Read Ariun Bible 2013 – Ариун Библи 2013 Эхлэл 7 Bible Online

Эхлэл 7 - Ariun Bible 2013 – Ариун Библи 2013 bible

Эхлэл 7

¹ЭЗЭН, Ноад —Энэ үеийнхний дотроос чи Миний өмнө зөвт байгааг Би харсан учраас чи болон чиний бүх гэр бүлийнхэн энэ бүхээгт ор.

²Чи бүх цэвэр амьтны төрөл бүрээс долоо долоог эр эмээр нь, бузар амьтны төрөл бүрээс хоёр хоёрыг эр эмээр нь өөртөө ав.

³Бас газар дэлхий даяар үр удмыг нь амьд үлдээхийн тулд тэнгэр огторгуйн жигүүртэн шувуудын төрөл бүрээс долоо долоог эр эмээр нь ав.

⁴Одоогоос долоо хоногийн дараа Би дөчин өдөр, дөчин шөнийн турш бороо оруулж, өөрийнхөө бүтээсэн амьтай бүхнийг газрын хөрснөөс арчина гэв.

⁵Ноа өөрт нь ЭЗЭНий тушаасан ёсоор бүхнийг хийжээ.

⁶Дэлхий дээр үер болоход Ноа зургаан зуун настай байлаа.

⁷Ноа хөвгүүд, эхнэр, бэрүүдтэйгээ хамт үерийн усны улмаас бүхээгтээ оржээ.

⁸Цэвэр амьтад, бузар амьтад, шувууд болон газраар мөлхөгч бүхэн

⁹Бурханы тушаасан ёсоор эр эм, хос хосоороо Ноад очиж, бүхээгт нь оржээ.

¹⁰Тэгээд долоо хоногийн дараа дэлхийд үерийн ус буув.

¹¹Ноагийн амьдралын зургаан зуу дахь жилийн хоёр дахь сард, уг сарын арван долооны өдөр их оёоргүй гүний бүх булаг садран оргилж, тэнгэрийн усны хаалт нээгджээ.

¹²Дөчин өдөр, дөчин шөнийн турш дэлхий дээр бороо асгарав.

¹³Яг тэр өдөртөө Ноа, түүний хөвгүүд Шем, Хам, Иафет, Ноагийн эхнэр болон гурван бэр нь бүхээгтээ оров.

¹⁴Мөн тэд болон бүх араатан амьтад төрөл төрлөөрөө, бүх мал адгуус төрөл төрлөөрөө, бүх газраар мөлхөгч төрөл төрлөөрөө, бүх жигүүртэн шувууд төрөл төрлөөрөө,

¹⁵амин амьсгаатай бие махбодтой бүхэн хос хосоороо Ноад очиж, бүхээгт нь оржээ.

¹⁶Орсон болгон нь бие махбодтой бүхний эр эмүүд байв. Ноад Бурханы тушаасан ёсоор тэднийг бүхээгт орсонд ЭЗЭН араас нь хаажээ.

¹⁷Газар дэлхий дээр дөчин хоног үер бууж, ус нэмэгдэхэд бүхээг газраас дээш хөвөн гарч ирэв.

¹⁸Ус улам ихсэн газар дээгүүр бялхан хальж, бүхээг усны мандал дээр хөвлөө.

¹⁹Газар дэлхий дээрх ус улам хүчтэй хальж, тэнгэрийн доорх өндөр уулс бүгд усаар бүрхэгджээ.

²⁰Ус арван таван тохой дээш өргөгдөж, уулс усаар бүрхэгдлээ.

²¹Газар дэлхий дээр хөдлөгч хамаг бие махбодтон буюу жигүүртэн шувуу, мал адгуус, ан араатан, газраар мөлхөгч бүхэн хийгээд бүх хүн төрөлхтөн үхжээ.

²²Хуурай газар дээр байдаг, хамартаа амин амьсгаатай бүхэн үхэв.

²³Ингээд Тэрээр хүн төрөлхтнөөс авахуулаад араатан амьтад, газраар мөлхөгч, тэнгэр огторгуйн жигүүртэн шувуудыг хүртэл газар дээрх хамаг амьтныг арчин зайлуулсан бөгөөд тэд бүгд газрын хөрснөөс арчигджээ. Гагцхүү Ноа болон түүнтэй хамт бүхээгт байгсад л үлджээ.

²⁴Ус зуун тавин хоногийн турш дэлхий дээр хальж байв.