Read Ariun Bible 2013 – Ариун Библи 2013 2Хаад 10 Bible Online

2Хаад 10 - Ariun Bible 2013 – Ариун Библи 2013 bible

2Хаад 10

¹Самарид Ахаб далан хүүтэй байв. Иехү захидлууд бичиж, тэдгээрийг Самари уруу, Иезреелийн[19] захирагчид болох ахмадуудад мөн Ахабын үрсийн асрамжлагчдад илгээн —

²Та нарт эзний тань хөвгүүд, тэрэг, морьд, бэхлэгдсэн хот болон зэвсгүүд байгаа тул энэ захидал та нарт очингуут

³өөрийн эзний хөвгүүдээс хамгийн сайн, хамгийн зохистойг сонгож, эцгийнх нь хаан ширээнд залаад, эзнийхээ гэрийн төлөө тулалдагтун гэжээ.

⁴Харин тэд ихэд айн —Харагтун, хоёр хаан түүний өмнө тэсэж чадаагүй юм. Тэгвэл бид хэрхэн тэсэж чадах вэ? гэцгээв.

⁵Ордны даамал, хотын захирагч, ахмадууд болон асрамжлагч нар Иехүд үг илгээн —Бид таны боолууд билээ. Бидэнд хэлсэн бүгдийг тань бид гүйцэтгэнэ. Бид ямар ч хүнийг хаанаар өргөмжлөхгүй. Өөрийн таалалд нийцсэн зүйлийг үйлдэгтүн гэв.

⁶Тэгэхэд Иехү хоёр дахь удаагаа тэдэнд захидал бичиж —Хэрэв та нар миний талд бөгөөд миний дууг сонсох бол өөрсдийн эзний хөвгүүд болох эрчүүдийн толгойг авч, маргааш яг өдийд над уруу Иезреелд ирэгтүн гэжээ. Тэр үед хааны хөвгүүд болох далан хүн өөрсдийг нь өсгөж буй хотын хүндэт хүмүүсийн хамт байв.

⁷Тэдэнд захидал ирэхэд тэд хааны хөвгүүд болох далан хүнийг барьж алаад, тэдний толгойнуудыг сагснуудад хийн, Иезреелд буй Иехү уруу илгээв.

⁸Элч ирээд, түүнд —Тэд хааны хөвгүүдийн толгойнуудыг авчирлаа гэж мэдэгдэхэд Иехү —Тэдгээрийг гулдан хаалганы үүдэнд өглөө болтол хоёр хэсэг болгон овоологтун гэв.

⁹Өглөө Иехү гадагшаа гарч зогсоод, бүх ард түмэнд —Та нар гэмгүй. Үзэгтүн, би эзнийхээ эсрэг хуйвалдан түүнийг алсан, харин энэ бүгдийг хэн алсан бэ?

¹⁰Ахабын гэрийн тухайд ЭЗЭНий айлдсан Түүний үгнээс юу нь ч газарт унаагүй гэдгийг мэдэгтүн. Учир нь ЭЗЭН Өөрийн боол Елиагаар дамжуулан айлдсанаа гүйцэтгэсэн юм гэв.

¹¹Ингээд Иехү нь Ахабын гэрийнхнээс Иезреелд үлдсэн бүгдийг, тухайлбал түүний хүндэт хүмүүс, дотнын хүмүүс, тахилч нарыг нэгийг ч үлдээлгүй бүгдийг нь хороов.

¹²Тэгээд Иехү босон хөдөлж, Самари уруу явав. Замд түүнийг хоньчдын Бет-екед байх зуур

¹³Иудагийн хаан Ахазиагийн төрөл садангуудтай Иехү тааралдаж —Та нар хэн бэ? гэв. Тэд —Бид Ахазиагийн төрөл садан юм. Бид хааны хөвгүүд болон эх хатны хөвгүүдийн мэндийг асуух гэж яваа гэж хариулав.

¹⁴Иехү —Тэднийг амьдаар нь баригтун гэж тушаахад тэднийг амьдаар нь барьж, дөчин хоёр хүнийг Бет-екедийн нүхэнд хороов. Тэднээс хэнийг ч үлдээсэнгүй.

¹⁵Тэрээр тэндээс холдохдоо өөртэй нь уулзахаар ирж буй Рехабын хүү Иехонадабтай уулзжээ. Иехү түүнтэй мэндлээд, түүнд —Миний зүрх чамд үнэнчийн адил чинийх ч бас надад тийм байна уу? гэхэд Иехонадаб —Тийм байна гэж хариулав. —Хэрэв тийм бол гараа өгөгтүн гэхэд тэрээр түүнд гараа өгсөнд Иехү түүнийг тэргэнд оруулав.

¹⁶Иехү —Надтай хамт явж, ЭЗЭНий төлөөх миний зүтгэлийг харагтун гэв. Ингээд Иехү түүнийг тэргэндээ суулган явлаа.

¹⁷Иехү Самарид ирээд Елиад айлдсан ЭЗЭНий үгийн дагуу Самарид байсан, Ахабт үлдсэн бүгдийг дуустал нь хядав.

¹⁸Дараа нь Иехү бүх ард түмнийг цуглуулаад, тэдэнд —Ахаб, Баалд бага зэрэг үйлчилдэг байсан бол Иехү түүнд маш их үйлчилнэ.

¹⁹Одоо Баалын бүх эш үзүүлэгчийг, бүх мөргөгч болон бүх тахилчийг нь цуглуул. Би Баалд үлэмж их тахил өргөх тул нэгийг нь ч бүү үлдээ. Үлдсэн хэн боловч амьд үлдэхгүй гэв. Харин Иехү, Баалыг шүтэн бишрэгчдийг устгахын тулд ингэж залилан хэлжээ.

²⁰Иехү —Баалд зориулан тусгай чуулааныг ариусгагтун гэсэнд тэд тунхаглав.

²¹Тэгээд Иехү Израиль даяар хүн илгээсэн бөгөөд Баалын бүх мөргөгчид иржээ. Ирэлгүй үлдсэн нэг ч хүн байгаагүй юм. Тэд Баалын сүмд ороход Баалын сүм нэг захаас нөгөө зах хүртэлээ дүүрсэн байв.

²²Иехү хувцасны агуулахыг хариуцсан хүнд —Баалын бүх мөргөгчдөд хувцас авчрагтун гэж тушаасанд өнөөх хүн тэдэнд хувцас авч ирэв.

²³Иехү, Рехабын хүү Иехонадабын хамт Баалын сүм уруу ороод, Баалын мөргөгчдөд —Энд та нарын хамт ЭЗЭНий зарц нараас нэг ч хүн байхгүй, харин гагцхүү Баалд мөргөгчид л байгаа эсэхийг олж харагтун гэв.

²⁴Тэгээд тэд өргөл болон шатаалт тахилуудыг өргөхөөр дотогш оров. Иехү өөртөө зориулж наян хүнийг гадаа байрлуулан зогсоогоод —Та нарын гарт миний оруулах хүмүүсийн нэгэнд нь ч гэсэн зугтах боломж олгосон хэн боловч түүний оронд өөрийн амийг өгнө шүү гэж анхааруулав.

²⁵Тэгээд тэрээр шатаалт тахил өргөж дуусмагц Иехү харгалзагч ба хааны түшмэдэд —Дотогш ороод тэднийг цохигтун. Нэг ч хүн зугтах ёсгүй гэв. Тэд илдний ирээр тэднийг хядав. Харгалзагчид ба хааны түшмэд бүгдийг гарган хаяж, Баалын сүмийн дотоод өрөөнд оров.

²⁶Тэд Баалын сүмийн хөрөгт баганануудыг гаргаад шатаав.

²⁷Тэд бас Баалын баганануудыг хугалан Баалын сүмийг нурааж, жорлон болгож орхисон нь энэ өдрийг хүртэл байгаа билээ.

²⁸Иехү ингэж Израилиас Баалыг устгав.

²⁹Гэсэн хэдий ч Бетел ба Дан дахь алтан тугалууд буюу Израилиар гэм нүгэл хийлгэсэн Небатын хүү Иеробоамын нүглүүдээс Иехү салж ангижирсангүй.

³⁰ЭЗЭН, Иехүд —Миний мэлмийд зөв зүйтэйг гүйцэтгэснээрээ чи сайныг үйлдэж, Миний зүрхэн дэх бүхний дагуу Ахабын гэрт үйлдсэн тул чиний дөрвөн үеийн хөвгүүд Израилийн хаан сэнтийд заларна гэж айлджээ.

³¹Гэвч Израилийн Бурхан, ЭЗЭНий хууль дотор бүх зүрх сэтгэлээсээ алхахыг Иехү анхаарсангүй. Израилиар нүглийг үйлдүүлсэн Иеробоамын нүглүүдээс тэрээр салж ангижирсангүй.

³²Тэр өдрүүдэд ЭЗЭН, Израилийг бутраан тасалж эхэлсэн юм. Израилийн бүх газар нутагт Хазаел тэднийг ялж байв.

³³Иорданы зүүнтээд Гилеадын бүх нутгийг буюу гадчууд, реубенчүүд, манассечуудыг мөн Арноны хөндий дэх Ароераас Гилеад, Башан зэргийг хүртэл ялав.

³⁴Иехүгийн бусад үйл хэрэг, түүний хийсэн бүхэн мөн түүний хүч чадал зэрэг нь Израилийн Хаадын шастир номд бичигдсэн бус уу?

³⁵Иехү эцэг өвгөдийнхөө хамт нойрссон бөгөөд тэд түүнийг Самарид нутаглуулсан юм. Түүний хүү Иехоахаз оронд нь хаан болов.

³⁶Самарид Израилийг захирсан Иехүгийн хугацаа нь хорин найман жил байлаа.