Read Ariun Bible 2013 – Ариун Библи 2013 Гэтлэл 11 Bible Online

Гэтлэл 11 - Ariun Bible 2013 – Ариун Библи 2013 bible

Гэтлэл 11

¹ЭЗЭН, Мосед —Би бас нэг гамшгийг Фараон дээр болон Египет дээр авчирна. Үүний дараа л тэр та нарыг эндээс явуулна. Тэр та нарыг явуулахдаа эндээс бүрмөсөн хөөж гаргана.

²“Эрэгтэй, эмэгтэй хүн бүр хөршөөсөө мөнгөн эдлэл, алтан эдлэлийг нэхэгтүн” хэмээн ард түмний сонорт дуулга гэв.

³ЭЗЭН египет хүмүүсийн нүдний өмнө ард түмнийг таалан соёрхож, Мосе гэгч хүн Египет улсад, Фараоны албат нар хийгээд ард түмний нүдэнд үлэмж агуу болов.

⁴Мосе —ЭЗЭН “Шөнө дунд Би Египетийн дундуур явна.

⁵Сэнтийдээ залрагч Фараоны ууган хүүгээс эхлэн, тээрмийн ард байгч шивэгчний ууган хүүг хүртэл мөн бүх малын ууган төл буюу Египет газрын ууган бүгд үхэх болно.

⁶Египетийн бүх нутагт урьд өмнө байгаагүй бас хойшид хэзээ ч үл гарах асар их уйлаан майлаан болно.

⁷Харин Израилийн хөвгүүдийн хүн малынх нь эсрэг нохой ч хуцаж боргохгүй. Ингэснээр Египет ба Израилийн хооронд ЭЗЭН зааг тавьсныг та нар мэдэх болно” гэж айлдаж байна.

⁸Таны эдгээр бүх албат над дээр ирээд, надад мөргөж, “Та болон таны хөлд байгч бүх ард түмэн гарч яваач” гэцгээсний дараа л би гарна гээд ихэд хилэгнэн Фараоныхаас гарав.

⁹ЭЗЭН, Мосед —Фараон та нарыг сонсохгүй. Тиймээс Миний гайхамшгууд Египетийн нутагт олширно гэж хэлсэн байлаа.

¹⁰Мосе Аарон нар энэ бүх гайхамшгийг Фараоны өмнө үйлдсэн боловч ЭЗЭН, Фараоны зүрхийг хатууруулсан тул тэр Израилийн хөвгүүдийг нутгаасаа явуулсангүй.