Read Ariun Bible 2013 – Ариун Библи 2013 Гэтлэл 26 Bible Online

Гэтлэл 26 - Ariun Bible 2013 – Ариун Библи 2013 bible

Гэтлэл 26

¹Дараа нь чи нарийн нэхсэн маалинга болон хөх, ягаан, час улаан даавуугаар арван бүрээстэй асар хийгтүн. Эдгээрийн дээр чи уран хийц болох херубуудыг хийлгэгтүн.

²Бүрээс бүрийн урт нь хорин найман тохой, өргөн нь дөрвөн тохой бөгөөд бүх бүрээс ижил хэмжээтэй байна.

³Таван бүрээс нь хоорондоо холбогдох бөгөөд нөгөө тав нь хоорондоо холбогдох ёстой.

⁴Чи холбогдсон эхний хэсгийн бүрээсний ирмэгт хөх өнгийн гогцоо хийж, нөгөө хэсгийн бүрээсний ирмэгт чи мөн түүнчлэн хий.

⁵Чи нэг бүрээсэнд тавин гогцоо, хоёр дахь хэсгийн нөгөө бүрээсний захад мөн тавин гогцоо хий. Гогцоонууд нь нэг нэгнийхээ харалдаа байхаар хий.

⁶Тавин алтан дэгээ хийж, уг дэгээнүүдээр бүрээснүүдийг хооронд нь холбогтун. Ингэснээр асар нь нэг болно.

⁷Дараа нь чи ямааны хялгасаар асрын дээгүүр бүтээх майхны бүрээснүүд хийгтүн. Чи арван нэгэн бүрээс хий.

⁸Бүрээс бүрийн урт нь гучин тохой, бүрээс бүрийн өргөн нь дөрвөн тохой байх бөгөөд арван нэгэн бүрээс нь ижил хэмжээтэй байх ёстой.

⁹Бүрээсний тавыг нь хооронд нь холбож, нөгөө зургаан бүрээсийг хооронд нь холбох ба майхны урд талд зургадугаар бүрээсийг нугалан давхарла.

¹⁰Эхний хэсгийн бүрээсний ирмэгийн холбоосон дээр тавин гогцоо, хоёр дахь хэсгийн бүрээсний ирмэгийн холбоосон дээр тавин гогцоо хий.

¹¹Тавин хүрэл дэгээ хийж, дэгээнүүдийг гогцоонд оруулан майхныг хооронд нь холбож нэг болго.

¹²Майхны бүрээснээс үлдэх унжсан хэсэг буюу үлдсэн хагас бүрээсийг асрын ар талд унжуулагтун.

¹³Асрын бүрээсний уртаас үлдсэн нэг тал дахь нэг тохой мөн нөгөө тал дахь нэг тохой нь асрын хоёр талаар унжин түүнийг бүтээх ёстой.

¹⁴Улаанаар будсан хуцын арьсаар асрын бүтээлгийг хийгтүн. Дээгүүр нь далайн гахайн арьсан бүтээлэг тавь.

¹⁵Тэгээд хуайс модоор асарт зориулан дүнзнүүдийг босоогоор нь хий.

¹⁶Дүнз бүрийн урт нь арван тохой, дүнз бүрийн өргөн нь нэг тохой хагас байна.

¹⁷Дүнз бүрд хооронд нь холбох нэг нь нөгөөгийнхөө харалдаа хоёр углуурга байх агаад асрын бүх дүнзийг чи ийнхүү хийгтүн.

¹⁸Тэгээд асарт зориулж өмнө зүгт, асрын баруун талд нь хорин дүнзийг хий.

¹⁹Хорин дүнзэн доор дөчин мөнгөн углуур, нэг дүнзэн доорх хоёр углуургад зориулж хоёр углуурыг мөн нөгөө дүнзэн доорх хоёр углуургад зориулж хоёр углуурыг хийгтүн.

²⁰Асрын нөгөө тал буюу хойд зүгт нь хорин дүнзийг

²¹дөчин мөнгөн углуурын хамт, нэг дүнзэн доор хоёр углуур, нөгөө дүнзэн доор хоёр углуур байх ба

²²асрын ар талд нь буюу баруун зүгт зориулан зургаан дүнз хийгтүн.

²³Асрын ар талын булангуудад хоёр дүнз хий.

²⁴Тэдгээр нь доогуураа салангид боловч дээгүүрээ эхний гархинд холбогдсон байх бөгөөд аль аль нь адилхан байх ёстой ба тэдгээр нь хоёр булан болох юм.

²⁵Тэнд арван зургаан мөнгөн углуур бүхий найман дүнз байх ёстой. Нэг дүнзэн доор хоёр углуур, нөгөө дүнзэн доор хоёр углуур байна.

²⁶Дараа нь хуайс модоор асрын нэг талын дүнзнүүдэд зориулан таван хөндөл хий.

²⁷Асрын нөгөө талын дүнзнүүдэд зориулан таван хөндөл мөн баруун зүгт буюу асрын ар талд зориулан таван хөндөл хийгтүн.

²⁸Дүнзнүүдийн дундуур нэг захаас нь нөгөө зах хүртэл үргэлжлэх голын хөндөл байх ёстой.

²⁹Дүнзнүүдийг алтаар бүрэгтүн. Мөн хөндлүүдийг тогтоох алтан гархинуудыг нь хийж, хөндлүүдийг алтаар бүрэгтүн.

³⁰Чамд уулан дээр үзүүлсэн хэв маягийн дагуу чи асрыг босго.

³¹Дараа нь чи хөх, ягаан, час улаан өнгийн даавуу болон нарийн нэхсэн маалингаар хөшиг хий. Үүний дээр уран хийц болох херубуудыг хийлгэ.

³²Хөшигнүүдийг алтаар бүрсэн хуайс модон дөрвөн багананаас өлгө. Дэгээнүүд нь бас алтан байх бөгөөд багананууд нь дөрвөн мөнгөн углуур дээр байх ёстой.

³³Чи хөшгийг дэгээнүүдээс өлгөн, хөшигний дотор талд гэрчлэлийн авдрыг оруул. Хөшиг нь ариун газар ба ариунаас ариун газрыг хооронд нь зааглах болно.

³⁴Ариунаас ариун газар дахь гэрчлэлийн авдар дээр чи эвлэрүүлгийн тагийг тавигтун.

³⁵Ширээг хөшигний гадна талд дэнлүүний суурийг ширээний эсрэг талд буюу асрын өмнө зүгт тавь. Ширээг хойд зүгт нь тавигтун.

³⁶Асрын үүдэнд хөх, ягаан, час улаан даавуугаар болон нарийн нэхсэн маалингаар нэхмэл дэлгэц хийгтүн.

³⁷Дэлгэцэнд зориулан хуайс модоор таван багана хийж алтаар бүр. Гадаснууд нь алтан байна. Тэдгээрт зориулан таван хүрэл углуур цутга.