Read Ariun Bible 2013 – Ариун Библи 2013 Эхлэл 31 Bible Online

Эхлэл 31 - Ariun Bible 2013 – Ариун Библи 2013 bible

Эхлэл 31

¹Лабаны хөвгүүд —Бидний эцгийн бүх хөрөнгийг Иаков авчээ. Тэрээр манай аавын бүхий л хөрөнгөөр ийм баян чинээлэг болжээ гэж ярихыг Иаков сонсов.

²Иаков Лабаны царайг хараад тэрээр өөрт нь урьдынхтай адилгүй хандаж байгааг ажиглав.

³ЭЗЭН, Иаковт —Чи эцэг өвгөдийнхөө нутаг, төрөл садан уруугаа буцаж яв. Би чамтай хамт гэлээ.

⁴Иаков хэл явуулж, Рахел Леа хоёрыг сүргийнхээ бэлчээрт дуудаж ирүүлээд

⁵тэдэнд хэлэхдээ —Эцэг чинь надад өчигдөр уржигдарынх шигээ ч байхаа больсныг би царайнаас нь харж байна. Харин миний эцгийн Бурхан надтай хамт байсан.

⁶Намайг эцэгт чинь хамаг хүчээрээ зүтгэснийг та нар мэднэ.

⁷Гэвч эцэг чинь намайг мэхэлж, миний авах хөлсийг арван удаа өөрчилсөн билээ. Гэсэн хэдий ч надад муу юм хийхийг Бурхан түүнд зөвшөөрөөгүй.

⁸Тэрээр “Цоохор зүсмийнх нь чиний хөлс болно” гэсэн тул бүх сүрэг цоохор зүсмийн төл гаргасан. Тэрээр “Алаг зүсмийнх нь чиний хөлс болно” гэсэн тул бүх сүрэг нь алаг зүсмийн төл гаргасан.

⁹Ингэж л Бурхан та нарын эцгийн малыг авч надад өгөв.

¹⁰Ямаан сүрэг хээл авах үед би зүүдэндээ нүд өргөн харахад, хээлтүүлэгч ухна болгон алаг, цоохор, тарлан зүстэй байлаа.

¹¹Бурханы тэнгэрэлч зүүдэнд минь —Иаков! хэмээсэнд —Би энд байна гэж би хариулсан. —

¹²Чи нүдээ өргөн хар! Хээлтүүлэгч хуц болгон алаг, цоохор, тарлан зүстэй байна. Учир нь Лабаны чамд хийсээр ирсэн бүх зүйлийг би харсан.

¹³Би Бетелийн Бурхан байна. Чи тэнд дурсгалын багананд тос асгаж, тэнд Надад ам өчиг өгсөн билээ. Тиймээс одоо босож, энэ газрыг орхин төрсөн нутагтаа буц! гэлээ.

¹⁴Рахел Леа хоёр түүнд —Эцгийн гэрээс бидэнд ногдох ямар нэгэн өмч эсвэл хувь бий гэж үү?

¹⁵Тэр биднийг харийнхан гэж тооцдог биш үү? Учир нь тэрээр биднийг худалдаж, бас бидний бүх мөнгийг үрсэн.

¹⁶Эцгээс маань Бурханы авсан бүх хөрөнгө биднийх бөгөөд бидний үр хүүхдүүдийнх учир танд Бурханы хэлсэн бүхнийг хийтүгэй! гэв.

¹⁷Иаков босож, эхнэр хүүхдээ тэмээ унуулж,

¹⁸өөрийн олсон бүх мал сүрэг хөрөнгөө буюу Паддан-Арамаас олсон бүх мал сүргээ туугаад Канаан нутагтаа, эцэг Исаакдаа очихоор хөдлөв.

¹⁹Тэр үед Лабаныг хонио хяргахаар явсан хойгуур нь Рахел аавынхаа гэрийн шүтээнүүдийг хулгайлан авчээ.

²⁰Иаков оргон зугтахаа арам хүн Лабанд хэлэлгүй, түүнийг мэхэлжээ.

²¹Тэрээр хамаг хөрөнгөө аваад Евфрат мөрнийг гатлан зугтаж, Гилеадын уулархаг нутгийг зорив.

²²Иаковын зугтсаныг түүнээс хойш гурав хоногийн дараа Лабан дуулаад,

²³ах дүү нараа дагуулан, түүний хойноос долоо хоног мөшгөн хөөж, Гилеадын уулархаг нутагт түүнийг гүйцэн иржээ.

²⁴Шөнө нь арам хүн Лабаны зүүдэнд Бурхан хүрч ирээд —Чи болгоомжил, Иаковт сайн муу юу ч битгий хэл! гэжээ.

²⁵Лабан Иаковыг гүйцэн очиход Иаков ууланд майхнаа босгосон байв. Лабан, ах дүү нарынхаа хамт Гилеад ууланд майхнаа босгов.

²⁶Лабан, Иаковт —Чи надад мэдэгдэлгүйгээр охидыг минь илдээр барьж авсан олзлогдогсод шиг авч яваад яаж байгаа чинь энэ вэ?

²⁷Чи яагаад хэлэлгүй сэмхэн зугтаж, намайг мэхлэв? Би чамайг баяр хөөр, ая дуу, бөмбөр, ятгын эгшгээр үдэх байсан.

²⁸Чи миний зээ нар, охидыг минь надад үнсүүлсэнгүй. Чи мунхаг зүйл хийлээ.

²⁹Чамайг дөнгөх чадал надад бий. Харин өнгөрсөн шөнө эцгийн чинь Бурхан надад “Болгоомжил, Иаковт сайн муу юу ч битгий хэл” гэсэн.

³⁰Чи эцгийнхээ гэрийг ихэд хүсэн санагалзсан учир одоо чиний явах нь зөв. Харин чи юунд миний бурхдыг хулгайлсан юм бэ? гэв.

³¹Иаков, Лабанд —Таныг охидоо надаас булаан авч магадгүй гэж бодсон учир би айсан юм.

³²Таны бурхад хэнээс олдоно, тэр хүн амьд байх ёсгүй. Ах дүүсийн маань өмнө миний зүйлсээс өөрийнхөө юмыг олж танивал та түүнийгээ аваарай гэжээ. Учир нь тэднийг Рахел хулгайлсныг Иаков мэдээгүй байв.

³³Лабан, Иаковын майхан, Леагийн майхан бас хоёр шивэгчний майханд орсон боловч юм олсонгүй. Тэрээр Леагийн майхнаас гараад, Рахелын майханд оржээ.

³⁴Рахел тэрхүү гэрийн шүтээнүүдийг тэмээний тохшин доор хийгээд, түүн дээрээ суужээ. Лабан бүх майхныг нэгжсэн боловч олсонгүй.

³⁵Рахел, эцэгтээ —Эзэн минь, би бүсгүй шалтагтай тул таныг босон угтаж чадаагүйд минь бүү уурлаарай гэжээ. Лабан гэрийн шүтээнүүдээ эрсэн боловч олсонгүй.

³⁶Иаков уурлаж, Лабантай маргалдав. Иаков, Лабанд —Би ямар гэмт үйлдэл хийсэн юм бэ? Намайг ямар нүгэлтэй гэж та халуун мөрөөр минь мөшгөөд байгаа юм бэ?

³⁷Та хамаг юмыг минь нэгжээд гэрийнхээ ямар юмыг олов? Түүнийгээ энд миний ах дүү нар болон өөрийнхөө ах дүү нарын өмнө гаргаж тавь. Тэгээд бид хоёрын хэргийг шийдэг.

³⁸Би хорин жил тантай хамт байлаа. Танай эм хонь, эм ямаа хээл хаяагүй. Бас танай сүргийн ирэгнээс би идээгүй.

³⁹Сэгчүүлж тасчуулсныг нь танд авчралгүй би өөрөө түүнийг нөхсөн. Өдөр ч хулгайлагдсан бай, шөнө ч хулгайлагдсан бай түүнийг төлөхийг надаас та нэхэж байсан.

⁴⁰Би өдрийн халуунд халж, шөнийн хүйтэнд хөрч, нүд цавчилгүй тийнхүү өнгөрөөж байсан билээ.

⁴¹Би танайд хорин жил суулаа. Би таны хоёр охины төлөө арван дөрвөн жил, таны мал сүргийн төлөө зургаан жил танд зарагдлаа. Энэ завсар та миний хөлсийг арван удаа өөрчилсөн.

⁴²Хэрэв миний эцгийн Бурхан, Абрахамын Бурхан, Исаакийн Эмээгч нь надтай хамт байгаагүйсэн бол өдийд та намайг гар хоосон буцаах байж дээ. Харин Бурхан гарын минь зүтгэл, зовлон зүдүүрийг үзээд өчигдөр шөнө таныг зэмлэжээ хэмээв.

⁴³Лабан, Иаковт —Энэ охид бол миний охид, энэ хүүхдүүд бол миний хүүхдүүд, энэ хонин сүрэг бол миний хонин сүрэг. Чиний харж байгаа юм бүхэн минийх. Өнөөдөр би охидоо, тэдний төрүүлсэн үр хүүхдүүдийг яах юм бэ?

⁴⁴Одоо нааш ир! Хоёулаа хоорондоо гэрээ байгуулъя. Тэр нь чи бид хоёрын хооронд гэрч болог гэв.

⁴⁵Иаков нэг чулуу аваад багана болгон босгожээ.

⁴⁶Тэрээр ах дүү нартаа —Чулуу цуглуул гэсэнд тэд чулуу цуглуулж овоо босгоод, овооныхоо дэргэд хооллоцгоожээ.

⁴⁷Лабан тэр овоогоо Иегар-сахадута[82] гэж нэрлэхэд Иаков ч бас түүнийг Галеед[83] гэж нэрлэжээ.

⁴⁸Лабан —Энэ овоо өнөөдөр чи бид хоёрын хоорондын гэрч болно гэв. Тийм учраас түүнийг Галеед гэж нэрлэдэг байжээ.

⁴⁹Бас Мизпа ч[84] гэж нэрлэдэг байжээ. Учир нь тэрээр “Бид хоёрын хэн хэн нь байхгүй байхад ЭЗЭН чи бид хоёрын хоорондохыг харах болтугай” гэсэн ажээ.

⁵⁰Хэрэв чи миний охидтой зүй бусаар харьцаж эсвэл миний охидоос өөр эхнэр авбал бидэнтэй хамт өөр хүн байхгүй ч гэсэн, харагтун, Бурхан чи бид хоёрын хооронд гэрч болно гэв.

⁵¹Лабан дахин Иаковт хандаж —Чи бид хоёрын хооронд миний босгосон энэ овоог хар. Бас энэ баганыг хар.

⁵²Энэ овоо ч гэрч, энэ багана ч гэрч болно. Би чамд муу юм хийх гэж энэ овоог давахгүй. Чи надад муу юм хийх гэж энэ овоо болон баганыг давахгүй.

⁵³Абрахамын Бурхан, Нахорын Бурхан,[85] тэдний өвөг дээдсийн Бурхан, бидний хоорондохыг шийдэг гэсэнд Иаков, эцэг Исаакийнхаа Эмээгчээр тангараглав.

⁵⁴Иаков бас уулан дээр тахил тахиад, ах дүү нараа дуудаж хооллов. Тэд хоолоо идэж, уулан дээр хоноцгоожээ.

⁵⁵Лабан өглөө эртлэн босоод зээ нараа, охидоо үнсэж ерөөгөөд нутагтаа эргэн одлоо.