Read Ariun Bible 2013 – Ариун Библи 2013 1Шастир 23 Bible Online

1Шастир 23 - Ariun Bible 2013 – Ариун Библи 2013 bible

1Шастир 23

¹Давид өтөлж, өдөр хоногоо гүйцээгээд өөрийн хүү Соломоныг Израилийн хаан болгов.

²Бас тэрээр Израилийн бүх удирдагч, тахилчид ба левичүүдийг цуглуулав.

³Гуч болон түүнээс дээших насны левичүүдийг толгой дараалан тоолсон бөгөөд тэдний тоо нь гучин найман мянган эр байлаа.

⁴Тэднээс хорин дөрвөн мянга нь ЭЗЭНий өргөөний ажилд томилогдож, зургаан мянга нь харгалзагч ба шүүгчид,

⁵дөрвөн мянга нь хаалгачид, дөрвөн мянга нь магтан дуулахдаа Давидын бүтээсэн хөгжмөөр ЭЗЭНийг магтдаг байлаа.

⁶Давид тэднийг Левийн хөвгүүд болох Гершон, Кохат, Мерари нарын дагуу хэсгүүдэд хуваажээ.

⁷Гершончуудаас Ладан, Шимеи нар байв.

⁸Ладаны хөвгүүд, ууган нь Иехиел, дараа нь Зетам, Иоел гурав байв.

⁹Шимеигийн[34] хөвгүүд Шеломит, Хазиел, Харан гурав байв. Эд Ладаны эцгийн бүлийн тэргүүнүүд болой.

¹⁰Шимеигийн хөвгүүд Иахат, Зина, Иеуш, Бериа нар байв. Энэ дөрөв нь Шимеигийн хөвгүүд болой.

¹¹Ууган нь Иахат, удаах нь Зиза, харин Иеуш, Бериа нар олон хөвгүүдгүй байсан тул тэд эцгийн нэг гэр, үйлчлэлийн нэг хэсэг болж байв.

¹²Кохатын хөвгүүд нь Амрам, Изхар, Хеброн, Уззиел дөрөв байв.

¹³Амрамын хөвгүүд нь Аарон, Мосе нар. ЭЗЭНий өмнө утлага уугиулан, Түүнд үйлчилж мөн Түүний нэрээр үүрд ерөөхөөр ариунаас ариун зүйлсийг ариусгахаар Аарон хөвгүүдийнхээ хамтаар үүрд мөнх тусгаарлагдсан байлаа.

¹⁴Харин Бурханы хүн Мосегийн хөвгүүд Леви овгийн тоонд орсон билээ.

¹⁵Мосегийн хөвгүүд Гершом, Елиезер нар байв.

¹⁶Гершомын хөвгүүдээс Шебуел тэргүүн нь байв.

¹⁷Елиезерийн хүү Рехабиа тэргүүн нь байв. Елиезер өөр хөвгүүдгүй боловч Рехабиагийн хөвгүүд үй олон байв.

¹⁸Изхарын хөвгүүдээс Шеломит тэргүүн нь байв.

¹⁹Хеброны хөвгүүдийн тэргүүн нь Иериа, удаах нь Амариа, гурав дахь нь Иахазиел, дөрөв дэх нь Иекамеам болой.

²⁰Уззиелийн хөвгүүдийн тэргүүн нь Мика, удаах нь Ишшиа болой.

²¹Мерарийн хөвгүүд нь Махли, Муши нар байв. Махлийн хөвгүүд нь Елеазар, Киш нар болой.

²²Елеазар үхэхдээ хөвгүүдгүй, зөвхөн охидтой байв. Тиймээс тэдний ах дүүс, Кишийн хөвгүүд тэднийг эхнэр болгон авав.

²³Мушигийн хөвгүүд нь Махли, Едер, Иеремот гурав байв.

²⁴Эд эцгийн үйлчлэлийн гэр, эцгийн бүлийн тэргүүнүүдийн дагуух Левийн хөвгүүд бөгөөд ЭЗЭНий өргөөний үйлчлэлд зориулан ажилладаг хорь болон түүнээс дээших насны, нэрийнхээ бүртгэлээр, толгой дараалан тоологдсон хүмүүс болой.

²⁵Давид “Израилийн Бурхан ЭЗЭН Өөрийн ард түмэнд энх тунхыг өгч, тэрээр Иерусалимд мөнхөд оршино.

²⁶Мөн левичүүд асрыг болон үүний үйлчлэлд хэрэглэгддэг бүх эдлэлийг дахин зөөж явах шаардлагагүй болсон” гэж хэлэв.

²⁷Давидын сүүлчийн айлдвар ёсоор хорь ба түүнээс дээших насны Левийн хөвгүүдийг тоолов.

²⁸Тэдний үүрэг нь ЭЗЭНий өргөөний үйлчлэлд, хашаа, өрөөнүүд болон бүх ариун зүйлийг цэвэрлэхэд буюу Бурханы өргөөний үйлчлэлийн аливаа ажилд Аароны хөвгүүдэд туслах болон

²⁹тавиг талх, идээн өргөлийн сайн гурил, исгээгүй талх, хайруулын таваг мөн жинлэн хэмжих бүх ажлыг хариуцах байв.

³⁰Бас өглөө бүр ЭЗЭНд талархан, магтахаар зогсож, орой бүр үүний адил үйлдэн

³¹Амралтын өдөр, шинэ сар, тогтоогдсон баяраар тогтоосон зааврын дагуу тоо ёсоор ЭЗЭНд бүх шатаалт тахилыг тахиж, ийнхүү ЭЗЭНий өмнө тогтмол үйлчлэх байв.

³²Мөн уулзалтын майхан, ариун газар болон ЭЗЭНий өргөөний үйлчлэлд буй Аароны хөвгүүд, тэдний ах дүүсийн үйлчлэлийг сахин хамгаалах байв.