Read Ariun Bible 2013 – Ариун Библи 2013 2Хаад 3 Bible Online

2Хаад 3 - Ariun Bible 2013 – Ариун Библи 2013 bible

2Хаад 3

¹Иудагийн хаан Иехошафатын арван наймдугаар онд Ахабын хүү Иехорам Самарид Израилийн хаан болж арван хоёр жил хаанчлав.

²Хэдийгээр эцэг эх шигээ байгаагүй ч тэрээр ЭЗЭНий мэлмийд ёрын мууг үйлджээ. Учир нь тэрээр эцгийнхээ бүтээсэн Баалын баганануудыг зайлуулсан боловч

³Израилиар нүгэл үйлдүүлсэн Небатын хүү Иеробоамын нүгэлд зууралдаж түүнээсээ тэр салсангүй.

⁴Моабын хаан Меша хонь үржүүлдэг байсан бөгөөд Израилийн хаанд зуун мянган хурга болон зуун мянган хуцын ноос төлдөг байв.

⁵Харин Ахабыг нас барахад Моабын хаан Израилийн хааны эсрэг босов.

⁶Тэр үед Иехорам хаан Самариас гарч, бүх Израилийг цуглуулав.

⁷Дараа нь тэр явж, Иудагийн хаан Иехошафатад илгээхдээ —Моабын хаан миний эсрэг бослоо. Моабын эсрэг тулалдахаар чи надтай хамт явах уу? гэж хэлүүлэв. Тэр —Би явна. Би бол чи, миний хүмүүс бол чиний хүмүүс, миний морьд ч чиний морьд мэт билээ гэв.

⁸Тэрээр —Бид аль замаар явах вэ? гэж асуухад Иехошафат —Едомын цөлийн замаар гэж хариулав.

⁹Ингээд Израилийн хаан нь Иудагийн хаан, Едомын хаантай хамт хөдлөв. Тэд долоо хоног аялан тойрсон бөгөөд тэнд цэрэгт болон тэдний араас яваа мал сүрэгт уух ус байсангүй.

¹⁰Тэгтэл Израилийн хаан —А-яа, Моабын гарт өгөх гэж энэ гурван хааныг ЭЗЭН дууджээ гэж хэлэв.

¹¹Харин Иехошафат —ЭЗЭНээс асууж болохоор ЭЗЭНий эш үзүүлэгч энд алга уу? Түүгээр дамжуулан бид асуухсан гэв. Израилийн хааны зарц нарын нэг нь хариулж —Шафатын хүү Елиша энд байна. Тэр Елиагийн гар дээр ус асгадаг байсан гэв.

¹²Иехошафат —ЭЗЭНий үг түүнтэй хамт билээ гэжээ. Ингээд Израилийн хаан Иехошафат болон Едомын хаад түүн дээр очив.

¹³Елиша Израилийн хаанд —Би чамд ямар хамаатай юм бэ? Чи эцгийнхээ эш үзүүлэгчид болон эхийнхээ эш үзүүлэгчид уруу яв гэв. Израилийн хаан түүнд —Үгүй, учир нь ЭЗЭН энэ гурван хааныг Моабын гарт өгөхөөр дуудсан юм гэв.

¹⁴Елиша —Миний өмнө нь зогсдог түг түмдийн ЭЗЭН амьд! Иудагийн хаан Иехошафатын байгааг хүндлээгүй бол би чамайг харах ч үгүй, тоох ч үгүй байхсан.

¹⁵Харин одоо надад чавхдаст хөгжим тоглодог хүнийг авчир гэв. Өнөөх хөгжимчин тоглож эхлэхэд ЭЗЭНий мутар Елишагийн дээр ирэв.

¹⁶Тэр —ЭЗЭН айлдахдаа “Энэ хөндийг суваг шуудуугаар дүүргэгтүн” гэв.

¹⁷Учир нь ЭЗЭН ингэж айлдаж байна. “Та нар салхийг харахгүй, бороог ч үзэхгүй. Гэсэн ч та нар болон та нарын мал сүрэг, та нарын адгуус амьтад уухын тулд тэр хөндий усаар дүүрнэ.

¹⁸Энэ нь ЭЗЭНий мэлмийд өчүүхэн зүйл юм. Тэрээр бас моабынхныг та нарын гарт өгөх болно.

¹⁹Тэгээд та нар бэхлэгдсэн болон шилмэл хот бүрийг цохиж, сайн мод болгоныг унагаж, усны бүх ундаргыг зогсоож, газар нутгийн сайн хэсэг бүрийг чулуугаар сүйдлэх болой” гэсэн гэв.

²⁰Өглөө тахил өргөх үед, үзэгтүн, Едомын замаар ус урсан ирж, тэр газар усаар дүүрсэн байлаа.

²¹Өөрсдийнх нь эсрэг тулалдахаар хаад ирснийг моабынхан бүгд сонсжээ. Зэвсэг барих чадвартай бүгд болон тэднээс дээш насны хүмүүс цугларан хил дээрээ зогсов.

²²Тэд өглөө эрт босоход нарны туяа усан дээр гялбаж, моабчууд харалдаах усыг цус мэт улаан гэж харав.

²³Тэгээд тэд —Энэ бол цус байна. Хаад гарцаагүй өөр хоорондоо тулалдаж, нэг нэгнээ хядсан байна. Тиймээс Моаб аа, олз уруугаа! гэцгээлээ.

²⁴Харин тэд Израилийн хуаранд иртэл израильчууд босож, моабчуудыг цохисон бөгөөд моабчууд тэдний өмнөөс зугтжээ. Тэд моабчуудыг хядсаар[6] тэдний газар нутаг уруу орж урагшлав.

²⁵Ингээд тэд хотуудыг сүйтгэжээ. Тэдний хүн бүр газар нутгийн сайн хэсэг бүрд чулуу хаян түүнийг дүүргэв. Ингээд тэд усны бүх ундаргыг зогсоож, бүх сайн моддыг унагасаар, Кир-харасетад[7] л чулуунуудыг нь үлдээлээ. Харин чулуу дүүгүүрдэгчид тэр газрыг бүслэн цохив.

²⁶Өөрийнх нь хувьд тулалдаан дэндүү хатуу ширүүн болохыг Моабын хаан хараад, тэрээр илд агсагч долоон зуун хүнээ аваад, Едомын[8] хааны дундуур нэвтрэн гарах гэсэн боловч чадсангүй.

²⁷Тэгээд өөрийг нь залгамжлан хаанчлах ёстой байсан ууган хүүгээ тэр аваад, түүнийг хэрмийн дээр шатаалт тахил болгон өргөжээ. Израилийн эсрэг асар их уур хилэн бадарсанд израильчууд түүнээс салж, нутагтаа буцацгаав.