Read Ariun Bible 2013 – Ариун Библи 2013 Эхлэл 35 Bible Online

Эхлэл 35 - Ariun Bible 2013 – Ариун Библи 2013 bible

Эхлэл 35

¹Бурхан, Иаковт —Чи босоод Бетел уруу яв, тэнд суурьш. Тэгээд Есав ахаасаа нүүр буруулан зугтаж байсан тэр үед чамд үзэгдсэн Бурханд зориулан тэндээ тахилын ширээ босго гэв.

²Иаков гэрийнхэн болон хамт байгаа бүх хүмүүстээ —Та нар өөрсдөдөө байгаа харийн бурхдаа хаяж, биесээ цэвэрлэн, хувцсаа сольцгоо!

³Бүгдээрээ босож, Бетел уруу явцгаая. Миний шаналант өдөр надад хариу өгч, хаана ч явсан надтай хамт байсан Бурханд зориулж, тахилын ширээг тэнд би босгоно гэж хэлэв.

⁴Тэд гартаа байсан хамаг харийн бурхад, чихэндээ байсан ээмгүүдээ Иаковт өгчээ. Иаков тэдгээрийг нь Шехемийн ойролцоох царс модны доор булав.

⁵Тэд хөдөлсөн бөгөөд тэдний эргэн тойрон дахь бүх хот дээр Бурханы сүрдүүлгэ байсан тул Иаковын хөвгүүдийн хойноос хэн ч мөрдөн хөөсөнгүй.

⁶Иаков болон түүнтэй хамт байсан бүх хүн Канаан нутаг дахь Луз буюу Бетелд хүрч ирлээ.

⁷Тэрээр тэндээ тахилын ширээ босгож, уг газрыг Ел-бетел гэж нэрлэжээ. Учир нь Иаковыг ахаасаа зугтаж байсан тэр үед тэнд Бурхан Өөрийгөө түүнд илчилжээ.

⁸Ребекагийн асрагч эх Дебора үхэж, түүнийг Бетелээс доохно царс модны доор оршуулав. Тэгээд тэр модыг Аллон-бакут гэж нэрлэв.

⁹Иаковыг Паддан-Арамаас ирж явахад нь Бурхан түүнд дахин үзэгдэж, түүнийг ерөөв.

¹⁰Бурхан түүнд —Чамайг Иаков гэдэг, Үүнээс хойш чамайг Иаков гэж дуудахгүй, Харин чиний нэр Израиль болно гээд түүнийг Израиль гэж нэрлэжээ.

¹¹Бурхан түүнд —Би Төгс Хүчит Бурхан байна. Чи үржигтүн, олшрогтун! Үндэстэн, олон үндэстэн чамаас гарч, Хаад бас чамаас төрж гарах болно.

¹²Би Абрахам Исаак нарт өгсөн тэр газраа чамд бас өгнө. Би бас чамаас хойших чиний үр удамд ч тэр газрыг өгнө гэв.

¹³Бурхан түүнтэй ярьж байсан газартаа түүнийг орхин, дээш одов.

¹⁴Өөртэй нь Бурханы ярьсан тэр газарт Иаков нэгэн багана буюу чулуун багана босгоод, дээр нь ундаан өргөл, тос цутгажээ.

¹⁵Өөртэй нь Бурханы ярьсан тэр газрыг Бетел гэж Иаков нэрлэв.

¹⁶Тэднийг Бетелээс хөдлөөд Ефратад хүрэхээс арай өмнөхөн Рахел төрөх болж, хүчтэй өвджээ.

¹⁷Түүнийг хүндрэлтэйгээр төрөх үед эх баригч нь —Битгий ай. Та одоо бас нэг хүүтэй боллоо гэж хэлэв.

¹⁸Тэрээр нас эцэслэж, амь тавихдаа хүүгээ Бен-они[93] гэж нэрлэжээ. Харин эцэг нь түүнийг Бениамин[94] гэж нэрлэв.

¹⁹Рахел нас барж, түүнийг Ефрат (Бетлехем) орох зам дээр оршуулав.

²⁰Иаков түүний булшин дээр хөшөө босгосон бөгөөд тэр нь одоо хүртэл Рахелын булшны хөшөө гэж нэрлэгдсээр байна.

²¹Израиль дахин цааш хөдөлж Едерийн цамхгийг өнгөрөөд майхнаа босгов.

²²Израилийг тэр газар сууж байх үед Реубен явж, эцгийнхээ татвар эм Билхатай унтав. Израиль түүнийг нь сонсжээ.[95] Иаков арван хоёр хүүтэй байв.

²³Леагийн хөвгүүд гэвэл, Иаковын ууган хүү Реубен, дараа нь Симеон, Леви, Иуда, Иссахар, Зебулун билээ.

²⁴Рахелын хөвгүүд нь Иосеф, Бениамин хоёр билээ.

²⁵Рахелын шивэгчин Билхагийн хөвгүүд нь Дан, Нафтали хоёр билээ.

²⁶Леагийн шивэгчин Зилпагийн хөвгүүд нь Гад, Ашер хоёр билээ. Тэд бол Паддан-Арамд төрсөн Иаковын хөвгүүд болно.

²⁷Тэгээд Иаков Кириат-арбагийн Мамре уруу явж, эцэг Исаактаа очив. Кириат-арба гэдэг нь Абрахам, Исаак хоёрын сууж байсан Хеброн билээ.

²⁸Тэгэхэд Исаак зуун наян настай байжээ.

²⁹Өндөр насыг насалж өтөлсөн Исаак амьсгал хураан нөгчөөд, өөрийнхөндөө нийлсэнд хүү Есав Иаков хоёр нь түүнийг оршуулжээ.