Read Ariun Bible 2013 – Ариун Библи 2013 Эхлэл 46 Bible Online

Эхлэл 46 - Ariun Bible 2013 – Ариун Библи 2013 bible

Эхлэл 46

¹Тэгээд Израиль хамаг хөрөнгө хогшилоо авч хөдлөөд, Беершебад ирж эцэг Исаакийнхаа Бурханд нядлах тахил тахив.

²Шөнө нь Бурхан Израильд үзэгдэж —Иаков аа! Иаков аа! гэж дуудахад Иаков —Би энд байна гэж хариулав.

³Бурхан —Би Бурхан байна. Чиний эцгийн Бурхан байна. Чи Египет уруу явахаасаа бүү ай. Би тэнд чамайг агуу үндэстэн болгоно.

⁴Би чамтай хамт Египетэд очоод, чамайг заавал буцааж авчирна. Иосеф өөрийн гар дээр чамайг нүд аниулах болно гэжээ.

⁵Иаков Беершебагаас хөдөлжээ. Израилийн хөвгүүд эцгийг нь авчруулахаар Фараоны илгээсэн тэргэнд эцэг Иаков болон эхнэр хүүхдүүдээ суулгажээ.

⁶Тэд бас мал сүргээ, Канаан нутагт хуримтлуулсан эд хөрөнгөө авав. Иаков болон түүний үр удам бүгдээрээ Египетэд очлоо.

⁷Ийнхүү Иаков хөвгүүд, ач хөвгүүд, охид, ач охид болон бүх үр удмаа дагуулаад Египетэд очжээ.

⁸Египетэд очсон Израилийн гэр бүлийнхний нэр ийм билээ. Иаков болон Иаковын ууган хүү Реубен.

⁹Реубений хөвгүүд Ханох, Паллу, Хезрон, Карми.

¹⁰Симеоны хөвгүүд Иемуел, Иамин, Охад, Иахин, Зохар, канаан эмэгтэйгээс төрсөн Шаул.

¹¹Левийн хөвгүүд Гершон, Кохат, Мерари.

¹²Иудагийн хөвгүүд Ер, Онан, Шела, Перез, Зера нар бөгөөд харин Ер, Онан хоёр Канааны нутагт үхжээ. Перезийн хөвгүүд Хезрон ба Хамул.

¹³Иссахарын хөвгүүд Тола, Пува, Иов болон Шимрон.

¹⁴Зебулуны хөвгүүд Серед, Елон, Иахлеел билээ.

¹⁵Эд бүгд Паддан-Арамд Леагийн Иаковт төрүүлж өгсөн хөвгүүд бөгөөд түүний охин Дина, түүний охид, хөвгүүд бүгд нийлээд гучин гурван хүн байв.

¹⁶Гадын хөвгүүд нь Зифион, Хагги, Шуни, Езбон, Ери, Ароди, Арели билээ.

¹⁷Ашерын хөвгүүд нь Имна, Ишва, Ишви, Бериа, тэдний охин дүү нь Сера болой. Бериагийн хөвгүүд нь Хебер, Малхиел хоёр.

¹⁸Эдгээр нь Лабан өөрийн охин Леад авч өгсөн Зилпагийн Иаковт төрүүлж өгсөн арван зургаан хүн билээ.

¹⁹Иаковын эхнэр Рахелын хүүхдүүд нь Иосеф, Бениамин хоёр юм.

²⁰Оны тахилч Потиферагийн охин Асенатаас Египет нутагт Иосефт төрүүлж өгсөн Манассе, Ефраим хоёр.

²¹Бениамины хөвгүүд нь Бела, Бехер, Ашбел, Гера, Нааман, Ехи, Рош, Муппим, Хуппим, Ард билээ.

²²Эд бүгд Иаковт Рахелын төрүүлж өгсөн хөвгүүд билээ. Бүх хүн нийлээд арван дөрвүүл юм.

²³Даны хүү нь Хушим.

²⁴Нафталийн хөвгүүд нь Иахзеел, Гуни, Иезер, Шиллем.

²⁵Эдгээр нь Лабан өөрийн охин Рахелд авч өгсөн Билхагаас Иаковт төрүүлж өгсөн хөвгүүд бөгөөд бүгд долоон хүн юм.

²⁶Египетэд Иаковтай хамт ирсэн хүмүүс нь түүний бэрүүдээс гадна жаран зургаан хүн байв. Эдгээр нь бүгд Иаковаас гарсан хүмүүс юм.

²⁷Египетэд төрсөн, Иосефын хөвгүүн хоёр бөгөөд Египетэд ирсэн Иаковынхан бүгд далан хүн болой.

²⁸Иаков Гошен уруу замчлуулахаар Иудаг урьдаар Иосефт илгээж, улмаар тэд Гошен нутагт хүрэлцэн иржээ.

²⁹Иосеф сүйх тэргээ бэлтгэж, эцэг Израильтайгаа уулзахаар Гошенд хүрч очоод, түүнийг өмнөө үзэгдмэгц хүзүүдэн авч, хүзүүгээр нь тэврээд удтал уйлав.

³⁰Израиль Иосефт —Чиний амьд байгааг харж, царай зүсийг чинь үзсэнээс хойш би одоо үхсэн ч яах вэ гэв.

³¹Иосеф өөрийн ах дүү нар болон эцгийнхэндээ —Би очиж Фараонд хэлье. Би түүнд “Канаанд байсан ах дүү нар болон эцгийнхэн маань над дээр хүрч ирлээ.

³²Тэд бол хоньчид, угаасаа мал малласаар ирсэн улс. Тэд мал сүргээ, хамаг эд хөрөнгөө авч иржээ” гэе.

³³Фараон та нарыг дуудаж “Та нар юу хийдэг улс вэ?” гэж асуухаар нь,

³⁴египетчүүдэд хоньчид жигшүүртэй байдаг тул та нар “Таны зарц нар болон бидний эцэг өвгөд хар багаасаа өдий хүртэл мал малласаар ирлээ” гэж хэлээрэй. Тэгвэл та нарыг Гошен нутагт байлгах болно гэв.