Read Ariun Bible 2013 – Ариун Библи 2013 Эхлэл 33 Bible Online

Эхлэл 33 - Ariun Bible 2013 – Ариун Библи 2013 bible

Эхлэл 33

¹Иаковыг нүдээ өргөн хартал, Есав дөрвөн зуун хүнийг дагуулан ирж яваа харагдлаа. Иймээс тэрээр хүүхдүүдээ Леа, Рахел болон хоёр шивэгчиндээ хувааж өгөөд,

²шивэгчингүүд болон тэдний хүүхдүүдийг өмнө нь, Леаг хүүхдүүдтэй нь хамт дараа нь, Рахел Иосеф хоёрыг хойно нь оруулав.

³Харин Иаков өөрөө тэдний өмнө гарч, долоон удаа газарт мөргөөд, ах Есавдаа дөхөж очив.

⁴Есав гүйж ирэн түүнийг тэврэн хүзүүдэж үнсээд, хоёулаа уйлалдав.

⁵Есав хараагаа өргөн, эмэгтэйчүүд, хүүхдүүдийг олж хараад —Чамтай хамт яваа энэ хүмүүс юун улс вэ? гэсэнд Иаков —Бурханаас таны зарц надад энэрэн нигүүлсэж өгсөн хүүхдүүд гэв.

⁶Тэгэхэд зарц бүсгүйчүүд нь хүүхдүүдийнхээ хамт хүрч ирээд сөгдөн мөргөв.

⁷Леа ч бас хүүхдүүдийнхээ хамт хүрч ирээд сөгдөн мөргөв. Иосеф дараа нь Рахелтай хамт хүрч ирээд сөгдөн мөргөв.

⁸Есав —Надтай дайралдсан энэ бүх сүрэг чинь ямар учиртай юм бэ? гэсэнд Иаков —Эзэн таны таалалд багтах гэснийх билээ гэж хэлэв.

⁹Есав —Дүү минь ээ! Надад байгаа юм хангалттай. Чи өөрийнхөө юмыг өөртөө байлга гэв.

¹⁰Иаков —Үгүй. Хэрэв би таны таалалд багтсан бол энэ бэлгийг гараас минь авна уу? Тэгээд ч тантай нүүр тулах нь Бурхантай нүүр тулах мэт ажээ. Та ч намайг таалсан билээ.

¹¹Бурхан надад нигүүлсэнгүй хандсан бөгөөд миний эд хөрөнгө хангалттай учир танд зориулж авчирсан бэлгийг минь хүлээн авна уу? гэж хичээнгүйлэн гуйсанд Есав зөвшөөрчээ.

¹²Тэгээд Есав —Хөдөлцгөөе! Би чиний өмнө явъя гэв.

¹³Иаков түүнд —Хүүхдүүд минь сул дорой, мал сүрэг маань нялх төлтэй. Хэрэв нэг өдөр ширүүн туувал мал сүрэг бүгдээрээ үхнэ гэдгийг эзэн та мэдэх буй заа.

¹⁴Эзэн минь та зарц надаас түрүүлээд явна уу? Сеирт эзэн тан дээр хүрч очтол, би өмнөө яваа мал сүрэг, хүүхдүүдийнхээ аясыг тааруулж, аажуу уужуу явъя гэв.

¹⁵Есав —Би хамт яваа хүмүүсийнхээ заримыг чамтай үлдээе гэхэд Иаков —Яах юм бэ? Эзэн таны тааллыг олбол[89] л боллоо гэв.

¹⁶Есав тэр өдөртөө Сеир уруу буцах замдаа гарав.

¹⁷Тэгээд Иаков Суккотод очоод, тэнд өөртөө байшин, малдаа саравч барьсан учир тэр газрыг Суккот[90] гэж нэрлэх болжээ.

¹⁸Иаков Паддан-Арамаас Канаан нутгийн Шехем хотод амар тайван хүрч ирээд, хотын өмнө талд майхнаа барив.

¹⁹Тэрээр майхнаа барьсан тэр талбайн хэсгийг Шехемийн эцэг Хаморын хүүхдүүдийн гараас зуун мөнгөн зоосоор арилжин авч,

²⁰тэндээ тахилын ширээ босгоод түүнийгээ Ел-Елохе-Израиль[91] гэж нэрлэжээ.