Read Ariun Bible 2013 – Ариун Библи 2013 Гэтлэл 25 Bible Online

Гэтлэл 25 - Ariun Bible 2013 – Ариун Библи 2013 bible

Гэтлэл 25

¹Тэгээд ЭЗЭН, Мосед айлдан —

²Надад хандив авчир гэж Израилийн хөвгүүдэд хэл. Өгөх хүслээр зүрх нь хөтлөгдсөн хүн бүрээс Надад хандив ав.

³Чиний тэднээс авах хандив нь алт, мөнгө, хүрэл,

⁴хөх, ягаан, час улаан даавуу, нарийн нэхсэн маалинга, ямааны хялгас,

⁵улаанаар будсан хуцын арьс, далайн гахайн арьс, хуайс мод,

⁶гэрэлтүүлгийн тос, тослох тос ба анхилуун утлагад зориулсан үнэртэн,

⁷судалт гартаам чулуунууд, ефод[27] болон цээживчинд суулгах чулуунууд болой.

⁸Би тэдний дунд оршихын тулд Надад тэд ариун газрыг бариг.

⁹Асрын загвар болон бүх хэрэгслийнх нь загвар болгон Миний чамд үзүүлж байгаа бүхний дагуу чи түүнийг барь.

¹⁰Тэд хуайс модоор авдар хийх бөгөөд урт нь хоёр тохой хагас, өргөн нь нэг тохой хагас, өндөр нь нэг тохой хагас байг.

¹¹Чи авдрыг шижир алтаар бүр. Дотор гадаргүй бүрээд түүнийг тойруулан алтан эмжээр хий.

¹²Чи түүнд зориулж дөрвөн алтан гархи цутган авдрын дөрвөн хөл дээр байрлуул. Нэг талд нь хоёр гархи, нөгөө талд нь хоёр гархи байна.

¹³Чи хуайс модоор дамнуургууд хийж, алтаар бүр.

¹⁴Авдрыг зөөхийн тулд авдрын хажуу талын гархинуудад дамнуургуудыг шургуул.

¹⁵Дамнуургууд нь авдрын гархинд байх ёстой бөгөөд тэдгээрийг салгаж болохгүй.

¹⁶Миний чамд өгөх гэрчлэлийг чи авдар дотор хий.

¹⁷Чи эвлэрүүлгийн тагийг шижир алтаар хий. Уртыг нь хоёр тохой хагас, өргөнийг нь нэг тохой хагасаар хий.

¹⁸Эвлэрүүлгийн тагны хоёр үзүүрт чи хоёр херубыг алтаар давтаж хий.

¹⁹Нэг херубыг нэг үзүүрт, нөгөө херубыг нөгөө үзүүрт хийж, херубуудыг эвлэрүүлгийн тагны хоёр үзүүртэй нэгэн цул болго.

²⁰Херубууд далавчаа дээгүүр дэлгэж эвлэрүүлгийн тагийг далавчаараа бүрхсэн байна. Тэд өөд өөдөөсөө харсан байх агаад херубуудын нүүр нь эвлэрүүлгийн таг уруу харсан байна.

²¹Эвлэрүүлгийн тагийг чи авдран дээр тавьж, Миний чамд өгөх гэрчлэлийг авдар дотор хий.

²²Тэнд Би чамтай уулзана. Гэрчлэлийн авдран дээр буй хоёр херубын хоорондоос, эвлэрүүлгийн таган дээрээс Израилийн хөвгүүдийн төлөө чамд тушаах бүх зүйлээ Би чамд айлдана.

²³Чи хуайс модоор хоёр тохой урттай, нэг тохой өргөнтэй, нэг тохой хагас өндөртэй ширээ хий.

²⁴Чи түүнийг шижир алтаар бүрж, тойруулан алтан эмжээр хий.

²⁵Ширээг тойруулаад алганы энгээр хөвөө хийж, хөвөөг нь тойруулан алтаар эмж.

²⁶Түүнд зориулж чи дөрвөн алтан гархи хийж, тэднийг дөрвөн хөлийнх нь дөрвөн өнцөгт байрлуул.

²⁷Гархинууд нь ширээг зөөх дамнуургуудын тогтоогч болж, хөвөөнд ойр байх ёстой.

²⁸Чи ширээг зөөх дамнуургуудыг хуайс модоор хийж, алтаар бүр.

²⁹Чи утлагад зориулан таваг, хундага, ундаан өргөлд зориулан хул аяга, ваар сав хий. Эдгээрийг шижир алтаар хий.

³⁰Чи ширээн дээр тавиг талхыг байнга Миний өмнө байлгахаар тавь.

³¹Дараа нь чи давтсан шижир алтаар дэнлүүний суурь хий. Дэнлүүний суурь ба ишийг давтаж хийх бөгөөд үүний хундага, болцуу ба цэцгүүд үүнтэйгээ нэгэн цул байна.

³²Дэнлүүний суурийн хажуугаас нь зургаан салаа гарах бөгөөд нэг хажуугаас нь гурван салаа, нөгөө хажуугаас нь гурван салаа гарна.

³³Нэг салаанд гүйлсийн цэцгийн хэлбэртэй гурван хундага байх ба тусбүрдээ болцуу ба дэлбээтэй байна. Нөгөө салаанд ч гүйлсийн цэцгийн хэлбэртэй гурван хундага байх ба тусбүрдээ болцуу ба дэлбээтэй байна. Дэнлүүний суурийн зургаан салаа бүгд ийм байна.

³⁴Дэнлүүний сууринд мөн гүйлсийн цэцгийн хэлбэртэй дөрвөн хундага байх бөгөөд тусбүрийг болцуу ба дэлбээтэй хий.

³⁵Дэнлүүнээс гарсан зургаан салааны хувьд үүний эхний хос салааны доор нэг болцуу, дараагийн хос салааны доор нэг болцуу, гурав дахь хос салааны доор нэг болцуу байна.

³⁶Болцуу ба салаанууд нь дэнлүүний суурьтайгаа нэгэн цул бөгөөд бүхэлдээ шижир алтаар давтаж хийгдсэн нэг бүтээл байна.

³⁷Дараа нь чи долоон дэнлүүг нь хий. Тэдгээр нь өмнөх орчноо гэрэлтүүлэхийн тулд тэд дэнлүүнүүдийг асаах ёстой.

³⁸Үүний хямсаа ба тавиуруудыг нь шижир алтаар хий.

³⁹Дэнлүүний суурийг бүх хэрэгслийнх нь хамт нэг талант шижир алтаар хий.

⁴⁰Чамд уулан дээр үзүүлсэн загварын дагуу тэднийг хийхийг анхаар.