Read Ariun Bible 2013 – Ариун Библи 2013 2Самуел 22 Bible Online

2Самуел 22 - Ariun Bible 2013 – Ариун Библи 2013 bible

2Самуел 22

¹ЭЗЭН өөрийг нь хамаг дайснуудаас нь мөн Саулын гараас аварсан тэр өдөр Давид энэ дууг ЭЗЭНд дуулав.

²Тэр ийнхүү дуулав. —ЭЗЭН бол миний хад, миний бэхлэлт, Миний аврагч,

³Миний Бурхан, миний хоргодох хад, Миний бамбай, миний авралын эвэр, Миний цайз, миний хоргодох газар, миний аврагч, Та намайг балмад явдлаас хамгаалдаг билээ.

⁴Магтуулах учиртай ЭЗЭНийг би дуудаад Дайснуудаасаа би аврагдсан.

⁵Үхлийн давалгаа намайг хүрээлж Мөхлийн урсгал намайг дайрч,

⁶Үхэгсдийн орны уяа намайг хэрж Үхлийн урхинууд миний өмнө тулгарахад,

⁷Зовлон шаналан дотроо ЭЗЭНийг би дуудаж Бурхандаа би хашхирсан. Тэрээр сүмээсээ дуу хоолойг минь сонсож, Түүний сонорт хашхираан минь очсон билээ.

⁸Түүнийг хилэгнэхэд газар хөдлөв. Тэнгэрийн суурь ч доргив.

⁹Хамраас нь утаа суунаглаж, Амнаас нь цөлмөгч гал гарч, Цогшсон нүүрс асан дүрэлзэж байв.

¹⁰Тэнгэрсийг бөхийлгөж, Түнэр харанхуйг хөлдөө дэвссээр Тэр бууж ирэв.

¹¹Херуб хөлөглөн, салхин жигүүрээр дүүлэн нисэв.

¹²Ус хураасан өтгөн үүлсийг Өөрийгөө тойруулсан харанхуйн бүрхүүл болгов.[44]

¹³Түүний өмнөх гялбаанаас нүүрс асан шатав.

¹⁴ЭЗЭН, тэнгэрээс аянга цахилуулан Хамгийн Дээд Нэгэн нь дуугаа хүнгэнүүлэв.

¹⁵Тэрээр сум тавьж, тэднийг бутрааж, Аянга гялбуулж, тэднийг бут ниргэсэн.

¹⁶ЭЗЭНий зэмлэлд хийгээд Хамрынх нь амьсгалын хүчит цохилтоор Далайн ёроол үзэгдэж, Ертөнцийн сууриуд ил гарав.

¹⁷Тэр дээрээс сунган, Намайг авч, их уснаас татан гаргав.

¹⁸Тэр намайг хүчит дайснаас минь Намайг үзэн ядагчдаас аврав. Учир нь тэд миний хувьд үлэмж хүчтэй байв.

¹⁹Тэд миний зовлонт өдөр надтай тулгарсан. Гэвч ЭЗЭН миний түшиг байлаа.

²⁰Тэр намайг таалсан учир Намайг уудам газарт авчран аварсан билээ.

²¹Зөв шударга явдлын минь дагуу Намайг ЭЗЭН шагнаж Гар минь цэвэр ариун байсны төлөө намайг урамшуулав.

²²Учир нь би ЭЗЭНий замыг баримталсан, Бурууг үйлдэж Бурханаасаа салаагүй.

²³Бүх тогтоол нь миний өмнө байсан Би зарлигуудаас нь эргээгүй билээ.

²⁴Би Түүний өмнө гэм зэмгүй байж нүглээс өөрийгөө хол байлгав.

²⁵Түүний мэлмийн өмнө би зөв шударга бөгөөд цэвэр ариун байсан тул ЭЗЭН надад хариулсан юм.

²⁶Итгэмжтэнд итгэмжээ үзүүлдэг Та, гэм зэмгүйд гэмгүй л ханддаг.[45]

²⁷Цэвэр ариунд Та цэврээ, Цэх шударга биш хүнд Та тэрс байдлаа харуулдаг.

²⁸Дорой ядууг Та авардаг Таны харц ихэмсгүүдийг номхтгодог.

²⁹ЭЗЭН минь, Та миний дэнлүү билээ. Миний харанхуйг ЭЗЭН гэрэлтүүлдэг билээ.

³⁰Танаар би их цэргийг дайрч, Бурхандаа түшиглээд би хэрмийг давж чаддаг.

³¹Бурханы зам төгс төгөлдөр юм. ЭЗЭНий амлалт шалгагдсан билээ. Түүнд хоргоддог бүхэнд Тэрээр бамбай болдог.

³²ЭЗЭНээс өөр хэн Бурхан юм бэ? Бидний Бурханаас өөр хэн хад юм бэ?

³³Хүч чадлаар намайг бүсэлдэг Бурхан Замыг минь төгс болгодог.[46]

³⁴Тэр хөлийг минь гөрөөснийх мэт болгон, Намайг өндөрлөг газарт аюулгүй суулгадаг.

³⁵Тэр гарыг минь тулалдаанд бэлтгэдэг. Ингэснээр гар шуу минь хүрэл нумыг тахийлгаж чаддаг.

³⁶Та авралынхаа бамбайг надад өгсөн билээ. Таны тусламж намайг агуу болгосон билээ.

³⁷Та алхааг минь өргөсгөдөг Тиймээс хөл минь халтирсангүй.

³⁸Би дайснаа хөөж устган тэднийг сөнөх хүртэл нь эргэж буцсангүй.

³⁹Тэднийг би цөлмөв. Тэднийг би сөнөөв. Тиймээс тэд миний хөл доор унасан билээ.

⁴⁰Тулалдахад минь Та намайг хүч чадлаар зэвсэглэж, Намайг эсэргүүцэн босогчдыг миний доор хөсөр унагав.

⁴¹Та дайснуудын минь нурууг надад харуулав. Намайг үзэн ядагчдыг би устгав.

⁴²Тэд харуулдавч, аврах хэн ч байсангүй. Тэд ЭЗЭНд хашхирсан боловч, Тэр хариу өгсөнгүй.

⁴³Би тэднийг газрын тоос шороо мэт бутаргав Би тэднийг гудамжны шавхай мэт нухчин дэвслэв.

⁴⁴Та намайг ард олны минь маргаанаас аварч, Намайг үндэстнүүдийн тэргүүн байлгасаар байв. Миний үл мэдэх хүмүүс ч надад үйлчлэв.

⁴⁵Гаднынхан над дээр хулмалзсаар ирж, Намайг сонсмогцоо тэд үг дуугүй дагадаг.

⁴⁶Гаднынхан зүрх алдсаар Бат цайзуудаасаа чичрэн гарч ирдэг.[47]

⁴⁷ЭЗЭН амьд! Ерөөгдөх болтугай, миний хад! Авралын минь хад Бурхан өргөмжлөгдөх болтугай!

⁴⁸Миний төлөө өшөө авдаг Бурхан, Хүмүүсийг миний дор оруулдаг.

⁴⁹Намайг дайснуудаас минь гарган авчирдаг. Эсэргүүцэгчдийн минь дээгүүр Намайг Та өргөдөг юм. Хүч хэрэглэгчдээс Та намайг аварсан билээ.

⁵⁰Тиймээс ЭЗЭН Танд үндэстнүүдийн дундаас талархлыг өргөж, Таны нэрийг би магтан дуулна.

⁵¹Тэр Өөрийнхөө хаанд авралын цамхаг бөгөөд Өөрийнхөө тосолсон нэгэнд, Давид болон түүний үр удамд хайр өршөөлийг үүрд мөнх үзүүлдэг гэж дуулав.