Read Ariun Bible 2013 – Ариун Библи 2013 Гэтлэл 21 Bible Online

Гэтлэл 21 - Ariun Bible 2013 – Ариун Библи 2013 bible

Гэтлэл 21

¹Чиний тэдэнд өгөх шийдвэрүүд энэ юм.

²Хэрэв чи еврей боол худалдан авбал тэр зургаан жил зарцлагдах ёстой. Харин долоо дахь жилдээ тэрээр төлөөсгүйгээр чөлөөлөгдөнө.

³Тэр ганцаараа ирвэл ганцаараа явах ёстой. Хэрэв тэр эхнэртэй бол эхнэр нь түүнтэй хамт явна.

⁴Хэрэв эзэн нь түүнд эхнэр өгч, эхнэр нь түүнд хөвгүүд, охидыг төрүүлбэл эхнэр хүүхдүүд нь эзний харьяат тул тэр ганцаараа явах ёстой.

⁵Гэвч хэрэв боол «Би эзэндээ болон эхнэр хүүхдүүддээ хайртай. Би чөлөөлөгдөж явахгүй» гэж үнэхээр хэлбэл

⁶эзэн нь түүний хүсэлтийг Бурханы өмнө авчран хаалга буюу хатавчны хажууд зогсоон эзэн нь түүний чихийг шөвгөөр цоолж, тэр насан турш эзэндээ үйлчлэх ёстой.

⁷Хэрэв хүн охиноо шивэгчин болгон худалдвал тэр нь эрэгтэй боол шиг чөлөөлөгдөх эрхгүй.

⁸Хэрвээ эзэн нь түүнийг өөртөө зориулан сонгож авсан боловч тэрээр эзнийхээ нүдэнд таалагдахгүй бол эзэн нь түүнийг чөлөөлж явуулах ёстой. Эзэн нь түүнд нэгэнт шударга бус хандсан тул түүнийг харь хүмүүст худалдах эрхгүй.

⁹Хэрэв түүнийг хүүдээ зориулж сонгон авбал түүнтэй охины ёсоор харьцах ёстой.

¹⁰Тэр өөртөө өөр эхнэр авсан ч анхны эхнэр нь хоол, хувцас гэхчлэн гэр бүлийн харилцаанаас хасагдах ёсгүй.

¹¹Хэрэв энэ гурван зүйлийг тэр биелүүлэхгүй бол анхны эхнэр нь ямар ч өр шир, төлөөс мөнгөгүйгээр чөлөөлөгдөнө.

¹²Хүн цохиод тэр нь үхвэл цохисон нь алуулах ёстой.

¹³Хэрэв тэр нөгөө хүнийг отоогүй, харин Бурхан түүний гарт цаад хүнийг унагасан бол түүний зугтаах газрыг Би та нарт тогтоож өгнө.

¹⁴Хэрэв хүн хөршөө алахаар төлөвлөж, санаатайгаар түүний эсрэг үйлдвэл тэр хүнийг үхүүлэхийн тулд Миний тахилын ширээнээс салгаж ав.

¹⁵Хэн эцэг эхээ цохино тэр заавал алуулах ёстой.

¹⁶Хэн хүн хулгайлна тэр түүнийгээ зарсан ч бай эсвэл хулгайлагдсан хүн нь хулгайчийн эзэмшлээс олдсон ч бай, заавал алуулах ёстой.

¹⁷Хэн эцэг эхээ хараана тэр заавал алуулах ёстой.

¹⁸Хэрэв хүмүүс хэрэлдээд нэг нь нөгөөгөө чулуу эсвэл нударгаараа цохиж, нөгөө нь үхэлгүй харин хэвтэрт ороод,

¹⁹дахин босож, таягтай гадуур явж чадвал цохисон хүн нь шийтгэгдэхгүй явах ёстой. Харин нөгөө хүний хэвтэрт алдсан хугацааны хохирлыг тэрээр нөхөн төлж, түүнийг бүрэн эдгэртэл асрамжилна.

²⁰Хэрэв хүн боолоо эсвэл шивэгчнээ саваагаар цохиж, тэр боол гарт нь үхвэл эзэн нь шийтгүүлэх ёстой.

²¹Харин хэрвээ боол нь нэг, хоёр өдөр амьд байвал ямар ч өшөө авах ёсгүй. Учир нь тэр эзний өмч мөн.

²²Хэрвээ хүмүүс хоорондоо зодолдож байгаад жирэмсэн эмэгтэйг цохиход хүүхэд нь зулбасан хэдий ч биед нь ямар ч гэмтэл байхгүй болбоос цохисон хүнийг мөнөөх эмэгтэйн нөхрийн шаардсанаар торгож, шүүгчдийн шийдсэнээр төлбөр төлүүлнэ.

²³Харин өөр ямар нэгэн гэмтэл учирсан бол амийг амиар,

²⁴нүдийг нүдээр, шүдийг шүдээр, гарыг гараар, хөлийг хөлөөр,

²⁵түлэгдэлтийг түлэгдэлтээр, шархыг шархаар, бэртэнгийг бэртэнгээр төлнө.

²⁶Хэрэв хүн боолоо эсвэл шивэгчнийхээ нүдийг цохиж гэмтээх аваас нүднийх нь оронд түүнийг чөлөөлөх ёстой.

²⁷Мөн хэрэв боол эсвэл шивэгчнийхээ шүдийг булга цохивоос шүднийх нь оронд түүнийг чөлөөлөх ёстой.

²⁸Хэрэв эрэгтэй юмуу эмэгтэй хүнийг үхэр мөргөж албал уг үхэр уруу чулуу чулуудаж ал. Махыг нь идэж болохгүй. Харин үхрийн эзэн шийтгэлгүй.

²⁹Гэвч үхэр урьд нь мөргөдөг байсан бөгөөд эзэнд нь сануулж байсан боловч үхрээ хашиж хориогүйгээс болж эрэгтэй эсвэл эмэгтэй хүн мөргүүлж үхвээс уг үхрийг чулуудан хороож бас эзнийг нь ч алах ёстой.

³⁰Хэрэв түүнд мөнгөн төлөөс ногдуулбаас тэр амиа аврахад ногдсон төлөөсийг хэд ч бай төлнө.

³¹Үхэр нь эрэгтэй юмуу эмэгтэй хүүхдийг мөргөвөөс энэ шийдвэр ёсоор үйлдэнэ.

³²Хэрэв боол эсвэл шивэгчнийг үхэр мөргөвөл үхрийн эзэн боолын эзэнд гучин шекел мөнгө төлнө. Харин үхрийг чулуудан алах ёстой.

³³Хэрэв хүн нүхийг онгорхой орхисон эсвэл нүх ухаад буцааж дараагүйгээс болж үхэр эсвэл илжиг нүхэнд нь унах аваас

³⁴нүхний эзэн нөхөн төлбөр өгөх ёстой. Тэр малын эзэнд мөнгө өгөх бөгөөд үхсэн мал түүнийх болно.

³⁵Хэрэв нэг хүний үхэр бусдын үхрийг мөргөж албаас тэд амьд үхрийг худалдаж, мөнгийг нь хувааж авах бөгөөд бас үхсэн үхрийг ч хувааж авах ёстой.

³⁶Хэрэв уг үхэр урьд нь мөргөдөг байсан нь мэдэгдсэн бөгөөд эзэн нь үхрээ хашиж хориогүй бол тэрээр үхрийг нь амьд үхрээр төлж цайруулан харин үхсэн үхрийг өөртөө авна.