Read Ariun Bible 2013 – Ариун Библи 2013 2Самуел 19 Bible Online

2Самуел 19 - Ariun Bible 2013 – Ариун Библи 2013 bible

2Самуел 19

¹Иоабт —Харагтун, хаан Абсаломын төлөө уйлан гашуудаж байна гэж мэдэгдэв.

²Хаан хөвгүүнийхээ төлөө гашуудаж байгааг ард олон дуулсан учир, тэр өдрийн ялалт нь хамаг ард олонд эмгэнэл болон хувирав.

³Тулаанаас зугтан гарч ичгүүрт орсон гэтэн явагч нар шиг тэр өдөр ард олон хотод гэтэж нуугдсаар орж ирэв.

⁴Хаан нүүрээ бүтээн чанга дуугаар —Миний хүү Абсалом. Абсалом оо. Миний хүү, миний хүү! гэж орилон хашхирч байв.

⁵Иоаб хааны гэрт очин, хаанд —Та өнөөдөр таны амь болон таны охид хөвгүүдийн амь мөн таны эхнэрүүд болон татвар эмсийн тань амийг аварсан өөрийнхөө бүх зарц нарын нүүрийг эвгүйцлээр хучив.

⁶Учир нь та өөрийг тань үзэн ядагч хүмүүсийг хайрлаж харин хайрлагч хүмүүсийг үзэн ядав. Жанжингууд чинь болон зарц нар чинь таны хувьд юу ч биш гэдгийг та өнөөдөр харууллаа. Хэрэв өнөөдөр Абсалом амьд байгаад, бид зугтан бүгд үхсэн бол энэ нь таны нүдэнд зөв зүйтэй байх байжээ гэж надад ойлгогдож байна.

⁷Тиймээс одоо босож, гадагш гаран зарц нартайгаа элэгсгээр яриач. Би ЭЗЭНээр тангараглая. Та гадагш гарахгүй бол энэ шөнө нэг ч хүн тантай хамт үлдэхгүй. Тэгээд энэ нь таныг залуу байхаас эдүгээ хүртэл танд учирсан ямар ч гай зовлонгоос дор юм болно гэв.

⁸Ингээд хаан босож, хаалганы дэргэд суув. Тэд бүх хүнд —Харагтун, хаан хаалганы хажууд сууж байна гэхэд ард олон бүгд хааны өмнө ирэв. Израиль хүмүүс өөр өөрсдийн майхан уруу бүгд зугтааж буцсан байв.

⁹Израилийн бүх овгуудад хүмүүс маргалдан —Хаан л биднийг дайсны гараас, филистчүүдийн гараас аварч гаргасан. Харин одоо Абсаломаас болж хаан минь газар нутгаасаа зугтав.

¹⁰Бидний тосолж, өргөмжилсөн Абсалом тулалдаанд үрэгдэв. Гэтэл одоо та нар яагаад хааныг буцаан авчрах талаар эс дуугарна вэ? гэцгээж байв.

¹¹Давид хаан тахилч Задок, Абиатар нарт хүн явуулж —Иудагийн ахмадуудад ингэж хэл. “Хамаг Израилийн хэлэлцэн байгаа нь хаанд ч хүрсэн атал та нар юунд хаанаа ордонд нь буцаан авчрахад сүүл барина вэ?

¹²Та нар миний ах дүүс, яс махны минь тасархай. Тийн атал юунд хааныг буцаан авчрахад сүүл барьж байна вэ?”

¹³Бас Амасад “Чи миний яс махны тасархай бус уу? Хэрэв чи цаашид Иоабын оронд миний цэргийн жанжин ямагт эс байваас намайг Бурхан шийтгэг, бүр илүүг үйлдэг!” гэж хэлүүлэв.

¹⁴Ингээд Давид хамаг иуда эрчүүдийн зүрхийг нэг хүний зүрх мэт өөртөө хандуулав. Иудачууд хаанд үг илгээн —Та болоод зарц нар тань эргэн ирнэ үү гэв.

¹⁵Тэгээд хаан эргэн явж Иордан голд хүрэхэд иудачууд хааныг угтан Иордан голыг гатлуулахын тулд Гилгалд иржээ.

¹⁶Бахуримын бениамин хүн Герагийн хөвгүүн Шимеи, Давид хааныг угтахаар яаран иудачуудын хамт ирэв.

¹⁷Түүний хамт мянган бениамин эр мөн Саулын гэрийн зарц Зиба ч арван таван хөвгүүн, хорин зарц нараа дагуулан хааны өмнө Иордан голд иржээ.

¹⁸Ингээд тэд хааны гэрийнхнийг гол гатлуулахын тулд болон түүний таалалд нийцэх зүйлийг хийхээр гармаар гаталсаар байлаа. Герагийн хөвгүүн Шимеи Иордан голыг гаталж байхдаа хааны өмнө газарт хөсөр унав.

¹⁹Тэрээр хаанд —Эзэн минь, намайг хилэнцтэй гэж бүү үзээч. Хаантан минь, Иерусалимаас гарч явсан тэр өдөр боол миний үйлдсэн гэмийг зүрхэндээ бүү хадгалан санаарай.

²⁰Боол би нүгэл үйлдсэнээ мэдэх учир, харагтун, өнөөдөр би Иосефын гэрээс хамгийн түрүүнд хаан эзнээ угтахаар ирэв гэв.

²¹Зеруиагийн хөвгүүн Абишаи хариулан —ЭЗЭНий тосолсон хүнийг хараасан тул Шимеи үхэх ёсгүй гэж үү? гэв.

²²Гэвч Давид —Зеруиагийн хөвгүүд минь, та бидэнд ямар хамаатай вэ? Юунд энэ өдөр надад садаа болно вэ? Би өнөөдөр Израилийн хаан мөн гэдгээ мэдээгүй байна. Тэгээд ч энэ өдөр Израильд хүн үхэх ёстой гэж үү? гэж хэлэв.

²³Тэгээд хаан Шимеид —Чи үхэхгүй гэж айлдаж, түүнд тангараглав.

²⁴Саулын ач хүү Мефибошет хааныг угтахаар ирэв. Тэрээр хааныг гарч явсан өдрөөс эхлэн амар мэнд буцаж ирсэн өдөр хүртэл хөлөө арчлаагүй, сахлаа хусаагүй, хувцсаа ч угаагаагүй ажээ.

²⁵Хааныг угтахаар түүнийг Иерусалимаас[41] ирсэн үед хаан түүнээс —Мефибошет, чи юунд надтай хамт явсангүй вэ? гэж асуув.

²⁶Тэр —Хаан эзэн минь, боол би хөлгүй учир “Би илжиг эмээллэн унаж, хаантай хамт явъя” гэж хэлсэн боловч зарц минь намайг мэхлэв.

²⁷Тэр боол, эзэн хаанд минь намайг бас гүжирдэв. Гэвч эзэн хаан минь Бурханы тэнгэрэлч мэт тул тааллаараа л бол.

²⁸Эцгийн минь гэрийнхэн бүгд хааны өмнө юу ч биш, үхвэл таарах хүмүүс байсан боловч, боол намайг та өөрийнхөө хоолны ширээнд хооллох хүмүүсийн дунд оруулсан. Тиймээс би хаанд дахин гомдоллох ямар эрхтэй билээ? гэв.

²⁹Хаан түүнд —Чи юунд өөрийнхөө хэргийг ярина вэ? Чамд болон Зибад тэр газрыг хувааж өгнө гэж би шийдсэн гэж хэлэв.

³⁰Мефибошет, хаанд —Хаантан амар мэнд гэртээ буцаж ирснээс хойш тэр бүгдийг нь аваг гэлээ.

³¹Гилеад хүн Барзиллаи Рогелимоос Иордан голд хааныг үдэн гаргахын тулд хаантай хамт Иордан гол хүртэл явав.

³²Барзиллаи наян настай, их хөгшин хүн байв. Тэрээр их баян хүн байсан учир Маханаимд байх зуур нь хааныг хүнсээр хангаж байлаа.

³³Хаан, Барзиллаид —Надтай хамт гатлан явагтун. Иерусалимд надтай хамт байхад би таныг идэх хүнсээр хангах болно гэв.

³⁴Гэвч Барзиллаи хаанд —Хаантай хамт Иерусалимд очсон ч би хэдий удаан наслах билээ?

³⁵Би одоо наян настай. Би сайн мууг ялгаж чадах уу? Идэж уугаад би амтална гэж үү? Эр, эм дуучдын хоолойг ялган сонсож чадна гэж үү? Ийм учир боол би эзэн хаанд тээр болох бус уу?

³⁶Боол би хаантай хамт Иордан голыг гаталж, жаахан яваад буцъя. Яасан гэж надад хаан ийм шагнал хайрлана вэ?

³⁷Би өөрийнхөө хотод, эцэг эхийнхээ булшны ойр үхмээр байгаа учир боол намайг буцаагаач. Гэсэн ч таны зарц Кимхам энд байна. Тэр миний эзэн хаантай хамт гатлан яваг. Та тааллаараа л түүнд үйлдэгтүн! гэж хэлэв.

³⁸Хаан —Кимхам надтай хамт гатлан явах болно. Би түүнд чиний таалсныг үйлдэх болно. Чи надаас юу хүснэ, түүнийг чинь би биелүүлж өгье гэв.

³⁹Ингээд ард олон бүгдээрээ Иордан голыг гатлав. Хаан ч мөн адил гатлав. Хаан, Барзиллаиг үнсэж, түүнийг ерөөхөд тэр хот уруугаа буцав.

⁴⁰Хаан Гилгал уруу явахад Кимхам түүнтэй хамт явсан бөгөөд Иудагийн бүх ард олон мөн израильчуудын хагас нь хаан дээр хүрч ирэв.

⁴¹Харагтун, израильчууд бүгд хаан дээр ирээд —Бидний ах дүүс болох иудачууд яах гэж таныг булааж, хаан хийгээд түүний гэрийнхэн бас хамт байгаа Давидын хүмүүсийг Иордан гол гатлуулан авчрав? гэцгээв.

⁴²Иудагийн бүх хүмүүс израильчуудад —Яагаад гэвэл хаан бидний ойрын төрөл юм. Та нар юунд энэ талаар уурлана вэ? Хааныхаас бид хооллосон уу? Эсвэл бид ямар нэгэн зүйл өөрсдөдөө авч үлдсэн үү? гэв.

⁴³Израильчууд иудачуудад хариулж —Бид хаанд арван хувьтай билээ. Тиймээс Давидад ч та нараас илүү байх ёстой. Тийн атал юуны учир биднийг үл тоомсорлоно вэ? Хаантнаа буцаан залах гэж эхэлж хэлэлцсэн нь бид бус уу? гэв. Гэвч иудачуудын үг нь израильчуудын үгнээс илүү хатуу байлаа.