Read Ariun Bible 2013 – Ариун Библи 2013 1Хаад 4 Bible Online

1Хаад 4 - Ariun Bible 2013 – Ариун Библи 2013 bible

1Хаад 4

¹Ийнхүү Соломон хаан бүх Израилийг захирах хаан болжээ.

²Түүний түшмэд нь тахилч Задокийн хүү Азариа тахилч,

³Шишагийн хөвгүүд болох Елихореф, Ахиа нар бичээч, Ахилудын хүү Иехошафат хэрэг хөтлөгч,

⁴Иехоиадагийн хүү Бенаиа цэргийн жанжин, Задок ба Абиатар нар тахилчид,

⁵Натаны хүү Азариа түшмэдийн ахлагч, Натаны хүү, хааны найз Забуд тахилч,

⁶Ахишар нь ордны даамал бөгөөд Абдагийн хүү Адонирам нь албадлагын ажлыг тус тус хариуцдаг байлаа.

⁷Соломон хамаг Израилийг захирах арван хоёр түшмэдийг томилжээ. Тэд хаанд болон түүний гэрийнхэнд ханган нийлүүлдэг ба тусбүр жилийн нэг нэг сард бараагаар хангадаг байлаа.

⁸Тэдгээрийн нэр нь Ефраим ууланд Бен-хур,

⁹Маказ, Шаалбимын, Бет-шемеш болон Елон-бет-хананд Бен-декер,

¹⁰Арубботод Бен-хесед (Соко болон Хеферийн бүх нутаг түүнийх байсан),

¹¹Дорын бүх өндөрлөгт Бен-абинадаб (Соломоны охин Тафат түүний эхнэр байлаа),

¹²Таанах, Мегиддо мөн Иезреелийн доод тал дахь Заретаны хажуудах Бет-шеаны бүх нутаг буюу Бет-шеанаас Абел-мехола, Иокмеамд хүрсэн нутагт Ахилудын хүү Баана,

¹³Рамот-гилеадад Бен-гебер бөгөөд Гилеадад байх Манассегийн хүү Иаирын нүүдлийн тосгод мөн Башанд байх зурвас нутаг, Аргоб буюу хүрэл хөндөлтэй, хана хэрэм бүхий жаран том хот түүнийх байлаа.

¹⁴Маханаимыг Иддогийн хүү Ахинадаб,

¹⁵Нафталид Ахимааз (тэр бас Соломоны охин Басематтай гэрлэжээ),

¹⁶Ашер ба Веалотод Хушаин хүү Баана,

¹⁷Иссахарт Паруагийн хүү Иехошафат,

¹⁸Бениаминд Елагийн хүү Шимеи,

¹⁹аморичуудын хаан Сихон болон Башаны хаан Огийн нутаг болох Гилеадын нутагт Урийн хүү Гебер байв. Иудагийн нутагт ганц захирагч байлаа.

²⁰Иуда болон израильчууд далайн эргийн тоо томшгүй элс шиг олон байсан бөгөөд тэд идэж ууж, баярлан цэнгэлдэж байлаа.

²¹Ефрат мөрнөөс авахуулан Филистийн нутаг хүртэл мөн Египет улсын хил хүртэлх бүхий л хаанчлалуудыг Соломон захирч, тэдгээр нь Соломоны амьдралын бүх өдрүүдэд түүнд алба гувчуур барин үйлчилдэг байлаа.

²²Соломоны нэг өдрийн хүнс нь гучин кор дээд гурил, жаран кор тээрэмдсэн буудай,

²³арван бордсон шар, бэлчээрийн хорин үхэр мөн буга, гөрөөс, согоо, таргалуулсан шувуу зэргээс гадна зуун хонь байлаа.

²⁴Соломон, голын наад талд орших бүхнийг буюу Тифсагаас Газ хүртэлх, голын баруун талын бүх хааныг захирах эрх мэдэлтэй байв. Түүний харьяа эргэн тойронд амар амгалан байв.

²⁵Соломоны бүх өдрүүдэд Данаас Беершеба хүртэлх Иуда ба Израиль амар жимэр амьдарч, хүн бүр өөрийн усан үзэм, инжрийн модон дор суудаг байв.

²⁶Соломон тэрэгний морьдын дөчин мянган жүчээтэй, арван хоёр мянган морьтонтой байв.

²⁷Соломон хааныг болон хааны ширээнд ирэх бүх хүнийг орон нутгийн түшмэд өөр өөрсдийн сардаа юугаар ч дутаахгүйгээр хангадаг байлаа.

²⁸Бас адуу болон тэрэгний морьдод арвай, сүрлийг тус тусын үүргийн дагуу байгаа газартаа нийлүүлж байв.[8]

²⁹Бурхан Соломонд мэргэн ухаан, үлэмж их хэрсүү чанар ба гүнзгий зүрхний ухаарлыг далайн эргийн элс мэт арвин ихээр өгчээ.

³⁰Соломоны мэргэн ухаан нь дорнын бүх хөвгүүдийн мэргэн ухаанаас ч, Египетийн бүх мэргэн ухаанаас ч даван гарчээ.

³¹Тэр бүх хүнээс, тухайлбал езра хүн Етан, Махолын хөвгүүд Хеман, Калкол, Дарда нараас ч илүү мэргэн байсан бөгөөд нэр алдар нь эргэн тойрны бүх үндэстэн даяар дуурсав.

³²Тэрээр гурван мянган сургаалт үг хэлж, нэг мянга таван дуу зохиожээ.

³³Тэр бас Ливаны хуш модноос эхлээд ханан хэрмэн дээгүүр ургадаг балуун ургамлын тухай ч хүүрнэж мөн ан амьтад, шувууд, хэвлээр явагчид, загасны талаар хүртэл ярьдаг байв.

³⁴Соломоны мэргэн ухааныг сонсохоор үндэстэн бүрээс, мэргэн ухааных нь талаар дуулж мэдсэн газар дэлхийн бүх хаадаас хүмүүс ирдэг байжээ.