Read Ariun Bible 2013 – Ариун Библи 2013 2Самуел 17 Bible Online

2Самуел 17 - Ariun Bible 2013 – Ариун Библи 2013 bible

2Самуел 17

¹Цаашилбал Ахитофел, Абсаломд —Арван хоёр мянган хүнийг шилж авч босоод, энэ шөнө Давидыг нэхэн хөөхийг зөвшөөрнө үү.

²Түүнийг эцэж сульдсан байх үед нь би түүнийг дайрч, түүнтэй хамт байгаа бүх хүмүүсийг зугтах болтол түүнийг түйвэргэе. Тэгээд би зөвхөн хааныг нь алъя.

³Би хамаг ард олныг тан дээр буцааж авчирна. Хүн бүрийн буцаж ирэх нь таны хайж буй ганцхан хүнээс шалтгаалж байна. Тэгсний дараа хүн бүхэн амар тайван байх болно гэж хэлэв.

⁴Энэ үг Абсалом болон Израилийн бүх ахмадуудад таалагдав.

⁵Гэвч Абсалом —Архе хүн Хушаиг мөн дууд. Тэр юу гэж хэлэхийг нь сонсъё гэв.

⁶Хушаиг Абсалом дээр очиход Абсалом түүнд ийнхүү хэлэв. —Ахитофел ингэж хэллээ. Бид түүний үгээр болох уу, үгүй юу? Хэрэв үгүй бол, чи үгээ хэлнэ үү? гэв.

⁷Хушаи, Абсаломд —Энэ удаа Ахитофел сайн зөвлөгөө өгсөнгүй гэв.

⁸Тэгээд цааш нь Хушаи —Хээр талд бамбаруушаа булаалгасан эвшийн адил эцэг чинь бас түүний цэргүүд догшин, хүчтэй эрчүүд гэдгийг чи мэднэ. Чиний эцэг дайнд гаргууд мэргэшсэн хүн. Тэрээр ард олонтой хамт шөнийг өнгөрүүлэхгүй.

⁹Хараарай, тэр одоо нэг агуйд, эсвэл ондоо газарт нуугдаж байгаа. Хэрэв таны цэргүүдийг тэр довтолбол, үүнийг сонссон хүн бүр “Абсаломыг дагасан хүмүүсээс олноороо хядуулжээ” гэж хэлнэ.

¹⁰Тэгвэл арслан адил зоригтой хүний ч зүрх мохно. Чиний эцэг хүчит хүн бөгөөд эрэлхэг зоригтой хүмүүс түүнтэй байдаг гэдгийг Израиль даяар мэднэ.

¹¹Харин Данаас Беершеба хүртэлх далайн хөвөөний элс мэт үй олон израильчуудыг бүгдийг нь цуглуулж, та өөрөө тулалдаанд гарагтун гэж би зөвлөх байна.

¹²Түүнийг олж болохоор нэг газарт бид түүн уруу очиж, газар буух шүүдэр мэт түүнийг бид нөмрөн авч, өөрийг нь болон хамт буй хамаг цэргийн нэгийг нь ч амьд үлдээхгүй.

¹³Хэрэв тэрээр аль нэгэн хотод орогновол бүх Израиль тэр хот уруу олс авчран тэнд ганц ч чулуу үлдэхгүй болтол нь тэр хотыг хөндий хүртэл чирнэ гэв.

¹⁴Абсалом болон Израилийн хамаг ард олон —Архе хүн Хушаин зөвлөгөө нь Ахитофелын өгсөн зөвлөгөөнөөс илүү дээр юм гэцгээв. Учир нь ЭЗЭН Абсаломд гай учруулахын тулд Ахитофелын сайн зөвлөгөөг бүтэлгүй болгохоор шийдсэн ажээ.

¹⁵Тахилч Задок Абиатар нарт хандан Хушаи —Абсалом болон Израилийн ахмадуудад Ахитофел тэгж зөвлөхөд нь харин би ийнхүү зөвлөгөө өгөв.

¹⁶Тиймээс одоо хүн яаралтай явуулж Давидад “Энэ шөнө цөлийн замд бүү хоноглоорой. Харин ямар ч байсан тэр газрыг өнгөрч яв. Эс тэгвээс хаан болоод хамт буй хамаг ард олон алагдах вий” гэж хэл гэв.

¹⁷Ионатан Ахимааз нар Ен-Рогелд байв. Тэд хотод нэвтэрч хэнд ч харагдаж болохгүй байсан учир нэгэн шивэгчин эмэгтэй очиж тэдэнд хэлсэнд тэд Давид хаанд хэл хүргэхээр болов.

¹⁸Гэтэл нэг эрэгтэй хүүхэд тэднийг хараад Абсаломд хэлэв. Иймд тэр хоёр яаравчлан явсаар, Бахуримд нэгэн хүний гэрт очив. Тэр хүн хашаандаа худагтай бөгөөд тэд түүн дотор оров.

¹⁹Эмэгтэй бүтээлэг авч ирээд, худгийн амыг бүтээж, дээр нь буудай тараан цацаж, юу ч мэдэгдэхгүй болгов.

²⁰Абсаломын зарц нар тэр эмэгтэйн гэрт ирж —Ахимааз болон Ионатан нар хаана байна вэ? гэхэд тэр эмэгтэй —Тэд горхи гатлаад явсан гэв. Тэд эрж хайсан боловч олж чадалгүй Иерусалим уруу буцав.

²¹Тэднийг явсны хойно тэр хоёр худгаас гарч ирэн Давид хаанд хэл хүргэхээр явав. Тэд Давидад —Голыг түргэн гатлагтун. Учир нь Ахитофел та нарын эсрэг тэгж зөвлөсөн байна гэв.

²²Тэгээд Давид болон түүнтэй хамт байсан хүмүүс бүгд хөдлөн, Иордан голыг гатлав. Үүр цайх үеэр бүх хүн Иордан голыг гаталж дуусжээ.

²³Өөрийнх нь зөвлөгөө бүтээгүйг харсан Ахитофел, илжгээ эмээллэн төрөлх хот уруугаа явж гэртээ буцаж ирээд, гэрийнхэндээ захиас орхин өөрийгөө дүүжилж үхсэнд эцгийнх нь булшинд тавив.

²⁴Тэгээд Давид Маханаимд ирлээ. Абсалом болон түүнтэй хамт байсан Израилийн хүмүүс бүгд Иордан голыг гатлав.

²⁵Абсалом, Иоабын оронд Амасаг цэргийн удирдагчаар томилсон байлаа. Амаса, Иоабын эх Зеруиагийн дүү, Нахашийн охин Абигаилтай гэрлэсэн Итра хэмээгч израиль[39] хүний хөвгүүн байв.

²⁶Ингээд Израиль болон Абсалом, Гилеадын нутагт хуарагнан буув.

²⁷Давидыг Маханаимд ирэхэд Раббагийн Аммоны хөвгүүдээс Нахашийн хөвгүүн Шоби, Ло-дебарын Аммиелын хөвгүүн Махир, Рогелимын гилеад хүн Барзиллаи нар

²⁸ор дэвсгэр, аяга, ваар, буудай, арвай, гурил, шар будаа, шош, зармаг, хуурсан тариа,[40]

²⁹зөгийн бал, цөцгий, хонь, бяслаг зэргийг Давид болон түүнтэй хамт явагчдын хүнсэнд авч ирэв. Учир нь тэд ард олныг цөлд өлсөж ядран цангаж буй хэмээн боджээ.