Read Ariun Bible 2013 – Ариун Библи 2013 2Самуел 10 Bible Online

2Самуел 10 - Ariun Bible 2013 – Ариун Библи 2013 bible

2Самуел 10

¹Тэгтэл аммончуудын хаан өөд болж хүү Ханун нь түүний оронд хаан болов.

²Тэгэхэд Давид —Эцэг нь надад энэрэл хайр үзүүлсний адил, би Нахашийн хүү Ханунд энэрэл хайрыг үзүүлье гээд, эцгийнх нь тухайд түүнийг тайтгаруулахаар хэсэг зарцаа явуулав. Давидын зарц нарыг аммончуудын нутагт ирэхэд

³аммончуудын ноёд өөрсдийн эзэн Ханунд —Танд тайтгаруулагчдыг илгээснээрээ Давид эцгийг тань хүндэлж байна гэж та бодож байна уу? Хотыг маань судлан тандаж, тэгээд орвонгоор нь хөмрүүлэх гэж Давид танд зарц нараа явуулсан бус уу? гэв.

⁴Тиймээс Ханун, Давидын зарц нарыг барьж, тэдний сахлын талыг нь хусаад, хувцсыг өгзөг хавиар, голоор нь тайраад, буцааж явуулав.

⁵Давидад энэ тухай айлтгасанд тэрээр тэдэн уруу хүн явууллаа. Учир нь эрчүүд маш их ичиж байжээ. Хаан —Сахлаа ургатал Иериход байж байгаад дараа нь буцаж ирцгээ гэж хэлүүлэв.

⁶Давидад жигшигдэх болсноо хараад Аммоны хөвгүүд хүмүүс илгээн Бет-рехобын арамчууд болон Зобагийн арамчууд болох хорин мянган явган цэргийг мөн Маакагийн хааныг нэг мянган цэрэг болон Тобын арван хоёр мянган эрийн хамт хөлслөн авав.

⁷Давид үүнийг сонсоод Иоабыг, хамаг цэргүүд болох хүчит эрстэйгээ илгээв.

⁸Аммоны хөвгүүд гарч ирэн гулдан хаалганы үүдэнд тулалдааны жагсаалаар жагссан бөгөөд Зоба болон Рехобын арамчууд мөн Тоб болон Маакагийн хүмүүс задгай талд тусдаа байцгаав.

⁹Тулалдаан түүний урд ба ард талд нь байгааг Иоаб хараад Израилийн шилдэг зарим эрчүүдийг сонгон авч тэднийг арамчуудын эсрэг жагсаан байрлуулав.

¹⁰Харин үлдсэн хүмүүсийг өөрийн дүү Абишаигийн гарт даатгасан бөгөөд тэрээр Аммоны хөвгүүдийн эсрэг тэднийг жагсаан байрлуулав.

¹¹Иоаб —Хэрэв арамчууд надаас илүү хүчтэй байвал чи надад туслагтун. Харин Аммоны хөвгүүд чамаас хүчтэй байвал би чамд туслахаар очно.

¹²Тууштай байгтун. Ард түмнийхээ хийгээд Бурханыхаа хотуудын төлөө зоригтой байцгаая. Мэлмийдээ тааламжтай гэснээ ЭЗЭН үйлдэх болтугай гэв.

¹³Ингээд Иоаб болон түүнтэй хамт байсан хүмүүс арамчуудтай тулалдахаар ойртсонд тэд түүний өмнөөс зугтав.

¹⁴Аммоны хөвгүүд арамчуудын зугтахыг хараад өөрсдөө бас Абишаигаас зугтаж хот уруу оров. Тэгээд Иоаб Аммоны хөвгүүдтэй дайтахаас буцан Иерусалимд эргэж ирлээ.

¹⁵Харин арамчууд Израильд ялагдсанаа хараад тэд цуглан чуулав.

¹⁶Тэгээд Хададезер хүмүүсийг илгээн Евфрат мөрний чанад дахь арамчуудыг авчруулсанд тэд Хададезерын цэргийг тэргүүлэгч жанжин Шобахын хамт Хеламд ирцгээжээ.

¹⁷Үүнийг Давидад хэлсэнд тэрээр хамаг Израилийг хамтад нь цуглуулж, Иорданыг гатлан Хеламд ирэв. Арамчууд Давидын эсрэг жагсаж, түүнтэй тулалдлаа.

¹⁸Гэвч арамчууд Израилиас зугтаасан бөгөөд Давид арамчуудаас долоон зуун тэрэгт цэрэг, дөчин мянган морьт цэргийг алж, цэргийн жанжин Шобахыг шархдуулсанд тэрээр тэндээ үхэв.

¹⁹Хададезерын зарц байсан бүх хаад Израильд цохигдсоноо хараад Израильтай энхийг тогтоон тэдэнд зарагдах болов. Ингээд арамчууд Аммоны хөвгүүдэд дахин туслахаасаа айдаг болжээ.