Read Ariun Bible 2013 – Ариун Библи 2013 Эхлэл 40 Bible Online

Эхлэл 40 - Ariun Bible 2013 – Ариун Библи 2013 bible

Эхлэл 40

¹Түүнээс хойно Египетийн хааны сөнч, талхчин хоёр өөрсдийн эзэн Египетийн хаанд нүгэл үйлджээ.

²Фараон өөрийнхөө хоёр албат ахлах сөнч, ахлах талхчин хоёрт уурлаж,

³тэднийг хамгаалагчдын захирагчийн байшин доторх Иосефын хоригдож байсан шоронд хийв.

⁴Хамгаалагчдын захирагч Иосефыг тэдэн дээр нэмж оруулсанд Иосеф тэдэнд үйлчилжээ. Тэд хэсэг хугацаанд хорионд байв.

⁵Шоронд хоригдож байсан Египетийн хааны сөнч, талхчин хоёр нэгэн шөнө хоёулаа зүүдэлсэн бөгөөд тэр хоёрын зүүдний совин өөр өөр байлаа.

⁶Иосефыг өглөөгүүр тэдэн дээр орж ирээд харахад, үзэгтүн, тэд их гунигтай байв.

⁷Иосеф эзнийхээ байшинд өөртэй нь хамт хорионд байгаа Фараоны хоёр албатаас —Өнөөдөр та хоёрын царай яагаад ийм дүнсгэр муу харагдана вэ? гэж асуусанд

⁸тэд —Бид хоёулаа зүүд зүүдэллээ, харин түүнийг тайлах хүн алга гэсэнд Иосеф тэдэнд —Тайлал нь Бурханых биш үү? Надад яриач дээ! гэв.

⁹Тэгээд ахлах сөнч зүүдээ Иосефт ярьсан нь —Миний зүүдэнд, харагтун, өмнө минь усан үзмийн мод байв.

¹⁰Тэр мод гурван мөчиртэй бөгөөд ургаж дэлгэрээд усан үзэм боловсорчээ.

¹¹Тэгээд миний гар дээр Фараоны аяга байх ба би усан үзэм авч, Фараоны аяганд шүүсийг нь шахаж хийгээд, тэр аягаа Фараоны гарт өгч байлаа гэв.

¹²Иосеф түүнд —Түүний тайлал нь гэвэл, гурван мөчир нь гурван өдөр юм.

¹³Фараон гурван өдрийн дотор тэргүүнийг тань өргөж, хуучин албанд тань дахин оруулна. Тэгээд та урьд түүний сөнч байх үедээ хийдэг байсан ёсоор Фараоны аягыг дахин гарт нь өгөх болно.

¹⁴Бүх юм чинь сайн болбол намайг дурсан санаарай. Надад нинжин сэтгэл гарган Фараонд миний тухай дурдаж энэ байшингаас намайг гаргаж өгнө үү?

¹⁵Үнэнээ хэлэхэд, би еврейчүүдийн нутгаас хулгайлагдсан. Тэд намайг гянданд суулгах ямар ч хэрэг би энд хийгээгүй гэжээ.

¹⁶Түүнийг сайнаар тайлахыг ахлах талхчин хараад, Иосефт —Би бас зүүдэндээ үзсэн нь, харагтун, миний толгой дээр цагаан талхтай гурван сагс байв.

¹⁷Дээд талын сагсанд нь Фараонд зориулж жигнэсэн янз бүрийн жигнэсэн бүтээгдэхүүн байлаа. Гэтэл шувууд миний толгой дээрх сагснаас түүнийг авч идэж байлаа гэсэнд

¹⁸Иосеф —Түүний тайлал гэвэл, гурван сагс нь гурван өдөр юм.

¹⁹Гурван өдрийн дотор Фараон тэргүүнийг тань биеэс чинь өргөн авч модонд өлгөхөд шувууд махыг чинь идэх болно гэв.

²⁰Гурав дахь өдөр нь Фараоны төрсөн өдөр байв. Фараон бүх зарц нартаа зориулсан найран дээр ахлах сөнч, ахлах талхчин хоёрынхоо толгойг зарц нарынхаа дунд дээш өргүүлэв.

²¹Тэгээд тэр ахлах сөнчийг сөнчийнх нь албанд дахин оруулав. Тэрээр Фараоны гарт аягыг нь барьж өгчээ.

²²Бас Иосефын тэдэнд тайлсан ёсоор ахлах талхчинг тэр дүүжилжээ.

²³Харин ахлах сөнч Иосефыг эргэж саналгүй түүнийг мартав.