Read Ariun Bible 2013 – Ариун Библи 2013 Естер 5 Bible Online

Естер 5 - Ariun Bible 2013 – Ариун Библи 2013 bible

Естер 5

¹Гурав дахь өдөр нь Естер хатныхаа хувцсыг өмсөн, хааны өргөөний дотоод ордонд хааны танхимын өмнө зогсоход, өргөөний үүд өөд харсан хааны танхимд хаан сэнтийдээ залран байв.

²Естер хатныг ордон дотор зогсож байгааг хаан харсан бөгөөд Естер хааны нүдний өмнө тааллыг олжээ. Хаан гартаа барьсан алтан очирт таягаа Естер уруу сунгахад Естер ойртон очиж, очирт таягийн үзүүрт хүрэв.

³Тэгээд хаан түүнд —Хатан Естер юу болов? Чи юу хүсээ вэ? Хаант улсын тал ч байсан чамд өгөгдөнө гэв.

⁴Тэгэхэд Естер —Хэрэв хаан үүнийг таалбал, өөрт нь бэлтгэсэн найранд маань хаан Хаман нар энэ өдөр ирэг гэв.

⁵Хаан —Естерийн хэлсний дагуу үйлдэхийн тулд Хаманыг түргэлүүл гэжээ. Тэгээд хаан болон Хаман, Естерийн бэлдсэн найранд ирэв.

⁶Тэд дарс ууж байх үед хаан Естерт —Чиний гуйлт юу вэ? Түүнийг чинь өгөх болно. Чи юу хүсээ вэ? Хаант улсын тал ч байсан гүйцэлдүүлэх болно гэж хэлэв.

⁷Естер хариуд нь —Миний гуйлт ба хүсэлт бол,

⁸хэрэв би хааны нүдний өмнө тааллыг олсон бөгөөд хэрэв хаан миний гуйсныг өгч, миний хүссэнийг хийхийг таалбал, хаан Хаман нар миний тэдэнд бэлдэх найранд ирэг! Маргааш би хааны айлдсаныг хийнэ гэв.

⁹Ингээд Хаман тэр өдөр баяр хөөртэй, өндөр сэтгэлтэй гарч явлаа. Харин хааны дааман хаалганы дэргэд Мордехаи өөрийнх нь өмнө босох ч үгүй, сүрдэн чичрэх ч үгүй байгааг хараад Хаман, Мордехаид ихэд хилэгнэв.

¹⁰Гэсэн ч Хаман биеэ барьж, гэртээ ирээд анд нөхөд болон эхнэр Зерешээ дуудуулахаар илгээв.

¹¹Тэгээд Хаман тэдэнд эд баялгийнхаа сүр жавхланг, хөвгүүдийнхээ өнөр олныг, өөрийг нь хаан хүндлэн өргөмжилсөнийг мөн өөрийг нь ноёд болон түшмэдээс дээгүүр дэвшүүлснийг тоочив.

¹²Хаман мөн —Тийм ээ, Естер хатан хүртэл бэлдсэн найрандаа хаантай хамт надаас өөр хэнийг ч ирүүлээгүй бөгөөд маргааш ч бас намайг хааны хамт урьж дуудсан.

¹³Гэвч иудей Мордехаи хааны дааман хаалганы дэргэд суугааг харах бүрд надад энэ бүхэн онцгүй байна гэв.

¹⁴Тэгтэл түүний эхнэр Зереш болон бүх анд нөхөр нь түүнд —Тавин тохой өндөр дүүжлүүр хийлгээд, Мордехаиг түүн дээр дүүжлэхийг хаанаас өглөө гуй. Тэгээд хаантай хамт найранд санаа амар оч! гэж хэлэхэд энэ үг Хаманд таалагдаж, тэрээр дүүжлүүр хийлгэв.