Read Ariun Bible 2013 – Ариун Библи 2013 2Хаад 16 Bible Online

2Хаад 16 - Ariun Bible 2013 – Ариун Библи 2013 bible

2Хаад 16

¹Ремалиагийн хүү Пекагийн арван долдугаар онд Иудагийн хаан Иотамын хүү Ахаз хаан болов.

²Ахаз хаан болох үедээ хорин настай байсан бөгөөд Иерусалимд арван зургаан жил хаанчилжээ. Тэрээр Бурхан ЭЗЭНий мэлмийд зөв зүйтэйг үйлдсэнгүй, өвөг эцэг Давид шигээ байсангүй.

³Харин тэрээр Израилийн хаадын замаар замнасан төдийгүй, Израилийн хөвгүүдийн өмнөөс ЭЗЭНий хөөн гаргасан үндэстнүүдийн бузар заншлыг дуурайж хүүгээ гал дундуур явуулсан[28] ажээ.

⁴Тэрээр мөргөлийн өндөрлөг, толгод болон ногоон мод бүрийн доор утлага уугиулан тахил тахив.

⁵Тэгтэл Арамын хаан Резин, Ремалиагийн хүү Израилийн хаан Пека нар дайтахаар Иерусалим уруу иржээ. Тэд Ахазыг бүслэн авсан боловч дийлсэнгүй.

⁶Тэр үед Арамын хаан[29] Резин, Елатыг Арамд буцаасан бөгөөд иудейчүүдийг бүгдийг нь Елатаас гаргасан билээ. Арамчууд Елатад ирж, энэ өдрийг хүртэл тэнд амьдарсан юм.

⁷Ингээд Ахаз, Ассирийн хаан Тиглат-пилесерт элч нар илгээн —Би таны зарц бөгөөд таны хүү билээ. Ирж, миний эсрэг босож буй Арамын хаан болон Израилийн хааны гараас намайг аварч өгөөч гэж уламжлуулав.

⁸ЭЗЭНий өргөө болон хааны өргөөний эрдэнэсийн сангуудаас олдсон мөнгө ба алтыг Ахаз авч, Ассирийн хаанд бэлэг илгээв.

⁹Ассирийн хаан түүнийг сонссон бөгөөд Ассирийн хаан Дамаскийн эсрэг хөдөлж, түүнийг эзлээд, Резинийг алж мөн хүмүүсийг нь Кир уруу цөлжээ.

¹⁰Ахаз хаан Ассирийн хаан Тиглат-пилесерт бараалхахаар Дамаск уруу явж, Дамаск дахь тахилын ширээг харав. Ахаз хаан уг тахилын ширээний дүрслэл зураг болон хэв загварыг хийцийнх нь дагуу тахилч Уриад илгээв.

¹¹Ингээд Ахаз хааны Дамаскаас илгээсэн бүхний дагуу тахилч Уриа уг тахилын ширээг бүтээв. Тахилч Уриа үүнийг Ахаз хааныг Дамаскаас буцаж ирэхээс өмнө хийв.

¹²Хаан, Дамаскаас буцаж ирээд, тахилын ширээг харжээ. Тэгээд хаан тахилын ширээнд ойртон очоод, дээр нь тахив.

¹³Тэрээр тахилын ширээн дээр өөрийн шатаалт тахил ба өөрийн идээн өргөлийг тахиж, өөрийн ундаан өргөлийг цутгаж, өөрийн эвийн тахилуудын цусыг түүнд цацав.

¹⁴ЭЗЭНий өмнө байдаг хүрэл тахилын ширээг тэрээр өргөөний урд талаас, тахилын ширээ ба ЭЗЭНий өргөөний хоорондоос авчирч, өөрийн тахилын ширээний хойд талд тавьжээ.

¹⁵Тэгээд Ахаз хаан тахилч Уриад тушаан —Өглөөний шатаалт тахил, үдшийн идээн өргөл, хааны шатаалт тахил болон түүний идээн өргөл, энэ газрын бүх ард түмний шатаалт тахил, идээн өргөл, ундаан өргөлүүд бүгдийг нь том тахилын ширээн дээр өргөж, шатаалт тахил болон нядлах тахилын бүх цусыг түүн уруу цац. Харин тахилын хүрэл ширээг би үзэх шинжихдээ зориулъя гэв.

¹⁶Ингээд тахилч Уриа, Ахаз хааны тушаасан бүгдийн дагуу биелүүлэв.

¹⁷Дараа нь Ахаз хаан тавиуруудын самбарыг салгаж, угаалгын савыг авав. Тэр бас хүрэл үхрүүдийн дээрээс тэнгисийг салган аваад, чулуун тавцан дээр тавив.

¹⁸Өргөөн дотор тэдний барьсан Амралтын өдөрт зориулсан жим болон хааны гадна хаалгыг тэрээр Ассирийн хаанд зориулан ЭЗЭНий өргөөнөөс зайлуулав.[30]

¹⁹Ахазын үйлдсэн бусад үйл хэрэг нь Иудагийн Хаадын шастир номд бичигдсэн бус уу?

²⁰Ингээд Ахаз эцэг өвгөдийнхөө хамт нойрсон, Давидын хотод эцэг өвгөдийнхөө хамт тавигдаж, түүний хүү Хезекиа оронд нь хаанчлав.