн

²⁴хүүгээ Иосеф[80] гэж нэрлээд —ЭЗЭН надад бас нэг хүү нэмж өгөх болтугай! гэжээ.

²⁵Рахел Иосефыг төрүүлэх үед Иаков Лабанд —Намайг явуулаач. Намайг өөрийн нутаг, эх оронд минь буцаагаач!

²⁶Миний танд зарцлагдаж байгаад авсан эхнэр, хүүхдүүдийг минь надад өгч, намайг явуулаач! Танд хэрхэн зарцлагдсаныг минь та мэднэ шүү дээ гэв.

²⁷Лабан түүнд —ЭЗЭН чиний төлөө намайг ерөөснийг би зөн совингоороо мэдсэн. Хэрэв би тааллыг чинь олсон бол

²⁸чи ажлын хөлсөө өөрөө тогтоо. Би өгье гэж хэлэв.

²⁹Иаков түүнд —Би танд хэрхэн зарцлагдсаныг болон над дээр таны мал сүрэг ямар болсныг та мэднэ шүү дээ.

³⁰Намайг ирэхийн өмнө таны эд хөрөнгө бага байсан, одоо үлэмж өсөн нэмэгдлээ. Алхам бүрд минь[81] ЭЗЭН таныг ерөөсөн. Би одоо хэзээ өөрийнхөө гэр орны төлөө ажиллах юм бэ? гэв.

³¹Лабан —Би чамд юу өгөх вэ? гэсэнд Иаков —Надад юу ч бүү өг! Хэрэв миний төлөө энэ зүйлийг хийвэл би таны мал сүргийг дахин хариулж хамгаалъя.

³²Өнөөдөр би таны хонин сүргийн дундуур явж алаг, цоохор, хар хоньд бас алаг, цоохор ямаануудыг ялган авна. Тэдгээр нь миний хөлс болно.

³³Дараа нь та хөлсний талаар намайг шалгах гэж ирэхэд миний үнэнч шударга байдал намайг гэрчилж батлах болно. Ямаан сүргийн дунд алаг болон цоохор биш ямаа, хонин сүргийн дунд хар биш хонь байвал бүгдийг нь намайг хулгайлсанд тооцоорой гэсэнд

³⁴Лабан —За, чиний хэлсэн ёсоор болъё! гэв.

³⁵Лабан тэр өдрөө алаг, цоохор эр ямаа мөн харлаг, хар цоохор эм ямаа, хар хоньдыг ялган, хөвгүүдийнхээ гарт өгчээ.

³⁶Тэрээр Иаковаас гурав хоногийн зайтай газар бууж, Иаков Лабаны үлдсэн хонин сүргийг хариулсаар байлаа.

³⁷Иаков бургас, гүйлс, уянгат модны залуу ногоон мөчрийг аваад, хальсыг нь хуулан, цагаан судал гаргажээ.

³⁸Тэрээр хальсыг нь хуулсан мөчрүүдээ худгийнхаа онгоцнуудын дэргэд босгож, ус уухаар ирсэн хонины эгц өмнө нь байхаар тохируулжээ. Хоньд ус уух үед

³⁹мөчрийн өмнө хээл авсан тэдгээр хоньд алаг, эрээн цоохор хурга гаргажээ.

⁴⁰Иаков хургануудыг ялгаж, Лабаны хонин сүргээс алаг, хар зүсмийн хоньдыг Лабаны сүргийн нөгөө талд нь ялгав. Өөрийнхөө сүргийг Лабаны сүрэгтэй холилдуулалгүй тусгаарлав.

⁴¹Тарга хүчтэй хоньд хээл авах үед Иаков сүргийн нүдний өмнө, онгоцонд нөгөө мөчрөө тавьж, тэдгээр хоньд мөчрийн дэргэд хээлтдэг байжээ.

⁴²Харин хоньд тарга хүчгүй байвал нөгөө мөчрөө тавьдаггүй байв. Ингээд тарга хүчгүй хонь нь Лабаных болж, тарга хүчтэй хонь нь Иаковынх болжээ.

⁴³Ингэж тэр хүн арвинаас арвин хөрөнгө, олон мал сүрэг, эрэгтэй эмэгтэй зарц нар, тэмээ бас илжигтэй болжээ.