Read Ariun Bible 2013 – Ариун Библи 2013 Нехемиа 3 Bible Online

Нехемиа 3 - Ariun Bible 2013 – Ариун Библи 2013 bible

Нехемиа 3

¹Тэгээд тэргүүн тахилч Елиашиб ах дүү тахилчдынхаа хамт босон, Хонины гулдан хаалгыг барив. Тэд түүнийг ариусган, хаалганы самбаруудыг нь тогтоов. Тэд Зуутын цамхаг хүртэлх хэрэм болон Хананелын цамхгийг ариусгав.[4]

²Түүний хажууд Иерихогийн хүмүүс, тэдний цаана Имрийн хүү Заккур барьж байв.

³Хассенаахын хөвгүүд Загасны гулдан хаалгыг барив. Тэд түүний яс модыг бэхэлж, хавтас, түгжээ, хөндлүүдийг нь суулгав.

⁴Тэдний хажууд Хаккозын хүү Уриагийн хүү Меремот засвар хийв. Түүнтэй зэрэгцэн Мешезабелын хүү, Берехиагийн хүү Мешуллам засвар хийв. Түүний хажууд мөн Баанагийн хүү Задок засвар хийв.

⁵Түүгээр ч барахгүй, түүний зэргэлдээ текоачууд засвар хийсэн ажээ. Гэвч тэдний язгууртнууд эздийнхээ ажлыг дэмжсэнгүй.

⁶Пасеагийн хүү Иоиада болон Бесодеиагийн хүү Мешуллам нар Хуучин[5] гулдан хаалгыг засав. Тэд түүний яс модыг бэхэлж, хавтас, түгжээ, хөндлүүдийг нь суулгав.

⁷Тэдний хажууд гибеон хүн Мелатиа, меронот хүн Иадон, Гибеоны болон Мизпагийн хүмүүс Евфрат мөрний тэртээх аймгийн захирагчийн албан ёсны суудалд засвар хийв.

⁸Түүний хажууд алтны дархчуудын нэг, Хархаиагийн хүү Уззиел засвар хийв. Түүнтэй зэрэгцэн сүрчиг хийгчдийн нэг Хананиа засвар хийсэн. Тэд Иерусалимыг Өргөн хана хүртэл сэргээн босгов.

⁹Тэдний хажууд Иерусалимын дүүргийн нэг хагасыг захирагч, Хурын хүү Рефаиа засвар хийв.

¹⁰Тэдний хажууд Харумафын хүү Иедаиа гэрийнхээ харалдаа засвар хийв. Түүнтэй зэрэгцэн Хашабнеиагийн хүү Хаттуш засвар хийв.

¹¹Харимын хүү Малхиа, Пахат-моабын хүү Хасшуб нар өөр хэсгийг болон Зуухны цамхгийг засав.

¹²Түүний хажууд Иерусалимын дүүргийн нөгөө хагасыг захирагч, Халлохешийн хүү Шаллум охидтойгоо засвар хийв.

¹³Ханун болон Заноагийн оршин суугчид Хөндийн гулдан хаалгыг засав. Тэд үүнийг сэргээн барьж, яс модыг нь бэхэлж, самбар, түгжээ, хөндлийг нь суулгасан ба Хаягдалын гулдан хаалга хүртэл нэг мянган тохой хэрмийг засварлав.

¹⁴Бет-хакхеремын дүүргийн захирагч, Рехабын хүү Малхиа Хаягдалын гулдан хаалгыг засварлав. Тэрээр үүнийг сэргээн барьж, самбар, түгжээ, хөндлүүдийг нь суулгав.

¹⁵Мизпагийн дүүргийн захирагч, Кол-хозегийн хүү Шаллум Оргилуурын гулдан хаалгыг засварлав. Тэр үүнийг сэргээн барьж, бүрээд, самбар, түгжээ, хөндлүүдийг нь суулгаж мөн хааны цэцэрлэг дэх Шелагийн цөөрмийн хэрмийг Давидын хотоос уруудах шат хүртэл засварлав.

¹⁶Түүний дараа Бет-зурын хагас дүүргийн захирагч, Азбукийн хүү Нехемиа, Давидын булшны харалдаах газар хүртэл, хиймэл цөөрөм, хүчит эрсийн байшин хүртэл засвар хийв.

¹⁷Түүний дараа Банийн хүү Рехумын дор левичүүд засвар хийв. Түүнтэй зэрэгцэн Кеилагийн хагас дүүргийн захирагч Хашабиа дүүрэгтээ засвар хийв.

¹⁸Түүний дараа Кеилагийн нөгөө хагас дүүргийн захирагч, Хенададын хүү Бавваигийн дор ах дүү нар нь засвар хийв.

¹⁹Түүний хажууд Мизпагийн захирагч, Иешуагийн хүү Езер Англе дахь зэвсгийн агуулахын өгсүүрийн өмнө талд өөр нэг хэсгийг засварлав.

²⁰Түүний дараа Англегаас тэргүүн тахилч Елиашибын байшингийн үүд хүртэлх өөр нэг хэсгийг Заббаин хүү Барух чармайн засварлав.

²¹Түүний дараа Хаккозын хүү Уриагийн хүү Меремот, Елиашибын байшингийн үүднээс байшингийн эцэс хүртэл өөр нэг хэсгийг засварлав.

²²Түүний дараа хөндийн хүмүүс болох тахилчид засвар хийв.

²³Тэдний дараа Бениамин ба Хасшуб нар байшингийнхаа өмнө талд засвар хийв. Тэдний дараа Ананиагийн хүү, Маасеиагийн хүү Азариа байшингийнхаа хажууд засвар хийв.

²⁴Түүний дараа Хенададын хүү Биннуи, Азариагийн байшингаас Англе ба булан хүртэл өөр нэг хэсгийг засварлав.

²⁵Узаин хүү Палал харуулын талбайн дэргэдэх хааны дээд байшингаас цухуйсан цамхаг ба Англегийн өмнө талд засвар хийв. Түүний дараа Парошийн хүү Педаиа засвар хийв.

²⁶Офелд амьдрагч сүмийн үйлчлэгчид Усны гулдан хаалганы өмнө талаас зүүн тийш цухуйсан цамхаг хүртэл засвар хийв.

²⁷Түүний дараа текоачууд цухуйсан их цамхгийн өмнө хэсэг ба Офелын хэрэм хүртэлх өөр нэг хэсэгт засвар хийв.

²⁸Адууны гулдан хаалганаас дээш тахилч бүр байшингийнхаа өмнө талыг засварлав.

²⁹Тэдний дараа Иммерийн хүү Задок байшингийнхаа өмнө талд засвар хийв. Түүний дараа Зүүн гулдан хаалганы харуул, Шеканиагийн хүү Шемаиа засвар хийв.

³⁰Түүний дараа Шелемиагийн хүү Хананиа ба Залафын зургаа дахь хүү Ханун нар өөр нэг хэсгийг засварлав. Түүний дараа Берехиагийн хүү Мешуллам сууцныхаа өөдөөс харсан хэсгийг засварлав.

³¹Түүний дараа алтны дархчуудын нэг Малхиа сүмийн үйлчлэгчид ба худалдаачдын байшин хүртэл, Хяналтын[6] гулдан хаалганы өмнө тал ба булангийн дээд өрөө хүртэл засвар хийв.

³²Булангийн дээд өрөө ба Хонины гулдан хаалганы хооронд алтны дархчууд ба худалдаачид засвар хийв.