Read Ariun Bible 2013 – Ариун Библи 2013 Эхлэл 9 Bible Online

Эхлэл 9 - Ariun Bible 2013 – Ариун Библи 2013 bible

Эхлэл 9

¹Бурхан, Ноаг болон түүний хөвгүүдийг ерөөн, тэдэнд —Үржтүгэй, олширтугай! Газар дэлхийг дүүргэтүгэй!

²Газар дэлхий дээрх араатан амьтан бүхэн, огторгуйн жигүүртэн шувуу бүхэн, газраар мөлхөгч бүхэн, далайн загас жараахай бүхэн та нараас айж эмээнэ. Тэд та нарын гарт орох болно.

³Аливаа амьд амьтан та нарын хоол хүнс болно. Би та нарт ургамал ногоог өгсөн шигээ одоо Би энэ бүхнийг та нарт өгч байна.

⁴Гагцхүү та нар махыг цус буюу амьтай нь бүү ид.

⁵Тэгвэл та нарын амь-цусыг Би заавал нэхнэ. Амьтан бүрээс өөрөөс нь үүнийг Би нэхнэ. Хүний гараас, ах дүү бүрийнх нь гараас ч хүний амийг Би нэхнэ.

⁶Хүний цусыг хэн урсгана Түүний цусыг хүн урсгана. Учир нь Бурхан Өөрийн дүр төрхөөр хүнийг бүтээжээ.

⁷Та нар харин үржтүгэй, олширтугай! Газар дэлхийг дүүргэтүгэй, түүн дээр олширтугай! гэлээ.

⁸Бурхан, Ноа болон түүнтэй хамт байсан хөвгүүдэд —

⁹Би Өөрийнхөө гэрээг та нартай болон та нараас хойших үр удамтай чинь байгуулна.

¹⁰Бас та нартай хамт байсан бүх амьтан, жигүүртэн шувууд, мал адгуус, газрын бүх амьтан, бүхээгнээс гарч явсан бүхэнтэй буюу дэлхий дээрх бүх араатан амьтантай байгуулна.

¹¹Би та нартай гэрээ байгуулна. Бие махбодтой бүхнийг дахин хэзээ ч үерийн усанд устгахгүй. Газар дэлхийг сүйрүүлэх үер дахин хэзээ ч болохгүй.

¹²Бурхан —Та нартай болон та нартай хамт байгаа бүх амьтантай мөн хойчийн удамтай чинь байгуулах Миний гэрээний тэмдэг гэвэл:

¹³Би үүлэнд солонгоо татуулж, тэр нь дэлхийтэй Миний байгуулсан гэрээний тэмдэг болно.

¹⁴Намайг газар дээр үүл хуралдуулж, солонго тэр үүлэн дээр харагдах үед

¹⁵Би Миний болон та нарын, бие махбодтой бүх амьтны хооронд байгуулсан Өөрийн гэрээг санан дурсах болно. Ус дахин хэзээ ч махбодтой бүхнийг устгах үер болохгүй.

¹⁶Үүлэнд солонго татахыг Би хараад, Бурхан Миний болон дэлхий дээрх махбодтой хамаг амьтны хооронд байгуулсан мөнхийн гэрээгээ санан дурсах болно гэв.

¹⁷Бурхан, Ноад —Энэ бол Миний болон дэлхий дээрх хамаг махбодтоны хооронд Миний байгуулсан гэрээний тэмдэг болно гэв.

¹⁸Бүхээгнээс гарч ирсэн Ноагийн хөвгүүд нь Шем, Хам, Иафет нар бөгөөд Хам нь Канааны эцэг билээ.

¹⁹Тэд бол Ноагийн гурван хөвгүүн бөгөөд тэднээс бүх газар дэлхийгээр тархан суурьшсан хүмүүс төрөн гарчээ.

²⁰Ноа газар тариаланч болж эхлээд усан үзэм тариалжээ.

²¹Үүний дараа тэрээр усан үзмийнхээ дарснаас ууж согтоод, майхан дотроо нүцгэн байв.

²²Эцгийнхээ нүцгэн байгааг Канааны эцэг Хам хараад гадагш гарч хоёр ахдаа хэлжээ.

²³Шем, Иафет хоёр нэг дээл авч мөрөн дээрээ нөмрөөд, ар тийшээ ухарсаар эцгийнхээ нүцгэн биед нөмөргөөд, нүцгэн байгааг нь харахгүйн тулд нүүр буруулав.

²⁴Ноагийн согтуу нь гарч, бага хүү нь түүнд юу хийснийг мэдээд

²⁵Канаан хараал идэж, ах нарынхаа боолын боол болог! гэжээ.

²⁶Бас тэрээр Шемийн Бурхан ЭЗЭНийг би магтъя. Канаан Шемийн боол болох болтугай!

²⁷Бурхан Иафетыг[29] үлэмж өсгөж, Иафетыг Шемийн майханд амьдруулж, Канаан түүний боол болох болтугай! гэжээ.

²⁸Үер болсноос хойш Ноа гурван зуун тавин жил амьдраад

²⁹есөн зуун тавин насандаа үхэв.