Read Ariun Bible 2013 – Ариун Библи 2013 Эхлэл 48 Bible Online

Эхлэл 48 - Ariun Bible 2013 – Ариун Библи 2013 bible

Эхлэл 48

¹Түүнээс хойно нэгэн хүн, Иосефт —Харагтун, эцэг тань өвчтэй байна гэж хэлсэнд тэрээр Манассе, Ефраим хоёр хүүгээ аваад очив. —

²Таны хүү Иосеф тан дээр хүрч ирлээ гэж нэг нь Иаковт мэдэгдэхэд Израиль өөрийгөө хүчлэн орон дээрээ өндийж суув.

³Иаков, Иосефт —Төгс Хүчит Бурхан, Канаан нутгийн Лузд надад үзэгдэж, намайг ерөөсөн билээ.

⁴Тэрээр надад “Харагтун, Би чамайг үржүүлж, олшруулах болно. Би үй олон ард түмнийг чамаас бий болгож, энэ газрыг чиний үр удамд үүрдийн өмч болгон өгнө” гэж хэлсэн.

⁵Намайг Египетэд чам дээр ирэхийн өмнө Египетэд чамд төрсөн Ефраим, Манассе хоёр хүү чинь минийх, Реубен, Симеон хоёр шиг минийх болно.

⁶Тэдний дараа чамаас төрсөн хүүхдүүд нь чинийх болно. Тэд ах нарынхаа нэрийн дор тэдний өвийг өвлөх болно.

⁷Намайг Падданаас ирэх үед, Ефрат хүрэхийн өмнөхөн Канаан нутагт зам зууртаа Рахел нас барсан бөгөөд би түүнийг Ефрат хүрдэг замд оршуулсан билээ. (Ефрат бол одоогийн Бетлехем.)

⁸Иосефын хөвгүүдийг Израиль хараад —Эд нар чинь хэн бэ? гэсэнд

⁹Иосеф —Эд нар бол энд Бурханаас надад хайрласан миний хөвгүүд гэж эцэгтээ хэлэв. Эцэг нь —Одоо тэднийг над дээр авчир! Би тэднийг ерөөе! гэлээ.

¹⁰Израиль өндөр настай болсон тул нүд нь муудаж, харж чадахгүй болжээ. Иосеф хоёр хүүгээ эцэгтээ авчрахад тэр хөвгүүдийг нь тэврэн үнсэв.

¹¹Тэгээд Иосефт —Би чиний царайг харна гэж хэзээ ч бодоогүй. Гэтэл харагтун, Бурхан чиний үр удмыг ч бас надад харууллаа гэв.

¹²Иосеф эцгийнхээ өвдгөөс хоёр хүүгээ авч, газарт сөгдөн мөргөв.

¹³Иосеф хоёр хүүгээ аваад, Ефраимыг өөрийнхөө баруун гараар Израилийн зүүн гар талд, Манассег өөрийнхөө зүүн гараар Израилийн баруун гар талд гарган эцэгтээ авчрав.

¹⁴Израиль баруун гараа сунган бага хүү Ефраимын толгой дээр тавьж, Манассе нь хэдийгээр том хүү нь боловч түүний толгой дээр зүүн гараа зөрүүлэн тавьжээ.

¹⁵Тэрээр Иосефыг[104] ерөөгөөд —Миний өвөг эцэг Абрахам, Төрсөн эцэг Исаак хоёртой алхаж байсан Бурхан, Бүхий л амьдралын минь турш өнөөдрийг хүртэл асран тэтгэсэн Бурхан,

¹⁶Намайг элдэв гай зовлонгоос зольсон тэнгэрэлч Энэ хүүхдүүдийг ерөөж, Тэд миний нэрээр болон миний өвөг эцэг Абрахам Бас төрсөн эцэг Исаакийн маань нэрээр дуудуулж Газар дэлхий дээр өнөр өтгөн болох болтугай! гэв.

¹⁷Эцэг нь баруун гараа Ефраимын толгой дээр тавьсныг Иосеф хараад, сэтгэлд нь нийцээгүй тул эцгийнхээ баруун гарыг, Ефраимын толгой дээрээс авч, Манассегийн толгой дээр тавих гэв.

¹⁸Тэгээд эцэгтээ —Энэ биш ээ, эцэг минь! Энэ нь ууган хүү, та баруун гараа түүний толгой дээр тавина уу? гэсэнд

¹⁹эцэг нь татгалзаж —Би мэдэж байна, хүү минь, би мэдэж байна. Тэр бас нэгэн овог болж, агуу их болно. Гэсэн ч дүү нь түүнээс ч илүү агуу их болж, үр удам нь олон үндэстэн болно гэж хэлэв.

²⁰Тэгээд тэр өдөртөө тэднийг ерөөгөөд —Израильчууд та нарын нэрийг барьж “Бурхан та нарыг Ефраим шиг Манассе шиг болгох болтугай!” хэмээн ерөөх болно гээд Ефраимыг Манассегаас дээгүүр тавив.

²¹Израиль, Иосефт —Харагтун, үхэх цаг минь боллоо. Харин Бурхан та нартай хамт байж, та нарыг өвөг дээдсийн чинь газарт буцаах болно.

²²Би чамд ах нарт чинь өгснөөсөө илүү нэг хувийг өгнө. Үүнийг би аморичуудаас илд, нумаараа булаан авсан юм гэв.