Read Ariun Bible 2013 – Ариун Библи 2013 2Самуел 13 Bible Online

2Самуел 13 - Ariun Bible 2013 – Ариун Библи 2013 bible

2Самуел 13

¹Дараа нь ийм явдал болов. Давидын хүү Абсаломд Тамар нэртэй маш үзэсгэлэнт охин дүү байсан бөгөөд Давидын хүү Амнон түүнд дурлажээ.

²Амнон дүү охин Тамараас болж маш их шаналсны улмаас өвдөв. Учир нь Тамар онгон байсан бөгөөд түүнд ямар нэг юм хийхэд Амнонд хэцүү санагдаж байв.

³Гэвч Амнонд Давидын ах Шимеагийн хүү Ионадаб гэдэг нэгэн найз байлаа. Ионадаб их зальтай хүн байв.

⁴Тэр Амнонд —Хааны хүү минь, юунд та өглөөнөөс өглөөд ийм дарамттай байна вэ? Та надад хэлэхгүй юм уу? гэхэд Амнон түүнд —Би дүү Абсаломынхаа охин дүү Тамарт дурлав гэлээ.

⁵Тэгэхэд Ионадаб түүнд —Орондоо хэвтэж, өвчтэй мэт дүр үзүүл. Эцэг чинь чамайг эргэхээр ирэхэд нь түүнд “Дүү охин Тамарыг ирүүлж, миний нүдний өмнө хоол ундыг минь бэлдүүлээч. Би үүнийг нь харж, Тамарын гараас талх идмээр байна” гэж хэл гэв.

⁶Иймээс Амнон хэвтэж, өвчтэй мэт дүр үзүүлэв. Хаан түүнийг эргэхээр ирэхэд нь Амнон хаанд —Дүү охин Тамарыг ирүүлж, миний нүдний өмнө надад хэдэн боов хийлгүүлж, надад түүний гараас идэхийг зөвшөөрөөч гэв.

⁷Тэгэхэд Давид Тамарыг авчруулахаар гэр уруу нь хүн явуулж —Амнон ахынхаа гэрт очиж, түүнд хоол хийж өгөгтүн гэж хэлүүлэв.

⁸Иймээс Тамар, Амнон ахынхаа гэрт ирсэн бөгөөд тэр хэвтэж байв. Тамар зуурсан гурил авч нухсаар, нүднийх нь өмнө боов хийж жигнэв.

⁹Тэр эмэгтэй тогоог авч, түүний өмнө боовыг тавьсан боловч Амнон идэхээс татгалзав. Амнон —Цөмөөрөө эндээс гарцгаа гэсэнд бүгд өрөөнөөс нь гарав.

¹⁰Дараа нь Амнон Тамарт —Хоолыг дотоод өрөөнд авчир. Би чиний гараас л иднэ гэв. Тамар өөрийн хийсэн боовыг Амнон ахынхаа дотоод өрөөнд авч очиж,

¹¹Амнонд идүүлэхээр авчиртал, Амнон түүнийг хүчээр тэвэрч —Дүү минь, надтай унт гэв.

¹²Харин Тамар —Болохгүй, ах минь. Намайг бүү гутаагаач. Израильд ийм зүйл хийдэггүй шүү дээ. Эрээ цээргүй ийм юм бүү үйлдээч!

¹³Ийм гутамшигтайгаар би хааш явах вэ? Та ч гэсэн Израильд мунхаг нэгэн мэт тооцогдоно шүү дээ. Иймээс гуйя, одоо хаанд айлтгагтун. Учир нь тэр намайг танаас харамлахгүй гэв.

¹⁴Гэвч Амнон түүний үгийг сонсохыг хүссэнгүй. Амнон түүнээс илүү хүчтэй тул түүнийг хүчирхийлэн түүнтэй унтжээ.

¹⁵Дараа нь Амнон түүнийг маш ихээр үзэн ядав. Тэр үзэн ядалт нь түүнийг хайрлаж байсан хайраас нь ч илүү хүчтэй байлаа. Амнон түүнд —Босоод, зайл! гэв.

¹⁶Харин Тамар түүнд —Үгүй. Намайг хөөж гаргах нь таны надад үйлдсэн бузар хэргээс ч илүү бузар байна шүү дээ гэсэн боловч тэр Тамарыг сонсохыг хүссэнгүй.

¹⁷Тэгээд Амнон зарц залуугаа дуудан —Энэ эмийг надаас хөөж гаргаад, үүдээ түгж гэж тушаав.

¹⁸Амноны зарц түүнийг хөөж гаргаад, үүдээ түгжив. Тамар ханцуйтай урт хувцас[23] өмссөн байв. Хааны онгон гүнжүүд ийм хувцас өмсдөг байлаа.[24]

¹⁹Тамар толгой дээрээ үнс цацаад, ханцуйтай урт хувцсаа урж, толгой дээрээ гараа тавин чангаар орилсоор явав.

²⁰Түүний ах Абсалом түүнд —Чиний ах Амнон чамтай хамт байсан уу? Харин одоо, дүү минь, дуугүй бай. Тэр чинь чиний ах шүү дээ. Энэ явдлыг зүрхэндээ бүү хадгал гэв. Ийнхүү Абсалом ахынхаа гэрт Тамар үлдээд, ганцаар амьдрав.

²¹Давид хаан эдгээр бүх хэргийн талаар сонсоод ихэд уурлан хилэгнэлээ.

²²Харин Абсалом, ах Амнондаа сайн муу юу ч ярьсангүй. Охин дүү Тамарыг нь хүчирхийлсэн учир Амноныг Абсалом үзэн ядаж байв.

²³Түүнээс хойш хоёр жил өнгөрсний дараа Абсалом Ефраимын ойролцоо Баал-хазорт хонь хяргах баяр хийн, хааны бүх хөвгүүнийг урив.

²⁴Абсалом, хаанд бараалхан —Харагтун, боол тань ноос хяргах баяр хийх учир хаан та өөрийн зарц нарын хамт боол надтай яваач гэв.

²⁵Гэвч хаан, Абсаломд —Үгүй, хүү минь, бид бүгдээрээ явах хэрэггүй. Учир нь бид чамд хүнд дарамт болж магадгүй гэв. Абсалом хичнээн ятгасан ч Давид явсангүй, харин түүнийг ерөөв.

²⁶Тэгэхэд нь Абсалом —Тэгвэл миний ах Амноныг бидэнтэй хамт явуулаач гэж гуйхад хаан түүнээс —Яагаад тэр чамтай явах ёстой билээ? гэж асуув.

²⁷Гэвч Абсалом түүнийг ятгасан бөгөөд тэр Амноныг бас хааны бүх хөвгүүнийг түүнтэй хамт явуулав.[25]

²⁸Тэгээд Абсалом зарц нартаа тушааж —Одоо анхаар! Амноны зүрх дарсанд хөгжин баясахад мөн би та нарт “Амноныг цохигтун” гэж хэлмэгц түүнийг алагтун. Бүү айцгаа. Би өөрөө та нарт тушааж байгаа бус уу? Хүчтэй бас зоригтой бай! гэв.

²⁹Ингээд Абсаломын зарц нар тушаасан ёсоор нь Амноныг алсан билээ. Тэгэхэд хааны хөвгүүд бүгд босож, өөр өөрсдийн луусыг унан зугтацгаав.

³⁰Тэднийг замдаа явж байхад —Хааны бүх хөвгүүнийг Абсалом цохиж аллаа. Тэднээс нэг нь ч амьд үлдсэнгүй гэх мэдээ Давидад ирэв.

³¹Тэгэхэд хаан босож, хувцсаа уран газарт хэвтэв. Түүний бүх зарц нар дэргэд нь хувцсаа уран зогсож байлаа.

³²Харин Давидын ах Шимеагийн хүү Ионадаб хариулан —Хааны хөвгүүд болох тэдгээр залуус бүгд алагдав гэж эзэнтэн минь бүү бод. Амнон л үхжээ. Учир нь дүү охин Тамарыг нь Амнон хүчирхийлсэн өдрөөс Абсаломын ингэх нь тодорхой байсан юм.

³³Тиймээс одоо “Хааны бүх хөвгүүн алагдав” гэсэн энэ мэдээг эзэн хаан минь зүрхэндээ бүү тээ. Учир нь ганцхан Амнон л үхэв гэлээ.

³⁴Харин Абсалом зугтлаа. Харуул залуу харцаа өргөтөл, үзэгтүн, түүний арын уулын хажуугийн замаар[26] олон хүн ирж явав.

³⁵Ионадаб, хаанд —Харагтун, хааны хөвгүүд ирчихээд байна. Таны боолын хэлсний дагуу болжээ гэв.

³⁶Түүнийг тийнхүү айлтгамагц, харагтун, хааны хөвгүүд орж ирж, бархиран уйлалдав. Мөн хаан болон түүний хамаг зарц нар ихэд цурхиран уйлалдав.

³⁷Абсалом зугтан Гешурын хаан Аммихудын хүү Талмаи уруу очжээ. Харин Давид үхсэн хүүгийнхээ хойноос өдөр бүр гашуудан гансарч байлаа.

³⁸Ингээд Абсалом зугтан Гешурт очоод тэнд гурван жилийн турш байв.

³⁹Тэгтэл Амноны үхлийн тухайд Давид хаан тайвширсан учраас Абсаломын хойноос явахыг эрмэлзэх болов.