Read Ariun Bible 2013 – Ариун Библи 2013 1Шастир 16 Bible Online

1Шастир 16 - Ariun Bible 2013 – Ариун Библи 2013 bible

1Шастир 16

¹Ингээд тэд Бурханы авдрыг дотогш авчран Давидын зориулан босгосон майхны голд байранд нь заллаа. Тэд Бурханы өмнө шатаалт тахил болон эвийн тахилуудыг өргөв.

²Давид шатаалт тахил болон эвийн тахилыг өргөж дуусаад ЭЗЭНий нэрээр ард олныг ерөөв.

³Тэрээр Израилийн бүх хүн, эрэгтэй, эмэгтэй гэлтгүй хүн бүрд нэг талх, хэсэг мах, үзэмтэй боов тараав.

⁴Тэрээр левичүүдийн заримыг ЭЗЭНий авдрын өмнө үйлчлүүлэхээр буюу магтан дуулж, талархаж, Израилийн Бурхан ЭЗЭНийг магтаж байхаар томилов.

⁵Тэргүүлэгч нь Асаф, удаах нь Зехариа, Иеиел, Шемирамот, Иехиел, Маттитиа, Елиаб, Бенаиа, Обед-едом, Иеиел нар босоо ятга, ятгуудтай байв. Бас Асаф цан хөгжмийг дуугаргаж,

⁶тахилчид болох Бенаиа, Иахазиел нар Бурханы гэрээний авдрын өмнө үргэлж бүрээ үлээж байв.

⁷Тэр өдөр Давид анх удаа Асаф болон түүний ах дүүст ЭЗЭНд талархал өргөхийг даалгав.

⁸Аяа, ЭЗЭНд талархлыг өргөн Алдар нэрийг нь дуудан Ард түмний дунд үйлсийг нь мэдүүлэгтүн.

⁹Түүнд дуулж, Түүнд магтуу дууг дуулагтун. Түүний бүх гайхамшгуудыг яригтун.

¹⁰Түүний ариун нэрд алдар байг. ЭЗЭНийг эрэлхийлэгчийн зүрх баясах болтугай.

¹¹ЭЗЭНийг хийгээд Түүний хүч чадлыг эрэлхийлэгтүн. Түүний нүүр царайг үргэлж хайгтун.

¹²ЭЗЭНий үйлдсэн гайхамшигт үйлсийг, Түүний тэмдгүүд болон Түүний амнаас гарах шүүлтүүдийг санагтун.

¹³Түүний зарц Израилийн үр удам, Түүний сонгосон хүмүүс, Иаковын хөвгүүд ээ!

¹⁴Тэр бидний Бурхан ЭЗЭН. Түүний шүүлтүүд бүх дэлхийд байна.

¹⁵Мянга мянган үеийнхэнд Түүний тушаасан үг, гэрээг нь мөнхөд санагтун.

¹⁶Абрахамтай тогтоосон гэрээ, Исаакт өгсөн амлалтаа

¹⁷Иаковт зарлиг, Израильд мөнхийн гэрээ болгож баталсан юм.

¹⁸Ингэхдээ “Би та нарт Канаан нутгийг Өв залгамжлалын хувь болгон өгнө” гэж айлдсан билээ.

¹⁹Тэд тоогоор цөөн, дорой бөгөөд тэнд харь хүмүүс байсан

²⁰Тэд нэг үндэстнээс нөгөө үндэстэн уруу, Нэг хаанчлалаас нөгөө ард түмэн уруу тэнүүчилсэн.

²¹Тэднийг дарлахыг Тэрээр хэнд ч үл зөвшөөрч, Тэдний төлөө хаадыг зэмлэсэн.

²²“Миний тослогдсон хүмүүст бүү хүр, Эш үзүүлэгчдэд минь хор хөнөөл бүү учруул” гэсэн.

²³Бүх газар дэлхий, ЭЗЭНд дуулагтун. Түүний авралыг өдрөөс өдөрт тунхаглагтун.

²⁴Түүний яруу алдрыг үндэстнүүдэд тунхаглаж, Түүний гайхамшигт үйлсийг бүх ард түмнүүдийн дунд яригтун.

²⁵Учир нь ЭЗЭН аугаа бөгөөд агуу ихээр магтагдах Нэгэн. Мөн бүх бурхдаас дээгүүр Түүнээс эмээгтүн.

²⁶Учир нь хүмүүсийн бүх бурхад нь шүтээнүүд юм. Харин ЭЗЭН, тэнгэрсийг бүтээсэн билээ.

²⁷Түүнд яруу алдар ба сүр жавхлан бий. Түүний газарт хүч чадал, баяр баясгалан бий.

²⁸Ард түмнүүдийн ургууд аа, ЭЗЭНд өргөгтүн, ЭЗЭНд яруу алдар, хүч чадлыг өргөгтүн.

²⁹Нэрд нь дүйцэх яруу алдрыг ЭЗЭНд өргөгтүн. Өргөлөө авчран Түүний өмнө ир. Ариун хүндэтгэл дунд ЭЗЭНд мөргөгтүн.

³⁰Бүх дэлхий, Түүний өмнө чичрэгтүн. Үнэхээр ертөнц дэлхий бат тогтсон бөгөөд ганхахгүй.

³¹Тэнгэрс баясаж, газар дэлхий баярлаг. “ЭЗЭН хаанчилдаг” гэж үндэстнүүдийн дунд тэд хэлэг.

³²Далай болон түүний доторх бүх юмс нүргэлэг, Тал болон дээр нь байгаа бүх юмс баясаг.

³³Ойн бүх мод ЭЗЭНий өмнө бас баясан дуулна Учир нь Тэрээр газар дэлхийг шүүхээр ирж байна.

³⁴Түүнд талархал өргөгтүн. ЭЗЭН сайн сайхан бөгөөд, Түүний хайр энэрэл үүрдийнх.

³⁵Тэгээд “Бидний авралын Бурхан, биднийг авраач. Таны ариун нэрд талархлыг, Таны магтаал дотор алдрыг бид өргөхийн тулд үндэстнүүдийн дундаас биднийг цуглуулж, чөлөөлөөч” гэж хэлэгтүн.

³⁶Израилийн Бурхан ЭЗЭН Мөнхөөс мөнхөд магтагдах болтугай. Дараа нь бүх ард түмэн —Амен гээд ЭЗЭНийг магтав.

³⁷Ингээд өдөр тутмын ажилд авдрын өмнө үргэлжлүүлэн үйлчлэхийн тулд Асаф болон ах дүүсийг нь тэнд, ЭЗЭНий гэрээний авдрын өмнө Давид үлдээсэн билээ.

³⁸Мөн Обед-едомыг түүний ах дүү, жаран найман хүнтэй үлдээв. Иедутуны хүү Обед-едом болон Хоса нар хаалгач болов.

³⁹Тахилч Задок болон түүний ах дүү, тахилчдыг Гибеон дахь мөргөлийн өндөрлөг дээрх ЭЗЭНий асрын өмнө үлдээсэн нь

⁴⁰ЭЗЭНий Израильд тушаасан ЭЗЭНий хуульд бичигдсэн бүгдийн дагуу ЭЗЭНд шатаалт тахилыг шатаалт тахилын ширээн дээр өглөө оройгүй үргэлжлүүлэн өргөхийн тулд байв.

⁴¹Тэдний хамт Хеман, Иедутун болон ЭЗЭНий энэрэл хайр үүрдийнх учир Түүнд талархал өргөж байхаар нэрс нь тогтоогдож, сонгогдсон бусад хүмүүсийг үлдээв.

⁴²Хеман Иедутун нар эгшиглүүлэх бүрээ, цан, Бурханы магтаалд зориулсан хөгжмийн зэмсгүүдтэйгээ тэдэн дээр байлаа. Иедутуны хөвгүүд нь хаалгач болов.

⁴³Тэгээд бүх ард олон өөр өөрийн гэр уруу явцгааж, Давид ч өөрийн гэрийнхнийг ерөөхөөр буцав.