Read Ariun Bible 2013 – Ариун Библи 2013 2Самуел 9 Bible Online

2Самуел 9 - Ariun Bible 2013 – Ариун Библи 2013 bible

2Самуел 9

¹Дараа нь Давид —Саулын гэрээс амьд үлдсэн хүн байхгүй юу? Би Ионатаны төлөө тэр хүнд энэрэл хайр үзүүлэх юмсан гэв.

²Тэгтэл Зиба нэрт Саулын гэрийн зарц байсныг Давид дээр дуудан ирүүлэв. Хаан түүнээс —Чи Зиба мөн үү? гэхэд тэр —Таны боол би байна гэв.

³Хаан —Саулын гэрээс хэн нэгэн үлдээгүй юу? Би түүнд Бурханы энэрэл хайрыг үзүүлмээр байна гэв. Зиба хаанд —Ионатаны хөлгүй нэгэн хүү нь бий гэв.

⁴Хаан түүнээс —Тэр хаана байна вэ? гэж асуухад Зиба, хаанд —Харагтун, Ло-дебарт байдаг Аммиелын хүү Махирын гэрт тэр байна гэж хариулав.

⁵Тэгээд Давид хаан хүн илгээн Ло-дебараас, Аммиелын хүү Махирын гэрээс түүнийг авчруулав.

⁶Саулын ач, Ионатаны хүү Мефибошет, Давидад ирээд, нүүрээрээ газар унаж мөргөв. Давид —Мефибошет гэхэд тэр —Таны боол би энд байна гэв.

⁷Давид түүнд —Бүү эмээ! Би чиний эцэг Ионатаны төлөө чамд энэрэл хайрыг заавал үзүүлж, чиний өвөг эцэг Саулын бүх газрыг эргүүлж өгнө. Чи миний ширээнд үргэлж талх идэх болно гэв.

⁸Мефибошет дахин мөргөж —Боол би чинь хэн болоод над шиг үхсэн нохойг та тооно вэ? гэв.

⁹Тэгэхэд Саулын боол Зибаг хаан дуудаж —Саулд болон түүний бүхэл гэрт харьяалагдах хамаг юмыг би чиний эзний ач хүүд өглөө.

¹⁰Танай эзний хүү талхтай золгохын тулд чи өөрөө хөвгүүд болон боолуудынхаа хамт түүний төлөө газар хагалж үр жимсийг нь авчирч түүнд өгч бай. Харин эзний чинь ач хүү Мефибошет миний ширээнд үргэлж талх идэх болно гэв. Зиба арван таван хөвгүүн, хорин боолтой ажээ.

¹¹Тэгэхэд Зиба, хаанд —Хаан эзний минь боолдоо тушаасан бүгдийн дагуу боол тань гүйцэтгэх болно гэлээ. Ингээд Мефибошет хааны хөвгүүдийн нэг адил миний[16] ширээнд хооллов.

¹²Мефибошетод Миха нэрт балчир хөвгүүн байв. Зибагийн гэрт амьдардаг бүгд Мефибошетын зарц нар болов.

¹³Ингээд Мефибошет хааны ширээнд үргэлж хооллодог болсон тул Иерусалимд амьдран суужээ. Тэрээр хоёр хөл суунги бөлгөө.