Read Ariun Bible 2013 – Ариун Библи 2013 Езра 5 Bible Online

Езра 5 - Ariun Bible 2013 – Ариун Библи 2013 bible

Езра 5

¹Эш үзүүлэгч Хаггаи, Иддогийн хүү Зехариа нар Иуда болон Иерусалимд байсан иудейчүүдэд тэдний дээр орших Израилийн Бурханы нэрээр эш үзүүлцгээсэнд

²Шеалтиелын хүү Зеруббабел, Иозадакийн хүү Иешуа нар босоцгоон Иерусалим дахь Бурханы өргөөг дахин барьж эхлэв. Бурханы эш үзүүлэгчид тэдэнтэй хамт байж, тэднийг дэмжив.

³Тэр үед Евфрат мөрний тэртээх захирагч Таттенаи, Шетар-бозенаи болон тэдний хамтрагчид ирж —Та нарт энэ өргөөг барьж, энэ хэрмийг гүйцээж дуусгах зарлиг хэн өгсөн юм бэ? гэцгээв.

⁴Тэгээд тэд —Барилгыг гүйцэтгэж байгаа эрсийн нэрийг хэл гэж тэдэнд хэлэв.

⁵Гэвч тэдний Бурханы мэлмий иудейчүүдийн ахмадууд дээр байсан бөгөөд Дариус хаанд мэдээлэл очиж, үүний тухай хариу захидал буцаж иртэл тэднийг болиулсангүй.

⁶Евфрат мөрний тэртээх захирагч Таттенаи, Шетар-бозенаи болон Евфрат мөрний тэртээх түүний хамтрагчид болох албан хаагчдаас Дариус хаанд илгээсэн захидлын хуулбарт

⁷дараах зүйлийг тэд түүнд бичиж, мэдээлэл илгээжээ. “Хаан Дариус танаа, бүгд амар тайван байг!

⁸Хаанд мэдүүлсүгэй! Бид Иуда аймагт, аугаа Бурханы өргөөнд очив. Үүнийг дөрвөлжин чулуугаар барьж, ханыг нь дүнзээр босгож буй бөгөөд энэ ажлыг маш зүтгэлтэйгээр явуулж байгаа ба тэдний гараар энэ нь амжилттай урагшилж байна!

⁹Тэгээд бид тэр ахмадуудаас асууж, тэдэнд «Та нарт энэ өргөөг барьж, энэ хэрмийг гүйцээн дуусгах зарлиг хэн өгсөн юм бэ?» гэж хэлсэн билээ.

¹⁰Бид мөн танд мэдэгдэж, тэднийг тэргүүлж буй хүмүүсийн нэрсийг бичиж авахын тулд тэднээс нэрсийг нь асуув.

¹¹Тэд бидэнд хариулахдаа «Бид тэнгэр, газрын Бурханы зарц нар бөгөөд олон жилийн өмнө баригдсан байсан өргөөг бид дахин барьж байна. Израилийн нэгэн агуу хаан үүнийг барьж гүйцээсэн байсан юм.

¹²Гэвч эцэг өвгөд маань тэнгэрийн Бурханыг хилэгнүүлсэнд, тэднийг Халдеи болох Вавилоны хаан Небухаднезарын гарт Тэрээр өгсөн ба тэр хаан энэ сүмийг сүйтгэж, ард түмнийг Вавилон уруу авч одсон юм.

¹³Харин Вавилоны хаан Корешийн анхдугаар онд Бурханы энэ өргөөг дахин барих зарлигийг Кореш хаан гаргасан билээ.

¹⁴Мөн Иерусалим дахь сүмээс Небухаднезарын авч Вавилоны сүмд аваачсан, Бурханы өргөөний алтан, мөнгөн сав суулгуудыг Кореш хаан Вавилоны сүмээс авч, өөрөө захирагчаар томилсон Шешбазар гэгч нэгэнд өгсөн билээ.

¹⁵Тэр түүнд хэлэхдээ “Эдгээр сав суулгуудыг авч, яваад Иерусалим дахь сүмд байрлуул. Бурханы өргөөг хуучин байранд нь дахин бариул!” гэсэн.

¹⁶Тэгээд Шешбазар ирж, мөнөөх Иерусалимд Бурханы өргөөний суурийг тавив. Тэр үеэс эхлэн одоог хүртэл энэ нь баригдсаар байгаа бөгөөд хараахан дуусаагүй байна» гэсэн билээ.

¹⁷Одоо, хэрэв үүнийг хаан таалбал, Вавилон дахь хааны эрдэнэсийн санд нягтлал хийж, Иерусалим дахь Бурханы энэ өргөөг дахин бариулахаар Кореш хаанаас гаргасан зарлиг байгаа эсэхийг хайж үзээд, энэ асуудлын талаар хаан өөрийн шийдвэрээ бидэнд илгээх болтугай” гэжээ.