Read Ariun Bible 2013 – Ариун Библи 2013 Гэтлэл 1 Bible Online

Гэтлэл 1 - Ariun Bible 2013 – Ариун Библи 2013 bible

Гэтлэл 1

¹Гэрийнхнээ дагуулж Иаковтай хамт Египетэд очсон Израилийн хөвгүүдийн нэрс нь

²Реубен, Симеон, Леви, Иуда,

³Иссахар, Зебулун, Бениамин,

⁴Дан, Нафтали, Гад, Ашер нар юм.

⁵Иаковын үр удам бүгд далан[1] хүн бөгөөд харин Иосеф Египетэд байлаа.

⁶Иосеф хийгээд түүний ах дүү нар мөн тэр үеийнхэн бүгд өөд болов.

⁷Гэвч Израилийн хөвгүүд үржиж, өнөржин олширч, улам хүчтэй болсоор тэд тэр газрыг дүүргэв.

⁸Иосефыг мэдэхгүй шинэ хаан Египетэд гарч иржээ.

⁹Тэрээр ард түмэндээ —Үзэгтүн! Израилийн хөвгүүдийн ард түмэн биднээс олон бас хүчтэй боллоо.

¹⁰Тэдэнд нарийн ухаанаар хандацгаая. Тэгэхгүй бол тэд олширч, дайн гарах үед биднийг үзэн яддаг хүмүүстэй нийлэн бидний эсрэг байлдаж энэ газраас гарах[2] болно гэв.

¹¹Ингээд тэднийг хүнд хүчир ажлаар туйлдуулахын тулд тэдний дээр ажил хянагчдыг тавив. Тэд Фараонд зориулж Питом, Рамесес гэдэг агуулах хотуудыг барилаа.

¹²Гэвч тэднийг хэдийчинээ зовоох тусам тэд төдийчинээ олширч, улам бүр тархлаа. Тиймээс египетчүүд Израилийн хөвгүүдээс болж айдаст автав.

¹³Египетчүүд Израилийн хөвгүүдийг ажилд албадан шахав.

¹⁴Тэднийг албадан шахсан хүнд хүчир ажлууд болох шавар зуурах, тоосго цохих мөн хээрийн янз бүрийн ажлаар тэдний амьдралыг египетчүүд гашуун зовлонтой болгов.

¹⁵Дараа нь Египетийн хаан нэгийг нь Шифра, нөгөөг нь Пуа гэдэг еврей эх баригч нарт —

¹⁶Та нар еврей эмэгтэйчүүдийг амаржихад нь эх барихдаа хүү байхыг харвал үхүүлж, харин охин байвал амьд үлдээ гэв.

¹⁷Гэтэл эх баригч нар Бурханаас эмээж, Египетийн хааны тушааснаар эс үйлдэн, хөвгүүдийг амьд үлдээв.

¹⁸Тиймээс Египетийн хаан эх баригч нарыг дуудаж, тэдэнд —Та нар юунд ийм юм хийж хөвгүүдийг амьд үлдээв? гэв.

¹⁹Эх баригчид Фараонд —Еврей эмэгтэйчүүд египет эмэгтэйчүүдтэй адилгүй юм. Тэд хүч тэнхээтэй болохоор эх баригчийг тэдэн дээр ирэхээс өмнө төрчихсөн байх юм гэж хариулав.

²⁰Иймээс Бурхан эх баригчдад сайнаар ханджээ. Ард түмэн олширч, маш хүчирхэг болов.

²¹Эх баригчид Бурханаас эмээсэн тул Тэр тэдэнд гэр бүл бий болгож өгчээ.

²²Тэгэхэд Фараон бүх ард түмэндээ —Шинээр төрсөн хүү бүрийг та нар Нил мөрөнд хаяж, охин бүрийг амьд үлдээ гэж тушаав.