Read Ariun Bible 2013 – Ариун Библи 2013 2Самуел 12 Bible Online

2Самуел 12 - Ariun Bible 2013 – Ариун Библи 2013 bible

2Самуел 12

¹Дараа нь ЭЗЭН, Натаныг Давид уруу илгээсэнд тэр Давид дээр ирж —Нэгэн хотод хоёр хүн байжээ. Нэг нь баян, нөгөө нь ядуу зүдүү хүн байв.

²Баян хүн нь үлэмж их хонь болон үхэр сүрэгтэй байжээ.

³Харин ядуу нь өөрөө худалдан авч тэжээсэн нэг бяцхан охин хурганаас өөр юу ч үгүй юмсанж. Хурга түүнтэй болон хүүхдүүдтэй нь хамт өсөн бойжиж, талхнаас нь идэж, аяганаас нь ууж, өвөрт нь унтаж, тэр хүнд яг л охины нь адил байв.

⁴Гэтэл баян хүнийд аянчин иржээ. Өөр дээр нь ирсэн аянчинд зориулан өөрийн хонь болон үхэр сүргээс төхөөрөхийг баян хүн хүссэнгүй. Харин тэрээр ядуу хүний охин хургыг авч, өөр дээр нь ирсэн хүнд зориулан төхөөрчээ гэв.

⁵Тэгэхэд Давид тэр хүнд ихэд хилэгнэж Натанд —ЭЗЭН амьд! Үүнийг үйлдэгч нь үхэг.

⁶Тэр хүнд өрөвдөх сэтгэл байсангүй бөгөөд ийм хэрэг үйлдсэн учраас охин хурганы төлөө тэрээр дөрөв нугалж төлөх ёстой гэв.

⁷Тэгэхэд Натан, Давидад —Тэр хүн нь та билээ! Израилийн Бурхан ЭЗЭН айлдахдаа “Чамайг Израилийн хаанаар тослон томилсон бөгөөд Саулын гараас аварч гаргасан нь Би билээ.

⁸Бас чамд эзний чинь гэрийг мөн түүний эхнэрүүдийг өвөрт чинь өгч, Израиль болон Иудагийн гэрийг даатгасан нь Би билээ. Хэрэв энэ нь дэндүү багадсан бол Би чамд энэ мэт зүйлсийг илүү ихээр нэмж өгөх байсан!

⁹Юунд чи ЭЗЭНий мэлмийд ёрын мууг үйлдэн Түүний үгийг үл тоомсорлов? Чи хит хүн Уриаг илдээр алсан бөгөөд эхнэрийг нь өөрийн эхнэр болгон авч, өөрийг нь Аммоны хөвгүүдийн илдээр алуулав.

¹⁰Тиймээс одоо чиний гэрээс хэзээ ч илд салахгүй. Учир нь чи Намайг үл тоомсорлож, хит хүн Уриагийн эхнэрийг өөрийн эхнэр болгон авсан” гэлээ.

¹¹Бас ЭЗЭН ингэж айлдаж байна. “Үзэгтүн, Би гэрийнхний чинь дотроос чиний эсрэг бузар хөнөөлийг гаргана. Би чиний нүдэн дээр эхнэрүүдийг чинь авч хөршид чинь өгнө. Тэр хүн гэгээн цагаан өдөр чиний эхнэрүүдтэй унтах болно.

¹²Чи энэ явдлыг нууцаар үйлдсэн бол, харин Би хамаг Израилийн өмнө, гэгээн цагаан өдөр үүнийг гүйцэлдүүлнэ” гэсэн гэж хэлэв.

¹³Тэгэхэд Давид, Натанд —Би ЭЗЭНий эсрэг нүгэл үйлдлээ гэв. Натан, Давидад —ЭЗЭН чиний нүглийг тайлсан тул чи үхэхгүй.

¹⁴Гэлээ ч хийсэн энэ хэргээрээ чи ЭЗЭНий дайснуудад доромжлох боломжийг өгсөн тул чиний хүү заавал үхнэ гэлээ.

¹⁵Ингээд Натан гэр өөдөө буцав. Уриагийн бэлэвсэн эхнэрийн Давидад төрүүлсэн хүүг ЭЗЭН цохисонд тэр хөвгүүн хүнд өвчинд нэрвэгдэв.

¹⁶Тиймээс Давид тэр хүүхдийн төлөө Бурханаас гуйж, мацаг барьсаар гарч орж, шөнөжингөө газар хэвтэв.

¹⁷Түүний гэрийн ахмадууд дэргэд нь зогсон, түүнийг газраас босгох гэсэн боловч Давид босохыг хүссэнгүй мөн тэдэнтэй хамт хоол ч идсэнгүй.

¹⁸Долоо дахь өдөр хөвгүүн нь өөд болжээ. Давидын зарц нар “Харагтун, хөвгүүнийг амьд байхад бид хааныг ятгасан ч тэр бидний дуу хоолойг сонсоогүй. Хөвгүүн нь өөд болсныг одоо хэлбэл хаан өөртөө хор хүргэж магадгүй тул хаанд яаж хэлэх вэ?” гэлцэж, хөвгүүнийг өөд болсныг Давидад хэлэхээс айж байв.

¹⁹Харин Давид зарц нарынхаа шивнэлдэхийг хараад, хөвгүүн өөд болсныг ойлголоо. Ийнхүү Давид зарц нараасаа —Хөвгүүн өөд болсон уу? гэж асуухад тэд —Тийм ээ, тэр өөд болов гэв.

²⁰Ингээд Давид газраас босож, угаал үйлдэн биеэ тослоод, хувцсаа солив. Тэр ЭЗЭНий өргөөнд орж хүндэтгэн мөргөв. Дараа нь гэртээ хариад хоол хийлгэж идэв.

²¹Тэгтэл зарц нар нь —Таны үйлдсэн энэ хэрэг ямар учиртай юм бэ? Хөвгүүн амьд байхад та мацаг барьж, уйлж байсан, харин хөвгүүн өөд болоход та босож, хоол идлээ гэлцэв.

²²Давид —Хөвгүүнийг амьд байх үед би мацаг барин, уйлж байсан нь “ЭЗЭН намайг нигүүлсэж, хөвгүүнийг амьдруулах магад” хэмээн санасны учир юм.

²³Гэтэл одоо тэр өөд болчихлоо. Би юунд мацаг барих ёстой билээ? Би түүнийг дахин эргүүлж авчирч чадах бил үү? Би өөрөө түүн дээр очих болно. Харин тэр над дээр эргэж ирэхгүй гэв.

²⁴Тэгээд Давид өөрийн эхнэр Батшебаг тайтгаруулан түүн дээр орж, түүнтэй унтав. Тэр эмэгтэй хүү төрүүлээд түүнийг Соломон гэж нэрлэжээ. ЭЗЭН түүнийг хайрласан бөгөөд

²⁵эш үзүүлэгч Натаны гараар мэдээ илгээн ЭЗЭНий төлөө Иедидиа[19] гэж түүнийг нэрлэлээ.

²⁶Тэр үед Иоаб, Аммоны хөвгүүдийн Раббагийн эсрэг тулалдан хаан хотыг нь эзэлж авав.

²⁷Иоаб, Давидад элч нарыг илгээн —Би Раббагийн эсрэг дайтаад усны хотыг нь хүртэл эзэлж авлаа.

²⁸Тиймээс одоо, ард олноос үлдсэн хүмүүсийг хамтад нь цуглуулж, тэр хотын эсрэг хуарагнан, түүнийг эзлэн авагтун. Эс тэгвээс би өөрөө энэ хотыг эзэлж аван энэ нь миний нэрээр нэрлэгдэх болно гэж хэлүүлэв.

²⁹Иймээс Давид бүх ард олноо цуглуулж Рабба уруу очоод түүний эсрэг дайтаж, хотыг эзэлж авчээ.

³⁰Тэгээд тэрээр тэдний хааны[20] титмийг толгойноос нь авчээ. Титэм нэг талант алтны жинтэй бөгөөд эрдэнийн чулуу суулгасан байв. Тэр титмийг Давидын толгойд өмсгөжээ.[21] Тэр хотоос Давид маш их хэмжээний олз омог авчрав.

³¹Давид бас тэр хотод байсан хүмүүсийг авчран хөрөө, ирт төмөр зээтүү ба төмөр сүхээр хийх ажилд тавьж,[22] тоосго цохиулав. Аммоны хөвгүүдийн бүх хотод Давид энэ мэтээр үйлдэв. Тэгээд Давид болон бүх ард олон Иерусалимд буцаж ирэв.