Read Ariun Bible 2013 – Ариун Библи 2013 1Шастир 15 Bible Online

1Шастир 15 - Ariun Bible 2013 – Ариун Библи 2013 bible

1Шастир 15

¹Давид өөртөө зориулан Давидын хотод[29] өргөөнүүд бариулав. Бас тэрээр Бурханы авдарт зориулан газар бэлтгэж, түүнд асар босгов.

²Тэгээд Давид —Бурханы авдрыг левичүүдээс өөр хэн ч өргөн зөөж болохгүй. Учир нь Бурханы авдрыг зөөлгөж, Өөртөө үүрд мөнхөд үйлчлүүлэхээр ЭЗЭН тэднийг сонгосон билээ гэв.

³Давид өөрийн бэлтгэсэн газарт ЭЗЭНий авдрыг авчруулахаар бүх Израилийг Иерусалимд цуглуулав.

⁴Аароны хөвгүүд болон левичүүдийг Давид хамтад нь цуглуулжээ.

⁵Кохатын хөвгүүдээс захирагч Уриел болон түүний ах дүүс болох зуун хорин хүн,

⁶Мерарийн хөвгүүдээс захирагч Асаиа болон түүний ах дүүс болох хоёр зуун хорин хүн,

⁷Гершомын хөвгүүдээс захирагч Иоел болон түүний ах дүүс болох зуун гучин хүн,

⁸Елизафаны хөвгүүдээс захирагч Шемаиа болон түүний ах дүүс болох хоёр зуун хүн,

⁹Хеброны хөвгүүдээс захирагч Елиел болон түүний ах дүүс болох наян хүн,

¹⁰Уззиелийн хөвгүүдээс захирагч Амминадаб болон түүний ах дүүс болох зуун арван хоёр хүн байв.

¹¹Давид, тахилч Задок, Абиатар нар болон левичүүд Уриел, Асаиа, Иоел, Шемаиа, Елиел, Амминадаб нарыг дуудан

¹²тэдэнд —Та нар левичүүдийн эцгийн бүлийн тэргүүнүүд билээ. Израилийн Бурхан ЭЗЭНий авдрыг миний түүнд зориулан бэлтгэсэн газарт авч ирэхийн тулд өөрсдийгөө болон ах дүүсээ ариусга.

¹³Эхний удаа та нар үүнийг үүрээгүй учраас бидний эсрэг Бурхан дүрсхийн уурласан юм. Учир нь бид Түүнийг журмынх нь дагуу эрж хайгаагүй байсан билээ гэж хэлэв.

¹⁴Ингээд Израилийн Бурхан ЭЗЭНий авдрыг авчрахын тулд тахилч болон левичүүд өөрсдийгөө ариусгав.

¹⁵ЭЗЭНий айлдвар ёсоор Мосегийн тушаасны дагуу левичүүдийн хөвгүүд Бурханы авдрыг дамнуургууд дээр тавин өргөж, мөрөн дээрээ үүрч явав.

¹⁶Тэгээд хөгжмийн зэмсгүүд, босоо ятга, ятга, цангаар чанга хөгжимдөн баяр баяслын дууг өргөхөөр дуучид болох ах дүүсээ томилохыг Давид левичүүдийн захирагчдад тушаав.

¹⁷Иймээс левичүүд Иоелын хүү Хеман болон түүний ах дүүсийг, Берехиагийн хүү Асафыг мөн тэдний ах дүүс болох Мерарийн хөвгүүдээс Кушаиагийн хүү Етаныг

¹⁸мөн тэдний хамт удаах ах дүүс буюу хаалгачид болох Зехариа, Бен, Иазиел, Шемирамот, Иехиел, Унни, Елиаб, Бенаиа, Маасеиа, Маттитиа, Елифеле, Микнеиа, Обед-едом, Иеиел нарыг томилов.

¹⁹Ингээд дуучид болох Хеман, Асаф, Етан нар гуулин цан цохиж,

²⁰Зехариа, Азиел, Шемирамот, Иехиел, Унни, Елиаб, Маасеиа, Бенаиа нар аламотод нийцүүлэн босоо ятга тоглож,

²¹Маттитиа, Елифеле, Микнеиа, Обед-едом, Иеиел, Азазиа нар шеминитэд нийцүүлэн ятга дарав.

²²Левичүүдийн дуу хөгжмийн удирдагч Кенаниа хөгжим удирдах болов. Учир нь тэрээр үүнийг ойлгодог байв.

²³Берехиа, Елкана нар авдрын хаалгачид байв.

²⁴Тахилчид болох Шебаниа, Иошафат, Нетанел, Амасаи, Зехариа, Бенаиа, Елиезер нар Бурханы авдрын өмнө бүрээ үлээв. Обед-едом, Иехиа нар авдрын хаалгачид байлаа.

²⁵Давид ба Израилийн ахмадууд, мянгатын дарга нар Обед-едомын гэрээс ЭЗЭНий гэрээний авдрыг авч ирэхээр баяр хөөртэйгөөр явлаа.

²⁶ЭЗЭНий гэрээний авдрыг зөөсөн левичүүдэд Бурхан тусалсанд тэд долоон бух, долоон хуцаар тахил өргөв.

²⁷Давид болон авдрыг үүрсэн бүх левичүүд, дуучид болон хөгжим ба дууны удирдаач Кенаниа нар ч мөн адил нарийн маалингаар хийсэн дээл өмсөв. Давид бас маалинган ефод өмссөн байлаа.

²⁸Ингээд бүх Израиль уухайлан, эвэр бүрээ болон бүрээ үлээж, цан хөгжим цохин мөн босоо ятга ба ятгууд эгшиглүүлсээр ЭЗЭНий гэрээний авдрыг авч иржээ.

²⁹Тэгтэл ЭЗЭНий гэрээний авдар Давидын хотод орж ирэх үед Саулын охин Михал цонхоор харж, Давид хааныг ЭЗЭНий өмнө цовхчин бүжиглэхийг хараад зүрх сэтгэлдээ түүнийг басамжлав.