Read Ariun Bible 2013 – Ариун Библи 2013 Гэтлэл 28 Bible Online

Гэтлэл 28 - Ariun Bible 2013 – Ариун Библи 2013 bible

Гэтлэл 28

¹Надад Израилийн хөвгүүдийн дундаас Аарон ахыгаа мөн түүний хөвгүүд Надаб, Абиху, Елеазар, Итамар нарыг тахилчийн албанд өөртөө авагтун.

²Ах Аароныхаа алдар, сүр жавхланд зориулан ариун хувцас хий.

³Надад тахилчийн албанд үйлчлүүлэхийн тулд Аароныг ариусгахаар түүнд хувцас хийхийг мэргэн ухааны сүнсээр Миний дүүргэсэн ур авьяаст хүн бүхэнд хэлэгтүн.

⁴Тэдний хийх хувцас нь цээживч, ефод, нөмрөг, нэхмэл дотуур дээл, толгойн ороолт, бүс болно. Аарон нь Надад тахилчийн албанд үйлчлэхийн тулд тэд ахад чинь болон хөвгүүдэд нь ариун хувцас хийг.

⁵Тэд алт ба хөх ягаан, час улаан даавуу, нарийн нэхсэн маалингыг аваг.

⁶Тэгээд алт, хөх ягаан, час улаан даавуу, нарийн нэхсэн маалингаар уран хүний урлал болох ефод хийг.

⁷Холбогдсон байхын тулд хоёр үзүүртэй нь холбоотой хоёр мөрөвч байх ёстой.

⁸Ефодын дээрх уран гоёмсог бүс нь алт, хөх, ягаан, час улаан даавуу, нарийн нэхсэн маалингаар ефодтой ижил хийгдсэн байх ёстой.

⁹Чи хоёр судалт гартаам чулууг авч, дээр нь Израилийн хөвгүүдийн нэрсийг сийлэгтүн.

¹⁰Тэдний төрсөн дарааллаар нэг чулуун дээр зургаан нэр, нөгөө чулуун дээр үлдсэн зургаан нэр байна.

¹¹Үнэт чулуу засагчийн урлалаар чи Израилийн хөвгүүдийн нэрсийг хоёр чулуунд тамган сийлээсээр сийлэн, алтан сууринд суулгагтун.

¹²Чи хоёр чулууг Израилийн хөвгүүдийн төлөөх дурсгалын чулуу болгон ефодын мөрөвч дээр тогтоох бөгөөд Аарон тэдний нэрсийг ЭЗЭНий өмнө хоёр мөрөн дээрээ дурсгал болгон тээнэ.

¹³Чи алтан суурь хий.

¹⁴Мөн шижир алтан хоёр гинжийг сүлжмэл олс шиг урлан хийж, суурин дээр тогтоо.

¹⁵Чи уран хүний урлал болох шүүхийн цээживчийг хий. Үүнийг чи ефодыг урласны адилаар хий. Чи алт, хөх, ягаан, час улаан өнгийн даавуугаар болон нарийн нэхсэн маалингаар үүнийг үйлдэгтүн.

¹⁶Тэр нь дөрвөлжин, давхарласан бөгөөд урт нь нэг сөөм, өргөн нь нэг сөөм байна.

¹⁷Түүний дээр чи дөрвөн эгнээ чулуу шигтгэ. Бадмаараг, молор, маргадтай эгнээ нь эхний эгнээ,

¹⁸хоёр дахь эгнээ нь оюу, индранил, очир алмаас,

¹⁹гурав дахь эгнээ нь нал, гартаам, ягаан болор,

²⁰дөрөв дэх эгнээ нь биндэръяа, судалт гартаам, хаш байна. Эдгээрийг алтан хүрээнд нь суулгах ёстой.

²¹Чулуунууд нь Израилийн хөвгүүдийн нэрсийн дагуу, арван хоёр нэрс бүхий байх бөгөөд тусбүр дээр нь арван хоёр овгийн нэрсийг нэг нэгээр нь тамган сийлээсээр сийлсэн байх ёстой.

²²Чи цээживчин дээр шижир алтаар сүлжмэл олс шиг урласан гинжүүд хий.

²³Цээживчин дээр хоёр алтан гархи хийж, хоёр алтан гархиа цээживчний хоёр үзүүрт холбогтун.

²⁴Хоёр алтан оосрыг цээживчний үзүүрүүдэд байх хоёр гархинд холбо.

²⁵Хоёр оосрын хоёр үзүүрийг хоёр алтан сууринд холбож, ефодын урд талд мөрөвчтэй нь холбо.

²⁶Чи хоёр алтан гархи хийж, цээживчний хоёр үзүүрт, ефод уруу харсан дотоод ирмэгт нь хад.

²⁷Чи мөн хоёр алтан гархи хийж, ефодын урд доод талд, мөрөвчнийх нь залгаасны ойролцоо, ефодын уран гоёмсог бүсний дээд талд хад.

²⁸Тэд цээживчний гархинуудыг ефодын гархинуудтай хөх оосроор холбог. Ингэснээр цээживч нь ефодын уран гоёмсог бүсний дээр байж, ефодоос салахгүй юм.

²⁹Аарон ариун газарт орохдоо ЭЗЭНий өмнө байнга дурсгал болгон Израилийн хөвгүүдийн нэрсийг шүүхийн цээживчинд зүрхэн тушаа авч явна.

³⁰Шүүхийн цээживчин дотор Урим ба Туммимийг[28] хий. Аароныг ЭЗЭНий өмнө ороход тэдгээр нь түүний зүрхэн тушаа байна. Израилийн хөвгүүдийн шүүлтийг Аарон ЭЗЭНий өмнө байнга зүрхнээ тээж явах болно.

³¹Чи ефодын нөмрөгийг бүхэлд нь хөх өнгөөр үйлд.

³²Оройн хэсгийнх нь голд амсар гарга. Амсар нь урагдахгүйн тулд хөө хуягны амсар шиг амсрыг тойруулан нэхмэл урлалаар захал.

³³Хормойг нь тойруулан хөх, ягаан, час улаан даавуугаар анаруудыг мөн завсар нь алтан хонхнуудыг тойруулан хий.

³⁴Нөмрөгийн хормойг тойруулан алтан хонх ба анар, алтан хонх ба анар гэж байхаар хийгтүн.

³⁵Аароныг үйлчлэх үед үүнийг өмсгөсөн байх бөгөөд тэр үхэхгүйн тулд ЭЗЭНий өмнө ариун газарт орж гарахад хонхны жингэнэх нь сонсогдоно.

³⁶Чи бас шижир алтаар пайз хий. Пайзан дээр тамган сийлээсээр “ЭЗЭНд ариун” гэж сийлэгтүн.

³⁷Үүнийгээ хөх уяагаар толгойн ороолтонд бэхлэх бөгөөд энэ нь толгойн ороолтны урд талд байх ёстой.

³⁸Энэ нь Аароны духан дээр байж, Израилийн хөвгүүдийн ариун хандив болгож зориулсан ариун юмсын гэм согогийг Аарон өөртөө тохон, тэд Эзэний өмнө хүлээн авагдахын тулд энэ нь ямагт түүний духан дээр байг.

³⁹Чи нарийн маалингаар дотуур дээл нэхэж, нарийн маалингаар толгойн ороолт хий. Чи нэхмэлчний урлал болох бүсийг хий.

⁴⁰Аароны хөвгүүдийн алдар, сүр жавхланд зориулан тэдэнд дотуур дээл, бүс болон толгойн боолтууд хийгтүн.

⁴¹Тэгээд чи ах Аарондаа бас хөвгүүдэд нь тэдгээрийг өмсгөн Надад тахилчийн албанд үйлчлүүлэхийн тулд тэднийг тослон тэдэнд сахил хүртээн ариусгагтун.

⁴²Нүцгэн биеийг нь халхлах маалинган дотуур өмдийг тэдэнд хий. Тэр нь бэлхүүснээс гуя хүрэх ёстой.

⁴³Аарон болон хөвгүүд нь уулзалтын майханд орохдоо эсвэл ариун газарт үйлчлэхээр тахилын ширээнд ойртохдоо хилэнцээ тээж үхэхгүйн тулд тэдгээрийг өмсөх ёстой. Энэ нь түүнд болон түүний дараах үр удамд нь үүрд мөнхийн зарлиг болой.