Read Ariun Bible 2013 – Ариун Библи 2013 2Самуел 1 Bible Online

2Самуел 1 - Ariun Bible 2013 – Ариун Библи 2013 bible

2Самуел 1

¹Саулыг өөд болсны дараа Давид амалекчуудыг бут цохиод буцаж ирэхдээ Зиклагт хоёр хоног байв.

²Харагтун, гурав дахь өдөр нь нэгэн хүн Саулын хуарангаас иржээ. Тэрээр хувцсаа урж, толгой дээрээ тоос шороо цацсан байв. Тэр Давид уруу дөхөн ирээд, газар унаж, мөргөв.

³Тэгэхэд Давид түүнээс —Чи хаанаас ирэв? гэж асуухад тэр Давидад —Би Израилийн хуарангаас зугтаж ирлээ гэв.

⁴Давид түүнд —Юу болов? Надад хэл гэхэд тэр —Ард олон тулалдааны талбараас зугтааж бас олон хүн унан үхэв. Саул, түүний хөвгүүн Ионатан нар ч бас үхэв гэлээ.

⁵Мэдээ хүргэж ирсэн тэр залууд Давид —Саул болон түүний хөвгүүн Ионатан үхсэн гэдгийг чи яаж мэдэв? гэв.

⁶Давидад мэдээ хүргэсэн залуу —Намайг Гилбоа ууланд санаандгүй очтол, харагтун, Саул жадаа налж байсан бөгөөд тэрэгт цэрэг болон морин цэргүүд цаахна талд нь хариугүй гүйцээд ирсэн.

⁷Саул арагшаа эргэж, намайг хараад дуудахад “Би энд байна” гэж би хариулсан юм.

⁸Саул надаас “Чи хэн бэ?” гэж асуусанд “Би амалек хүн байна” гэсэн билээ.

⁹Саул надад “Над уруу ойртож ирээд, намайг алагтун. Учир нь би тэлчлэн зововч амь минь надаас зуурсаар байна” гэсэн.

¹⁰Тэгэхэд би түүний дэргэд очиж, түүнийг алав. Учир нь тэр нэгэнт унасан хойно, амьд үлдэж чадахгүй гэдгийг би мэдсэн билээ. Би түүний толгойн титэм, гарын бугуйвчийг нь авч ийш эзэндээ авчирлаа гэв.

¹¹Давид хувцсаа хүү татан урсанд түүний хамт байсан бүх хүн мөн тэгэв.

¹²Саул, түүний хөвгүүн Ионатан, ЭЗЭНий хүмүүс буюу Израилийн гэр илдээр цохиулсны төлөө тэд гашуудан уйлж, үдэш болтол мацаг барив.

¹³Давид мэдээ хүргэж ирсэн залуугаас —Чи хаанахын хүн бэ? гэхэд залуу —Би ирмэл хүн болох амалек хүний хүү гэж хариулав.

¹⁴Тэгэхэд Давид —Чи ЭЗЭНий тосолсон хүнийг алахаар гар сунгахаас юунд эмээсэнгүй вэ? гэв.

¹⁵Давид залуу эрсийн нэгийг дуудан —Очоод түүнд халдагтун гэсэнд тэрээр түүнийг цохиж алав.

¹⁶Давид түүнд —“ЭЗЭНий тосолсон хүнийг би алав” гэж ам чинь чамайг гэрчилсэн тул чиний цус толгой дээр чинь бууг гэж хэлэв.

¹⁷Дараа нь Саул түүний хөвгүүн Ионатан нарын төлөө Давид энэхүү гашуудлын дууг дуулж,

¹⁸(тэрээр энэхүү нумын дууг Иудагийн хөвгүүдэд сургахыг тэдэнд тушаав. Харагтун, энэ нь Иашарын номд бичигдсэн ажээ.)

¹⁹Алдартнууд чинь өндөрлөгүүд дээр чинь Алуулан хэвтэж байна, Израиль аа! Хүчтэнүүд чинь яахин цохигдов!

²⁰Эл явдлыг Гатад бүү мэдээл, Ашкелоны гудамжинд ч бүү тунхаглуул. Эс бөгөөс филистчүүдийн охидыг баярлуулах гэж үү, Хозлуулаагүйчүүдийн охидыг хөөргөх гэж үү.

²¹Өө, Гилбоагийн уулс аа, Та нарын дээр шүүдэр бүү унаг, бороо бүү орог. Талбай дүүрэн анхны үр жимсэн өргөл ч бүү байг. Учир нь тэнд баатруудын бамбай бузартан Саулын бамбай эс тослогдов.

²²Нэвт харвуулагсдын цусгүйгээр бас баатруудын өөхгүйгээр Ионатаны нум нэгээхэн ч эргэж ирээгүй билээ. Саулын илд ч хоосон буцаагүй билээ.

²³Хайрт эрхэм Саул Ионатан хоёр амьддаа ч, үхэхдээ ч эс хагацав. Тэд бүргэдээс ч хурдан, арслангаас ч хүчтэй байлаа.

²⁴Израилийн охид оо, Та нарыг час улаан тансаг хувцсаар гоёж, Өмсгөлийн чинь дээр алтан чимгийг зүүж өгсөн Саулын төлөө уйлагтун.

²⁵Тулалдааны дунд баатрууд хэрхэн унаа вэ! Өндөрлөгүүд дээр чинь Ионатан нэвт харвуулан хэвтэж буй.

²⁶Ах Ионатан минь, таны төлөө би зовон шаналж байна. Та намайг бүхнээс илүү хайрладаг байлаа. Таны хайр надад бүсгүйн хайраас илүү гайхамшигтай байв.

²⁷Юуны учир баатрууд унаж, тулааны зэвсэг мөхнө вэ!