Read Ariun Bible 2013 – Ариун Библи 2013 2Шастир 11 Bible Online

2Шастир 11 - Ariun Bible 2013 – Ариун Библи 2013 bible

2Шастир 11

¹Рехобоам, Иерусалимд ирээд, өөрийнхөө хаанчлалыг дахин сэргээхийн тулд Израилийн эсрэг дайтахаар Иуда, Бениамины гэрийнхнээс зуун наян мянган шилдэг дайчдыг цуглуулав.

²Гэвч Бурханы хүн Шемаиад ЭЗЭНий үг ирж —

³Чи Иудагийн хаан Соломоны хүү Рехобоам болон Иуда, Бениамин дахь бүх израильчуудад

⁴«Та нар ах дүүсийнхээ эсрэг босон дайтаж болохгүй. Энэ зүйл Надаас учир хүн бүр өөр өөрсдийн гэртээ харигтун» гэж ЭЗЭН айлдаж байна хэмээн хэл гэжээ. Тэд ЭЗЭНий үгийг сонсоод, Иеробоамын эсрэг хөдлөлгүй буцацгаав.

⁵Рехобоам Иерусалимд амьдран Иудад бэхлэлттэй хотууд босгов.

⁶Тэрээр Бетлехем, Етам, Текоа,

⁷Бет-зур, Соко, Адуллам,

⁸Гат, Мареша, Зиф,

⁹Адораим, Лахиш, Азека,

¹⁰Зора, Аиалон, Хеброныг босгов. Эдгээр нь Иуда, Бениамин дахь бэхлэгдсэн хотууд юм.

¹¹Тэрээр бэхлэлтүүдийг батжуулж, тэдний дотор захирагчдыг суулгаж мөн хүнс, тос, дарсны нөөцийг байрлуулжээ.

¹²Тэрээр хот бүрийг бамбай, жадаар ханган, асар ихээр хүчирхэгжүүлэв. Иуда, Бениамин түүний талд байлаа.

¹³Бүх Израильд байсан тахилчид болон левичүүд бүх нутаг дэвсгэрээсээ түүн дээр буцаж ирсэн байна.

¹⁴Иеробоам болон түүний хөвгүүд левичүүдийг ЭЗЭНий тахилч байхаас халсан тул тэд өөрсдийн бэлчээр эдлэн, эзэмшил өмчөө орхин, Иуда болон Иерусалим уруу ирцгээв.

¹⁵Иеробоам өөрийнхөө хийсэн ямаан болон тугалан шүтээнүүдэд зориулсан мөргөлийн өндөрлөгүүдэд өөрийн тахилчдыг томилжээ.

¹⁶Израилийн Бурхан ЭЗЭНийг хайхаар зүрхээ хандуулсан, Израилийн бүх овгуудаас гаралтай хүмүүс эцэг өвгөдийнхөө Бурхан ЭЗЭНд нядлах тахил тахихаар тэднийг даган Иерусалимд ирцгээв.

¹⁷Тэд гурван жил Давид болон Соломоны замаар замнасан учраас Иудагийн хаанчлалыг хүчирхэгжүүлэн, гурван жилийн турш Соломоны хүү Рехобоамыг дэмжив.

¹⁸Тэгээд Рехобоам Давидын хүү Иеримотын охин Махалатыг мөн Иессийн хүү Елиабын охин Абихаил нарыг эхнэрээ болгов.

¹⁹Тэр түүнд хөвгүүд төрүүлж өгсөн нь Иеуш, Шемариа, Захам нар юм.

²⁰Түүний дараа тэрээр Абсаломын охин Маакаг авсанд түүнд Абиа, Аттаи, Зиза, Шеломит нарыг төрүүлж өгчээ.

²¹Рехобоам арван найман эхнэр, жаран татвар эмстэй мөн хорин найман хүү, жаран охины эцэг болсон бөгөөд бусад бүх эхнэр, татвар эмсээсээ илүүгээр Абсаломын охин Маакад хайртай байв.

²²Рехобоам, Маакагийн хүү Абиаг хаан болгохын тулд ах дүүсийнх нь дунд тэргүүн болгон удирдагчаар томилсон билээ.

²³Тэрээр мэргэн зүйл үйлдэн, хөвгүүдийнхээ заримыг Иуда болон Бениамины бүх нутаг дэвсгэр даяар бүх бэхлэгдсэн хот уруу тараан суулгаж, хоол хүнсийг нь хангалттайгаар өгч, тэдэнд олон эхнэр хайж байлаа.