Read Ariun Bible 2013 – Ариун Библи 2013 Эхлэл 4 Bible Online

Эхлэл 4 - Ariun Bible 2013 – Ариун Библи 2013 bible

Эхлэл 4

¹Адам Еватайгаа унтаж, эхнэр нь жирэмслэн Каиныг[21] төрүүлээд —ЭЗЭНий ерөөлөөр би хүүтэй боллоо гэж хэлэв.

²Дахиад тэрээр Каины дүү Абелыг төрүүлжээ. Тэгээд Абел мал маллаж, Каин газар эдлэх болов.

³Хожим нь Каин газраас авсан үр жимснээсээ ЭЗЭНд өргөл болгон барьжээ.

⁴Абел бас хонин сүргийнхээ анхны төл болон түүнийхээ өөх тосноос өргөжээ. ЭЗЭН Абелыг болон түүний өргөлийг ойшоон хүлээж авсан боловч

⁵Каиныг болон түүний өргөлийг ойшоосонгүй. Каин ихэд уурлан, уруу царайлав.

⁶ЭЗЭН, Каинд —Чи юунд уурлана вэ? Юуны учир уруу царайлна вэ?

⁷Хэрэв чи сайныг үйлдвэл тэргүүнээ өргөх биш үү?[22] Хэрэв чи сайныг хийхгүй бол гэм нүгэл үүдэн дээр чинь гэтэн, нүгэл хилэнц чамайг хүсэх болно. Гэвч чи түүнийг дийлэх ёстой.

⁸Каин дүү Абелтайгаа ярьжээ. Дараа нь хээр талд байхдаа дүү Абел уруугаа дайрч, түүнийг цохиж алав.

⁹ЭЗЭН —Чиний дүү Абел хаана байна? гэж Каинаас асуухад Каин —Би мэдэхгүй. Би дүүгийнхээ харгалзагч юм уу? гэж хариулав.

¹⁰ЭЗЭН —Чи юу хийчихэв ээ? Чиний дүүгийн цус газраас Над өөд хашхирч байна.

¹¹Газар амаа ангайж, чиний гараас дүүгийн чинь цусыг авсан тул чамд газраас хараал хүрч,

¹²чамайг газар хагалахад газар чамд дахин үр жимсээ хайрлахгүй. Чи газар дэлхийд зайгуул тэнүүлч болно гэв.

¹³Каин, ЭЗЭНд хандаж —Миний шийтгэл хэрээс минь хэтэрсэн хүнд ажээ.

¹⁴Та өнөөдөр намайг газрын хөрснөөс зайлуулж байгаа учир би Таны оршихуйгаас далд орж, газар дэлхийд зайгуул тэнүүлч болно. Надтай уулзсан хэн боловч намайг ална гэжээ.

¹⁵ЭЗЭН түүнд —Иймд чамайг алсан хэн боловч долоо дахин илүү хүнд шийтгэл хүлээх болно гэж хэлээд, Каинд тэмдэг тавьж, түүнтэй уулзсан хэн ч түүнийг алахааргүй болгов.

¹⁶Каин ЭЗЭНий оршихуйгаас гарч, Едений зүүн талд орших Нод гэдэг газарт нутаглан суух болжээ.

¹⁷Каин эхнэртэйгээ унтаж, эхнэр нь жирэмслэн Енохыг төрүүлэв. Каин хот байгуулж, түүнийгээ хүүгийнхээ нэрээр Енох гэж нэрлэлээ.

¹⁸Енох Ирадыг төрүүлж, Ирад Мехуиаелыг төрүүлж, Мехуиаел Метушаелыг төрүүлж, Метушаел Ламехыг төрүүлжээ.

¹⁹Ламех хоёр эхнэр авав. Нэгийнх нь нэр Ада, нөгөөгийнх нь нэр Зилла.

²⁰Адагийн төрүүлсэн Иабал нь майханд суугч, мал сүрэгтний дээд өвөг болов.

²¹Түүний дүүгийн нэрийг Иубал гэдэг байжээ. Тэрээр босоо ятгачид ба лимбэчдийн дээд өвөг болов.

²²Зилла бас Тубал-каиныг төрүүлжээ. Тэрээр хүрэл ба төмрөөр янз бүрийн эдлэл хийдэг дархан болжээ.[23] Тубал-каины охин дүүг нь Наама гэдэг.

²³Ламех эхнэрүүддээ хандан Ада, Зилла, миний дуу хоолойг сонсоцгоо! Ламехын эхнэрүүд ээ, миний үгийг сонсоцгоо! Намайг шархдуулсны төлөө би нэгэн хүнийг алчихлаа. Намайг гэмтээсний төлөө нэгэн залууг алчихлаа.

²⁴Каины төлөө ногдох ял шийтгэл долоо дахин их бол, Ламехын төлөө ногдох ял шийтгэл далан долоо дахин их байх болно гэв.

²⁵Адам эхнэртэйгээ дахин унтаад, эхнэр нь хүү төрүүлж түүнийг Сет[24] гэж нэрлэв. —Каины алсан Абелын оронд Бурхан надад өөр нэг үр хайрлалаа гэв.

²⁶Сет бас хүүтэй болж, түүнийг Енош гэж нэрлэв. Тэр цагаас эхлэн хүмүүс ЭЗЭНий нэрийг дуудах болжээ.