Read Ariun Bible 2013 – Ариун Библи 2013 2Самуел 15 Bible Online

2Самуел 15 - Ariun Bible 2013 – Ариун Библи 2013 bible

2Самуел 15

¹Дараа нь Абсалом өөртөө хөсөг тэрэг болон морьд бэлтгэж мөн өөрийнхөө урд гүйлгэх тавин хүнтэй болов.

²Абсалом өглөө эртлэн босож, хаалгаар өнгөрөх замын дэргэд зогсдог болов. Хаанаар шүүлгэхийн тулд ирж буй заргатай хүн байвал Абсалом тэднийг дуудан —Чи аль хотын хүн бэ? гэхэд уг хүн —Таны боол би Израилийн ийм ийм овгийн хүн байна гэхчлэн хариулдаг байв.

³Тэгэхэд Абсалом түүнд —Хараач, чиний хэрэг сайн хийгээд зүйтэй юм. Харин хааны зүгээс чамайг сонсох хүн нэг ч байхгүй гэж хэлдэг байв.

⁴Түүнчлэн Абсалом —Аяа, хэн нэгэн намайг энэ улсын шүүгчээр томилдогсон бол шүүх зарга бүхий хүн бүр над дээр ирэхэд би шударга байхсан гэдэг байв.

⁵Хэн нэгэн түүнд ойртон ирж хүндэтгэн мөргөхөд тэр гараа сунган өнөөх хүнийг тэвэрч үнсдэг байжээ.

⁶Шүүгдэхийн тулд хаан дээр ирсэн бүх израильтай Абсалом ингэж харьцдаг байв. Абсалом Израилийн хүмүүсийн зүрхийг ийн эзэмджээ.

⁷Дөрвөн[30] жил өнгөрөхөд Абсалом, хаанд —ЭЗЭНд өргөсөн тангаргаа би биелүүлэхийн тулд намайг Хеброн уруу явуулаач.

⁸Таны боол би Арамын Гешурт байхдаа “Хэрэв ЭЗЭН намайг үнэхээр Иерусалимд буцаан авчирвал би ЭЗЭНд[31] үйлчлэх болно” гэж тангарагласан юм гэв.

⁹Хаан түүнд —Амар тайван явтугай гэж айлдсанд тэрээр босож Хеброн уруу явав.

¹⁰Гэхдээ Абсалом Израилийн бүхий л овог аймгаар тагнуул илгээж —Эвэр бүрээний дууг сонсонгуутаа та нар “Абсалом Хебронд хаанчилдаг” хэмээгтүн гэж хэлүүлэв.

¹¹Тэгээд хоёр зуун хүн Абсаломын хамт Иерусалимаас явав. Тэр хүмүүс уригдаж явсан бөгөөд юу болж байгааг ч мэдээгүй, гэмгүй хүмүүс байв.

¹²Абсалом тахил нядлан тахиж байх зуураа хүн явуулж Давидын зөвлөх Гилогийн Ахитофелийг өөрийнх нь хот Гилогоос дуудаж авчрав. Абсаломтай нэгдэх хүмүүс нэмэгдсээр байсан тул хуйвалдаан ч хүчтэй байв.

¹³Давид дээр нэгэн элч ирж —Израилийн хүмүүсийн зүрх Абсаломыг дагаж байна гэж хэлэв.

¹⁴Тэгэхэд Давид Иерусалимд өөртэй нь хамт байсан бүх түшмэлдээ —Босоцгоо, зугтацгаая. Эс тэгвээс бидний хэн нь ч Абсаломаас оргон зайлж чадахгүй. Бушуулцгаа. Тэр биднийг үтэр гүйцэж гай учруулан илдний ирээр энэ хотыг устгах вий гэлээ.

¹⁵Хааны зарц нар хаанд —Үзэгтүн, хаан эзнийхээ тааллаар хэлсэн бүхнийг тань бид биелүүлэхэд бэлэн байна гэцгээв.

¹⁶Ингээд хаан гарч явахад гэрийнхэн нь бүгд түүнийг даган гарав. Харин хаан гэрээ сахиулахаар арван татвар эмийг үлдээв.

¹⁷Хаан ба түүнтэй хамт байсан бүх ард олон гарч, захын гэрийн дэргэд зогсов.

¹⁸Хамаг түшмэл нь хааны хажуугаар өнгөрөн,[32] бүх керетчүүд болон бүх пелетчүүд, хаантай хамт Гатаас ирсэн зургаан зуун гит хүн бүгд хааны өмнүүр явж өнгөрөв.

¹⁹Тэгэхэд хаан гит хүн Иттаид —Юунд чи бас бидэнтэй хамт явна вэ? Буцаж хаантай хамт үлд. Чи гаднын хүн бас нутгаасаа дайжсан хүн шүү дээ.

²⁰Чи дөнгөж өчигдөр л ирчихээд өнөөдөр бидний хамт хэрэн хэсүүчлэх хэрэг үү? Би хандсан зүгтээ л арилж өгнө. Тиймээс чи өөрийн ах дүү нараа аваад буц даа. Энэрэл хайр ба үнэн нь чамд байг[33] гэв.

²¹Харин Иттаи хаанд —ЭЗЭН амьд! Бас хаан эзэн минь амьд! Амьд ч бай, үхсэн ч бай эзэн хаан минь хаа байгаа газар, боол би тантай хамт байна гэж хариулав.

²²Тиймээс Давид, Иттаид —Явж, өнгөрөгтүн гэв. Ингээд гит хүн Иттаи, хамаг хүмүүс болон өөртэй нь хамт байсан бүхий л багачуудын хамтаар явж өнгөрөв.

²³Орон даяар орь дуу болон гашуудаж байх үед мөнөөх олон явж өнгөрөв. Хаан Кидрон гууг гатлахад мөнөөх олон ч цөлийн зам тийш гатлан гарав.

²⁴Харагтун, Задок бүх леви хүмүүсийн хамт Бурханы гэрээний авдрыг авчраад, буулган тавьж,[34] хамаг ард олныг хотоос гарч дуустал нь Бурханы авдрыг Абиатарын[35] хажууд байлгав.

²⁵Хаан, Задокт —Бурханы авдрыг хот уруу буцаан аваач. Хэрэв би ЭЗЭНий мэлмийд тааллыг олбол ЭЗЭН намайг дахин буцааж авчран, авдар болон Өөрийн оршихуйг үзүүлэх болно.

²⁶Харин Тэр “Би чамайг сайнаар таалдаггүй” гэж хэлбэл, харагтун, би энд байна. Мэлмийдээ тааламжтай гэснээ Тэр надад үйлдэх болтугай гэв.

²⁷Түүнчлэн хаан, тахилч Задокт —Чи үзмэрч биш үү?[36] Чи хоёр хөвгүүн болох өөрийн хүү Ахимааз болон Абиатарын хүү Ионатаныг дагуулан хот уруу амар тайван буцагтун.

²⁸Харагтун, та нараас мэдүүлэх үг ирэн иртэл, би цөлийн замд хүлээнэ гэв.

²⁹Задок, Абиатар нар Бурханы авдрыг Иерусалим уруу буцааж аваачин тэнд нь үлдээв.

³⁰Харин Давид, Чидун өгсүүр өөд мацахдаа уйлан толгойгоо бүтээж, хөл нүцгэн явав. Мөн түүнтэй хамт байсан хамаг ард олон толгойгоо бүтээж, уйлан явав.

³¹Давидад —Абсаломтай хуйвалдагчдын дунд Ахитофел байна гэж мэдэгдэхэд Давид —ЭЗЭН минь, Ахитофелын зөвлөгөөг мунхаглал болгооч гэж гуйж байна гэв.

³²Бурханд мөргөл үйлдэх оргил дээр Давидыг ирэх үед, харагтун, гадуур хувцсаа урж, толгой дээрээ тоос шороо цацсан архе хүн Хушаи Давидтай уулзав.

³³Давид түүнд —Хэрэв чи надтай хамт явбал чи надад тээр болно.

³⁴Харин чи хот уруу буцаж, Абсаломд “Хаантан минь, урьд нь эцгийн тань зарц байсны адил одоо би таны зарц болъё” гэж хэлбэл Ахитофелын зөвлөгөөг миний төлөө бүтэлгүй болгож чадна.

³⁵Чи тэнд тахилч Задок, Абиатар нартай хамт байх бус уу? Тиймээс чи хааны өргөөнд сонссон болгоноо тахилч Задок, Абиатар нарт дамжуулагтун.

³⁶Харагтун, тэдний хоёр хөвгүүн нь буюу Задокийн хөвгүүн Ахимааз, Абиатарын хөвгүүн Ионатан нар тэнд тэдэнтэй хамт байна. Сонссон болгоноо надад тэднээр дамжуулсугай гэв.

³⁷Тэгээд Давидын анд нөхөр Хушаи хот уруу буцав. Тэр үед Абсалом ч Иерусалимд ирэв.