Read Ariun Bible 2013 – Ариун Библи 2013 Эхлэл 39 Bible Online

Эхлэл 39 - Ariun Bible 2013 – Ариун Библи 2013 bible

Эхлэл 39

¹Иосеф Египет уруу хүргэгдэв. Тэгээд түүнийг тэнд авчирсан ишмаелчуудын гараас Фараоны түшмэл, хамгаалагчдын захирагч Потифар гэдэг нэгэн египет хүн түүнийг арилжин авчээ.

²ЭЗЭН Иосефтой хамт байсан учир түүний бүх ажил үйлс бүтэмжтэй болж, тэр өөрийн эзэн египет хүний гэрт сууж байлаа.

³ЭЗЭН, түүнтэй хамт байгааг мөн ЭЗЭН, түүний үйлдсэн бүхнийг гараар нь бүтэмжтэй болгож байгааг түүний эзэн нь үзэв.

⁴Иосеф, эзнийхээ нүдэнд тааллыг олж, түүнд үйлчилсэнд тэрээр Иосефыг гэрийнхээ даамал болгон эзэмшиж байсан бүхнээ түүний гарт өгчээ.

⁵Тэрээр Иосефоор эд хөрөнгөө харгалзуулснаас хойш ЭЗЭН Иосефын төлөө египет хүний орон гэрийг ерөөж, ЭЗЭНий ерөөл гэр болон тариалангийн талбай, түүнд байсан бүхэнд буув.

⁶Тэрээр өөрт байсан бүхнээ Иосефын гарт даатгаад, идэх хоолноосоо өөр юунд ч санаа тавихаа больжээ. Иосеф чийрэг сайхан биетэй, үзэсгэлэнтэй сайхан эр байлаа.

⁷Түүнээс хойш эзнийх нь эхнэр Иосефт харц чулуудаж —Надтай унтаач гэж хэлэв.

⁸Харин Иосеф татгалзаж, эзнийхээ эхнэрт —Харагтун, миний эзэн гэрийн доторх юунд ч санаа тавьдаггүй бөгөөд өөрийн эзэмшдэг бүхнээ тэрээр миний гарт өгсөн учир

⁹энэ гэрт надаас илүү их хүн байхгүй. Та түүний эхнэр учир тэр танаас бусад юуг ч надад хориглоогүй. Би яаж ийм ёрын муу хэрэг хийж, Бурхандаа нүгэл үйлдэх билээ? гэв.

¹⁰Тэр эмэгтэй өдрөөс өдөрт Иосефыг ятгасаар байсан боловч тэрээр өөртэйгөө унт гэснийг нь ч, хамт бай гэснийг нь ч сонссонгүй.

¹¹Нэгэн өдөр Иосефыг ажилаа хийхээр гэрт ороход гэрийнхнээс нэг ч хүн тэнд байсангүй.

¹²Тэр эмэгтэй түүний хувцаснаас чангааж —Надтай унтаач гэсэнд Иосеф түүний гарт хувцсаа орхиод, гадагш зугтан гарав.

¹³Иосеф түүний гарт хувцсаа хаян зугтаж гарахыг хараад

¹⁴тэр эмэгтэй гэрийнхнээ дуудан тэдэнд —Хараач, эзэн маань бидэнд еврей хүн авчирч түүгээр биднийг доромжлууллаа. Тэр намайг хүчирхийлэх гэж над дээр орж ирлээ. Тэгээд би чангаар хашхирсан.

¹⁵Тэр миний чанга дуугаар хашхирахыг сонсоод хувцсаа миний дэргэд орхин гадагш зугтаж гарлаа гэв.

¹⁶Тэрээр эзнийгээ гэртээ иртэл нь нөгөө хувцсыг дэргэдээ тавьж байв.

¹⁷Тэгээд тэр түүнд нөгөө үгээ хэлж —Чиний бидэнд авчирсан еврей боол намайг доромжлохоор над дээр орж ирээд,

¹⁸намайг дуугаа өндөрсгөн хашхирахад тэрээр хувцсаа миний дэргэд орхиод, гадагш зугтаж гарсан гэв.

¹⁹Эзэн нь “Чиний боол надад ийм юм хийлээ” гэж хэлсэн эхнэрийнхээ үгийг сонсоод уур нь шатжээ.

²⁰Тэгээд Иосефын эзэн түүнийг барьж, хааны хоригдлуудыг хорьдог шоронд хорив. Иосеф шоронд хоригдож байсан ч

²¹ЭЗЭН Иосефтой хамт байж, түүнд энэрэл хайр үнэнээр хандаж, тэрээр шоронгийн ахлагчийн нүдэнд тааллыг олжээ.

²²Шоронгийн харгалзагч нь шоронд байсан бүх хоригдлыг Иосефын гарт даатгав. Тэнд хийгдэх ажил болгонд Иосеф хариуцлагатай байв.

²³Шоронгийн харгалзагч нь Иосефын гар дор байсан зүйлийн өчүүхнийг нь ч хянадаггүй байлаа. Учир нь ЭЗЭН Иосефтой хамт байж, түүний хийсэн бүхнийг бүтэмжтэй болгожээ.