Read Ariun Bible 2013 – Ариун Библи 2013 2Шастир 3 Bible Online

2Шастир 3 - Ariun Bible 2013 – Ариун Библи 2013 bible

2Шастир 3

¹Ингээд Соломон, Иерусалимын Мориа уулан дээрх иебус хүн Орнаны үтрэм дэх Давидын бэлтгэсэн газар буюу эцэг Давидад нь ЭЗЭН үзэгдсэн газарт ЭЗЭНий өргөөг барьж эхлэв.

²Соломон хаант засгийнхаа дөрөвдүгээр оны хоёрдугаар сарын хоёронд барьж эхэлжээ.

³Бурханы өргөөг барихаар Соломоны тавьсан суурь хуучны хэмжүүрээр, урт нь жаран тохой, өргөн нь хорин тохой байлаа.

⁴Өргөөний өмнөх үүдний танхимын урт нь өргөөний өргөнтэй эн чацуу хорин тохой бөгөөд өндөр нь зуун хорин тохой байв. Дотор талыг нь тэрээр шижир алтаар бүржээ.

⁵Гол танхимыг тэрээр майлс модоор доторлон, цэвэр алтаар бүрж, дээр нь далдуу мод болон гинжнүүд хийв.

⁶Тэрээр өргөөг эрдэнийн чулуугаар чимэглэв. Алт нь харин Парваимын алт байжээ.

⁷Тэрээр бүх өргөөг буюу гуалин, босго, хана, хаалгануудыг нь алтаар бүрж, хананууд дээр нь херубуудыг сийлэв.

⁸Тэрээр Ариунаас ариун газрыг хийсэн бөгөөд урт нь өргөөний өргөний энгээр хорин тохой, өргөн нь мөн хорин тохой байв. Тэрээр үүнийг зургаан зуун талант цэвэр алтаар бүржээ.

⁹Хадааснуудын жин тавин шекел алт болов. Тэр бас дээд өрөөнүүдийг алтаар бүрэв.

¹⁰Ариунаас ариун газарт тэрээр хос херубуудын баримал бариад, түүнийг алтаар бүрэв.

¹¹Херубуудын далавчны нийт урт хорин тохой байв. Херубын нэг далавч таван тохой бөгөөд өргөөний хананд хүрч байхад, нөгөө далавч бас таван тохой бөгөөд нөгөө херубын далавчинд хүрч байв.

¹²Нөгөө херубын нэг далавч таван тохой бөгөөд өргөөний хананд хүрч байхад, нөгөө далавч бас таван тохой бөгөөд эхний херубын далавчинд хүрч байв.

¹³Энэ херубуудын далавч хорин тохой дэлгэгдсэн бөгөөд тэд гол өргөө тийш харан хөл дээрээ зогсоцгоож байв.

¹⁴Тэрээр нил ягаан, хөх ягаан, хүрэн улаан бөс, нарийн маалингаар хөшиг хийгээд, дээр нь херубууд урлав.

¹⁵Тэр бас өргөөний урд талд гучин таван тохой өндөр хос багана хийсэн бөгөөд тусбүрийн орой дээр таван тохой өндөр дог[4] байв.

¹⁶Тэрээр дотоод ариун газарт гинжнүүд хийгээд, баганынх нь орой дээр байрлуулж, зуун анар урлан, гинжүүд дээр бэхлэв.[5]

¹⁷Тэрээр баганануудыг сүмийн өмнө буюу нэгийг нь баруун талд, нөгөөг нь зүүн талд босгосон бөгөөд баруун талынхыг Иахин,[6] зүүн талынхыг Боаз[7] гэж нэрлэжээ.