Read Ariun Bible 2013 – Ариун Библи 2013 Эхлэл 49 Bible Online

Эхлэл 49 - Ariun Bible 2013 – Ариун Библи 2013 bible

Эхлэл 49

¹Иаков хөвгүүдээ дуудан —Та нар цугларцгаа. Би та нарт ирэх өдрүүдэд юу болох тухай хэлж өгье.

²Иаковын хөвгүүд ээ! Та нар цугларцгааж, сонсоцгоо! Эцэг Израилийнхаа үгийг сонсоцгоо!

³Реубен, чи бол миний ууган хүү, Миний хүч чадал, Сүр хүчний минь охь, Цог жавхлангийн оргил, Эрч чадлын дээд боловч

⁴Ус шиг бургилж байсан учир Чи эрч чадлын дээд болж чадахгүй. Чи эцгийнхээ орон дээр гарч, бузарласан. Тэр миний орон дээр гарсан юм.

⁵Симеон, Леви хоёр ах дүүс. Тэдний илд бол харгислалын зэвсэг юм.

⁶Сэтгэл зүрх минь тэдний чуулалд бүү оролцог. Алдар хүнд минь эдний чуулганд үл нэгдэг. Уурынхаа эрхээр тэд хүн алжээ Өөрийнхөө зоргоор эд үхрийн шөрмөс тасалжээ.

⁷Тэдний уур догшин ширүүн, Хилэн нь харгис хэрцгий учир хараал идэг! Би тэднийг Иаковын дунд хувааж Израилийн дунд тараана.

⁸Иуда! Чамайг ах дүү нар чинь магтан өргөмжлөх болно. Гар чинь дайсныхаа хоолойг багалзуурдах болно. Эцгийн чинь хөвгүүд чиний өмнө сөгдөн мөргөх болно.

⁹Иуда, чи бол арслангийн гүег юм. Хүү минь! Чи барьсан олзоо орхин босов. Тэр мяраан арслан шиг хэвтэнэ. Арслан болохынх нь хувьд хэн түүнийг босгохоор зүрхлэх вэ?

¹⁰Шилог иртэл хааны таяг Иудагаас салахгүй. Захирагчийн шийдэм түүний хөлийн хоорондоос салахгүй. Бүх хүн түүнийг дуулгавартай дагах болно.

¹¹Илжгээ усан үзмийн модноос уяж Дудрангаа хамгийн сайхан усан үзмийн модноос уяж Хувцсаа дарсанд, нөмрөгөө усан үзмийн шүүсэнд угаана.

¹²Дарснаас болж нүд нь улайж Сүүнээс болж шүд нь цайх болно.[105]

¹³Зебулун далайн эрэгт амьдран сууж Усан онгоцны зогсоолтой болж, Бас нутгийнх нь хил хязгаар Сидон хүртэл өргөжнө.

¹⁴Иссахар нь хонины хашааны хооронд хэвтдэг яс сайтай илжиг юм.

¹⁵Тэрээр амрах газраа сайн, тэр газраа таатай гэдгийг хараад Мөрөө доошлуулж ачаагаа үүрээд Албадлага дор зарцлагдана.

¹⁶Дан нь Израилийн нэгэн овгийн хувьд Ард олноо шүүх болно.

¹⁷Дан замын хажуугийн могой, Морины өсгийг хатгаж Унаж яваа эзнийг нь арагш унагадаг Замын хажуугийн хорт могой болно.

¹⁸ЭЗЭН минь, би Таны авралыг хүлээдэг.

¹⁹Гад нь цэргээр довтлуулавч Тэднийг өсгий даран довтолно.

²⁰Ашерын хоол хүнс тос дааж Тэрээр хааны амтат хоолыг зэхэж өгнө.

²¹Нафтали нь уянгат хоолойгоор дуулдаг эрх дураараа согоо юм.[106]

²²Иосеф нь үр жимс ихтэй мөчир. Булгийн дэргэдэх үржил шимтэй мөчир Тэр мөчир нь ханыг даван ургана.[107]

²³Мэргэн харваачид түүнийг хорсолтойёо харваад Нэхэн хөөсөн боловч

²⁴Иосефын нум бат бэх, Гар нь хүчтэй байх бөгөөд[108] Иаковын Төгс Хүчит Нэгэний гараас, Израилийн Хад болох Хоньчин гарах болно.

²⁵Чиний эцгийн Бурханаар дамжин Тэр чамд туслах болно. Төгс Хүчит Нэгэнээр дамжуулан Тэрээр чамайг ерөөх болно. Дээр тэнгэрийн ерөөл Доор оёоргүй гүний ерөөл Хөх ба умайн ерөөл энэ болой.

²⁶Чиний эцгийн ерөөл бол Миний өвөг дээдсийн ерөөлөөс ч илүү байж Мөнх уулсын хязгааргүй шиг Тэр ерөөл нь Иосефын тэргүүн дээр Ах дүүсийнхээ дундаас тодрон гарагчийн зулай дээр эргэж ирнэ.

²⁷Бениамин нь олзоо урж тасчих чоно. Өглөөгүүр тэр барьснаа идэж, үдшээр олзоо хуваана гэв.

²⁸Эдгээр нь Израилийн арван хоёр овог болжээ. Энэ бол тэднийг ерөөхдөө эцгийнх нь хэлсэн үг юм. Тэрээр хүн тусбүрд тохирох ерөөлийг хайрлажээ.

²⁹Тэрээр тэдэнд захиран хэлсэн нь —Би өөрийн хүмүүс уруугаа буцна. Намайг хитчүүдийн Ефроны тал дахь агуйд байгаа өвөг дээдэстэй минь хамт оршуулаарай.

³⁰Тэр агуй бол Канаан нутагт, Мамрегийн эсрэг талд, Махпелагийн талбайд бий. Абрахам тэр агуйг талбайтай нь хамт оршуулгын газар болгохоор хитчүүдийн Ефроноос худалдаж авсан юм.

³¹Абрахам болон эхнэр Сара нь тэнд оршуулагдсан бөгөөд Исаак болон түүний эхнэр Ребека мөн тэнд оршуулагдсан билээ. Би бас Леагаа тэнд оршуулсан юм.

³²Тэр талбай ба тэндхийн агуйг Хитийн хөвгүүдээс худалдаж авсан гэв.

³³Иаков хөвгүүддээ захиасаа өгч дуусаад, хөлөө хумин орондоо хийж, эцсийнхээ амьсгааг аваад, өөрийн хүмүүс уруугаа оджээ.